BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اكتريسا اسەل ساعاتوۆا: مەنىڭ جارىم – الدىمەن ادام جانە ناعىز ەر-ازامات!

ٴا.ب.: سالەمەتسىز بە، اسەل. ٴۇش جىل بۇرىن تۇسىرىلگەن «ماحاببات تالكەگى» كينوكارتيناسىنىڭ سىزگە ۇلكەن جەتىستىك پەن تانىمالدىلىق سىيلاعانى ەسىمىزدە. ال ٴقازىر ونەر جولى قالاي دامۋدا؟ وسى ۋاقىت ارالىعىندا قانداي جاڭالىقتار بولدى؟
ٴا.س.: جاڭالىق، راسىندا دا، وتە كوپ. بىرىنشىدەن، تۇرمىسقا شىقتىم. ەكىنشىدەن، «ەكى جۇلدىز» جوباسىنا قاتىستىم. ارى قاراي «وحوتا زا پريزراكوم» فيلمىندە باستى ٴرولدى،   «ستۋدەنت» فيلمىندە ەپيزودتىق ٴرولدى وينادىم، ال ٴقازىر ەفيردە ٴجۇرىپ جاتقان «قۇربىلار» سەريالىنا قاتىسىپ جاتىرمىن. مۇنىڭ بارلىعى ٴتورت اي بويى مەنىڭ بار بوس ۋاقىتىمدى الدى. تۇسىرىلىمدەر كۇندە وتەدى. قۇداي قالاسا، جاقىن ۋاقىتتا جۇمىستار اياقتالادى. سونداي-اق ۇزاق ۋاقىتتaن بەرى تانىمال مودەلەر كيرا پلاستينينامەن بىرلەسىپ جۇمىس ىستەپ جاتىرمىز.
ٴا.ب.: جالپى العاندا، جۇمىس كوپ دەيسىز عوي؟
ٴا.س.: مەن جۇمىس كوپ دەمەس ەدىم. مۇنىڭ بارلىعى – كەزەڭدىك جۇمىس. ەڭ باستىسى، «قۇربىلار» سەريالىنىڭ تۇسىرىلىمدەرىمەن اينالىسىپ ٴجۇرمىن، بوس ۋاقىت جوقتىڭ قاسى. بۇيىرتسا، وسى جۇمىستاردى ٴتامامداپ، ٴوزىمدى جەكە ىستەرىمە، جەكە ومىرىمە ارنايتىن شىعارمىن.
ٴا.ب.: اڭگىمەنى جەكە ومىرىڭىزگە قاراي بۇرساق. بۇگىندە ٴسىز – تۇرمىستاعى ايەلسىز. تانىمال اكتريساعا تۇرمىستا بولۋ قيىن ەمەس پە؟
ٴا.س.: قانشالىقتى تانىمال ەكەنىمدى قايدام، ٴبىراق تۇرمىستا بولۋ جاقسى (كۇلەدى). مەنىڭ ٴومىرىم تۇرمىسقا شىققاننان كەيىن اسا وزگەرگەن جوق. قايتا ومىرىمدە ٴوز ويىممەن، جوسپارلارىممەن بولىسەتىن، مەنى ٴاردايىم بارلىق جاعدايدا قولدايتىن  ادام پايدا بولدى.    
ٴا.ب.: جارىڭىز ٴسىزدىڭ ماماندىعىڭىزعا قالاي قارايدى؟
ٴا.س.: مەنىڭ ٴاربىر ىسىمە تۇسىنىستىكپەن قارايدى. بۇعان بايلانىستى ٴبىزدىڭ ارامىزدا ەشبىر كەلىسپەۋشىلىك تۋىندامايدى. ٴبىزدىڭ ەلىمىزدىڭ مەنتاليتەتى مەن اكتريسا ماماندىعى تۋرالى ەكىۇشتى پىكىرلەرگە قاراماستان، جارىم مەنىڭ بارلىق باستامالارىما قولداۋ كورسەتەدى. مەن تۇسكەن فيلمدەردى تاماشالاپ، مەنى ماقتان تۇتادى.
ٴا.ب.: تۇرمىس قۇرۋدى بۇرىن  ٴدال وسىلاي ەلەستەتىپ پە ەدىڭىز؟
ٴا.س. شىنىمدى ايتسام، مەن بۇل جايلى ەشقاشان ويلاماپپىن (كۇلەدى). مەن جۇمىسقا تولىقتاي بەرىلدىم دە، جەكە ٴومىرىم تۋرالى وي باسىما كىرىپ تە شىقپاپتى. مەن كۇن سايىن دۇنيەنى جاڭا قىرىنان كورەمىن. سالىستىرىپ، تالداۋ جاسايتىنداي بۇرىن تۇرمىستا بولماعانمىن (كۇلەدى). سوندىقتان بۇل كۇي – مەن ٴۇشىن بۇرىن سەزىنىپ كورمەگەن جاڭا كۇي. ارينە، ٴقازىر وتباسىن قۇرعالى ەكى جىل ٴوتتى، قازىرگى ىشكى كۇيىم ٴبىرقالىپتى ارناعا تۇسكەنى راس.
ٴا.ب.: ال وتباسىن تولىقتىرۋ تۋرالى نە ويلايسىز؟ جۇمىستان ٴبىر ٴسات قول ٴۇزىپ، ٴۇزىلىس جاساۋ جوسپارىڭىزدا بار ما؟
ٴا.س.: ارينە، بۇل – ويدا جۇرگەن ماسەلە. مۇمكىندىك پەن ساتتىلىكتىڭ تۋۋىن كۇتىپ ٴجۇرمىز. نەگىزىنەن، بۇل ەشكىممەن تالقىلامايتىن، جەكە تاقىرىبىم ەدى. ٴيا، بالا سۇيگىمىز كەلەدى. قۇداي قالاسا، بالالى دا بولارمىز. ٴقازىر جۇمىستىڭ كوپ ەكەندىگىنە قاراماستان، بۇل ٴبىزدىڭ وتباسىمىزدىڭ سانىن كوبەيتۋ تۋرالى جوسپارىمىزعا قايشى كەلمەيدى.
ٴا.ب.: ٴسىز ٴوزىڭىزدىڭ جارىڭىزدىڭ كىم ەكەنىن، نەمەن اينالىسىپ، قاي جەردە تانىسقاندارىڭىز تۋرالى ەشقاشان اڭگىمەلەمەيسىز. مۇمكىن ٴبىزدىڭ سايتتىڭ وقىرماندارى ٴۇشىن ايتىپ بەرەرسىز؟
ٴا.س.: مەنىڭ جارىم – الدىمەن ادام جانە ناعىز ەر-ازامات (كۇلەدى). ونىڭ شوۋ-بيزنەسكە ەش قاتىسى جوق. ماماندىعى كىم دەسەڭىز، ونىڭ جەكە بيزنەسى، ٴوز كاسىبى، مەنىڭ ماماندىعىممەن ەش بايلانىسپايتىن ٴوز جۇمىسى بار. ٴبىز كەزدەيسوق ٴارى كوپ جىل بۇرىن تانىسقان بولاتىنبىز.
ٴا.ب.: كەزدەيسوق دەگەندى قالاي تۇسىنۋگە بولادى؟ ٴسىز ٴوز جۇمىستارىڭىزبەن جۇرگەندە، ول جانىڭىزدان ٴوتىپ بارا جاتتى ما؟
ٴا.س.: (كۇلەدى) ٴيا، ٴدال وسىلاي بولدى دەسە دە بولادى. بۇل ومىردە كەزدەيسوق ەشنارسە بولمايدى. ٴبىزدىڭ كەزدەسۋىمىز دە بىزدەن تىس كوكتەگى تىلسىم الەم ارقىلى شەشىلىپ قويعان دەپ ويلايمىن.
ٴا.ب.: ەندى جۇمىسىڭىزعا قايتا ورالساق. ٴسىز ٴقازىر سەريالعا ٴتۇسىپ جاتىرسىز. قانداي ٴرولدى سومدايسىز؟ ٴسىز سومدايتىن كەيىپكەردىڭ بەينەسى جانىڭىزعا جاقىن با؟
ٴا.س.: «قۇربىلار» سەريالى بەس ايەلدىڭ ٴومىرى تۋرالى باياندايدى. ولاردىڭ ٴارقايسىسىنىڭ ٴوز ٴومىرى، ٴوز تاعدىرى بار. مەنىڭ كەيىپكەرىم – ٴمادينا ەسىمدى تابىستى جاس ايەل، جەكە ٴومىرى ساتسىزدىككە ۇشىراپ، ٴوزىن مانساپ جولىنا ارناعان ادام.  سەريالدىڭ باسىنان سوڭىنا دەيىن ول ٴوز-وزىن جانە ماحابباتىن تابۋعا تالپىنادى. باسقا كەيىپكەرلەردىڭ دە باسىنان ٴتۇرلى وقيعالار ٴوتىپ جاتادى. بەس كەيىپكەردىڭ بىرەۋى – ەكى بالاسى، كۇيەۋى بار ايەل. ونىڭ ٴاربىر كۇنى ٴوز باقىتى ٴۇشىن كۇرەسپەن وتەدى. ەكىنشى ايەل تۇرمىس قۇرعان، الايدا بالالارى جوق. ٴۇشىنشى «قۇربى» – قالتاسى قالىڭ، بويجەتكەن قىزى بار ايەل. الايدا جاماندىق ويلاپ، اياعىنان شالۋشىلار كوپ. ال سوڭعى كەيىپكەردىڭ دە وتباسى بار، الايدا كۇيەۋى تابىس تاپپايدى. جالپى العاندا، ٴارتۇرلى بەس ايەلدىڭ ٴومىرى تۋرالى سەريال.
ٴا.ب.: بۇل سەريالدى «ۇلكەن قالاداعى قۇمارلىق» سەريالىنىڭ بالاما نۇسقاسى دەۋگە بولا ما؟
ٴا.س.: جوق، سەريال اسا تانىمال «ۇلكەن قالاداعى قۇمارلىقتىڭ» سيۋجەتتىك جەلىسىن قايتالامايدى. جانە قايتالانۋى دا مۇمكىن ەمەس، سەبەبى بىزدە مەنتاليتەت باسقا، امەريكالىق سەريالمەن قاي جاعىنان بولسىن ەش قيىسپايدى. سوندىقتان «قۇربىلار» سەريالى – مۇلدە بولەك تاقىرىپ.
ٴا.ب.: بولاشاقتا قانداي جوسپارلارىڭىز بار؟ جاڭا جوبالارعا شاقىرىپ جاتىر ما؟
ٴا.س.: شىن مانىسىندە، مەن جوسپارلار تۋرالى ايتقاندى ۇناتپايمىن. بۇل – ٴالى جۇزەگە اسپاعان دۇنيەلەر. ماعان ودان دا بولعان نەمەسە ورىندالعان نارسەلەر نەمەسە قازىرگى تاڭدا ورىن الىپ جاتقان جايتتاردى ٴسوز ەتكەن ۇنايدى. جوسپارلار، ٴتۇرلى ويلار، جۇمىس بويىنشا قانداي دا ٴبىر ۇسىنىستار وتە كوپ. الايدا مىنا وزگەرمەلى زاماندا بولاشاق تۋرالى كەسىپ ايتۋ، بىرنارسەگە ۋادە بەرۋ جانە ونى جارياعا جار سالۋ ازداپ قورقىنىشتىلاۋ. ودان دا ول جوسپارلاردى ىسكە اسقان كەزىندە ٴسوز ەتكەن دۇرىس.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي