BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اقمولالىق ٴمۇسىنشىنىڭ سۇيەكتەن جاساعان ونىمدەرى الەمدى باعىندىرۋدا

فوتو: АО ӨКҚ

اقمولالىق سۋرەتشى جانە ٴمۇسىنشى بەكتاس كارىم ۇلىنىڭ تۋىندىلارى اقش، رەسەي، وزبەكستان، موڭعوليا جانە ەلىمىزدە وتكەن ٴتۇرلى بايقاۋلاردان جەڭىسپەن ورالىپ، كەڭىنەن تانىلۋدا، دەپ حابارلايدى baq.kz اقپارات اگەنتتىگى وڭىرلىك كوممۋنيكاسيالار قىزمەتىنە سىلتەمە جاساپ.

سۋرەتشى، ٴمۇسىنشى بەكتاس كارىم ۇلىنىڭ ەسىمى وبلىس، رەسپۋبليكاعا عانا ەمەس، شەتەل جۇرتشىلىعىنا دا تانىس. سۇيەكتى سويلەتىپ، سۋرەتكە جان بىتىرگەن ول 2005 جىلى اقمولا وبلىسى شورتاندى اۋدانىنا موڭعوليا ەلىنەن كوشىپ كەلگەن. اعىمداعى جىلى ەلوردادا ۇلتتىق مۇراجايدا «وتكەندى ەسكە الۋ – بولاشاققا جول» تاقىرىبىندا وتكەن كورمەگە ۇسىنىلعان جادىگەرلەرى ٴدۇيىم جۇرتتىڭ نازارىن اۋدارعان. كورمە دەمەكشى، سۇيەكتەن جاساعان مۇسىندەرى ەكسپو تورىندە دە لايىقتى ورىن العان بولاتىن.

ٴوز ۋاقىتىندا العان سۋرەتشىنىڭ ٴبىلىمى بەكتاس كارىم ۇلىنا اكۆارەلمەن، مايلى بوياۋمەن سالعان كارتينالارىندا قازاق حالقىنىڭ تۇرمىس-تىرشىلىگىن، ٴسالت-داستۇرىن ايقىن كورسەتۋگە مۇمكىندىك بەرەدى. ول شامامەن 7-8 جىلدان بەرى بالالارعا سۋرەت سالۋدان ۇيىرمە جۇرگىزىپ، تاجىريبەسىمەن بولىسۋدە. ۋاقىت بولسا زۋىلداپ وتۋدە، وقۋشىلارىنىڭ الدى بۇگىندە مەكتەپ ٴبىتىرىپ كەتكەن. سۋرەتشىنىڭ ايتۋىنشا، ۇيىرمەگە ٴقازىردىڭ وزىندە 10 شاقتى بالا قاتىسادى ەكەن.

شىعارماشىلىقپەن اينالىساتىن كەز-كەلگەن جان ٴونىمنىڭ جاڭا تۇرلەرىن مەڭگەرۋگە جانە يگەرۋگە قىزىعۋشىلىق تانىتادى. ولاردىڭ قاتارىندا ب.كارىم ۇلى دا بار. 3 جىلداي ۋاقىت بۇرىن سۇيەكتەن ٴمۇسىن جاساۋ ونەرىن دە تانىتا باستاعان ول بۇل ونەر ٴتۇرىنىڭ دە تاقىرىبىنا قازاقى ٴومىردى، ۇلتتىق ٴداستۇردى، كونە عۇرىپتاردى سىيدىرا بىلەدى. اتاپ ايتقاندا، قويدىڭ، ٴىرى قارا مالدىڭ جاۋىرىن سۇيەگىن بۇزباي ارلەپ، ٴتۇرلى جادىگەرلىك بۇيىمدار جاسايدى.

«حالقىمىز مالدىڭ جاۋىرىن سۇيەگىن قاستەرلەپ، ىرىم ەتىپ، سول سۇيەكتەن جول اشىپ، تۇمار قىلىپ پايداعا جاراتقان، - دەيدى ب.كارىم ۇلى. - مالدىڭ جاۋىرىن سۇيەگىن كادەگە جاراتۋ ارقىلى حالقىمىزدىڭ ۇلتتىق قۇندىلىقتارىن بولاشاق ۇرپاققا قالدىرۋدى، ناسيحاتتاۋدى ماقسات تۇتتىم. مەنىڭ دە كوزدەگەن ماقساتىم – وسكەلەڭ ۇرپاققا وسى ٴبىر كەنجەلەپ قالعان ونەردى ۇيرەتۋ ەدى»، - دەدى بەكتاس كارىم ۇلى.

اۆتوردىڭ ايتۋىنشا، 1000 استام كارتينالار سالىپ، 200 استام سۇيەك-مۇسىن جاساعان. ٴارى بۇل ەڭبەگى ەلەۋسىز قالىپ جاتقان جوق. ۇنەمى جۇلدەلى ورىنداردى يەمدەنۋدە. اتاپ ايتقاندا، استانا قالاسىندا كونگرەسس-حول كورمە زالىندا ۇلى جەڭىستىڭ 70 جىلدىعىنا وراي وتكەن كوركەمونەرپازدار شىعارماشىلىعى رەسپۋبليكالىق بايقاۋ-فەستيۆالىنىڭ ٴى ورىن، 2017 جىلى وتكەن «كوشپەندىلەر» حالىقارالىق كورمەسىنىڭ باس جۇلدەسى «التىن بۇركىت» ديپلومدارىمەن، بايان-ولگيي (موڭعوليا) ايماعىنىڭ ونەر سالاسىنىڭ «وزات قىزمەتكەر» ٴتوس بەلگىسىمەن ماراپاتتالعاندىعى وسىنىڭ دالەلى.

سونداي-اق، موڭعوليادا بولىپ وتكەن اقش، رەسەي، قازاقستان ەلدەرىنىڭ بىرىككەن حالىقارالىق سۋرەتشى، قولونەر شەبەرلەرىنىڭ كورمەسىنە قاتىسىپ، باس جۇلدەسىن يەمدەنگەن. بۇل جولى اقش-قا «كوشپەندىلەر ٴۇنى» كورمەسىنە قازاقستاننان شاقىرۋ العان 6 سۋرەتشىنىڭ قاتارىندا بولعان ب.كارىم ۇلى بارا الماعان ەدى. دەگەنمەن، ونىڭ قولىنان شىققان سۋرەتى وزبەكستان، رەسەي، موڭعوليا ەلدەرىنەن بارعان قاتىسۋشىلاردىڭ تۋىندىلارىمەن قاتار ۇسىنىلدى. بۇل ٴبىزدىڭ وتانداستارىمىزدىڭ ونەر تۋىندىلارىنىڭ ٴتىلى تانىمال، تۇسىنىكتى جانە، ەڭ باستىسى – شىنايى ەكەنىن ايعاقتايدى. سوندىقتان دا قىزىقتى ٴارى تارتىمدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي