پاۆلودار وبلىسىندا جول اپاتىنان جەتى ادام زارداپ شەكتى

فوتو: uralskweek.kz

استانا، baq.kz. جول-كولىك وقيعاسىنىڭ بىرەۋى پاۆلودار – استانا، ەكىنشىسى وبلىس ورتالىعىندا بولعان. بۇل تۋرالى pavlodarnews.kz سايتى حابارلايدى.

وبلىستىق دەنساۋلىق ساقتاۋ باسقارماسىنىڭ ٴباسپاسوز حاتشىسى ەلميرا تەمىرعاليەۆانىڭ ايتۋىنشا، جۇرگىزۋشى مەن ٴۇش جولاۋشى ٴارتۇرلى جاراقات العان.

«جول-كولىك وقيعاسى كەشە، ساعات 14.19-دا تىركەلدى. 55 جاستاعى ازاماتتىڭ وڭ جاق بۇعاناسى مەن بىرنەشە قابىرعاسى سىنعان. 38 جاستاعى ادامنىڭ باس سۇيەك-ميى زاقىمدانىپ، ميى شايقالعان، سول جاق بىلەگى سىنعان، كوپتەگەن جاراقاتتار بار. 34 جاستاعى تۇرعىننىڭ ەكى جاق قابىرعالارى سىنعان، باس سۇيەك-ميى زاقىمدانىپ، ميى شايقالعان»، - دەيدى ەلميرا تەمىرعاليەۆا.

ۇشەۋى دە ەكىباستۇز قالاسىنىڭ اۋرۋحاناسىنا جاتقىزىلعان. 39 جاستاعى ەر ادام اۋرۋحاناعا بارۋدان باس تارتقان.

«جول-كولىك وقيعاسىنا قاتىستى قر قك-نىڭ 345-بابى بويىنشا تەرگەۋ جۇرگىزىلۋدە. ٴتيىستى ساراپتامالار تاعايىندالدى. تەكسەرىس جۇرگىزىلۋدە»، - دەيدى پوليسيا دەپارتامەنتىندە.

بۇدان باسقا، كىشى اينالىم – تولستوي كوشەلەرىنىڭ قيىلىسىندا تاعى ٴبىر جول اپاتى ورىن العان. «volkswagen transporter» جانە «audi» اۆتوكولىكتەرى سوقتىعىسىپ قالعان.

«ناتيجەسىندە «audi» كولىگىنىڭ 39 جاستاعى جۇرگىزۋشىسى مەن جولاۋشىلار اۋرۋحاناعا جەتكىزىلدى. ساراپتاما تاعايىندالدى. تەكسەرىس جۇرگىزىلۋدە»، - دەيدى پوليسيا دەپارتامەنتىندە.

وڭىرلىك دەنساۋلىق ساقتاۋ باسقارماسىنىڭ مالىمەتىنە سۇيەنسەك، جۇرگىزۋشىدە جابىق باس سۇيەك-مي سىنىعى، باس ميىنىڭ شايقالۋى تىركەلگەن. 39 جاستاعى جولاۋشىنىڭ ومىرتقاسىنىڭ بەل جاق بولىگى جاراقاتتانىپ، سول جاق قابىرعالارى سىنعان. ەكەۋى دە № 1 قالالىق اۋرۋحاناعا جەتكىزىلگەن. 13 جانە 14 جاستاعى جولاۋشىلار جابىق باس سۇيەك-مي سىنىعى، باس ميىنىڭ شايقالۋى دياگنوزىمەن وبلىستىق بالالار اۋرۋحاناسىنا جاتقىزىلعان.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!