مينيستر پوليسيانىڭ ولىمىنە قاتىستى تۇسىنىكتەمە بەردى - وقيعا|27 قىركۇيەك 2018، 10:49
كۋرسى ۆاليۋت وبنوۆليايۋتسيا
استانا:

مينيستر پوليسيانىڭ ولىمىنە قاتىستى تۇسىنىكتەمە بەردى

فوتو: Спутник Қазақстан

كەشە الماتىدا پوليسيا قىزمەتكەرى ٴوز ارىپتەسىنە وق اتقان. سالدارىنان جاراقات العان ٴتارتىپ ساقشىسى قايتىس بولدى. بۇل اقپاراتتى ٴىىم رەسمي وكىلى الماس سادۋبايەۆ راستاعان. بۇگىن ىشكى ىستەر ٴمينيسترى قالمۇحانبەت قاسىموۆ اتالعان وقيعا بويىنشا تۇسىنىكتەمە بەردى، دەپ حابارلايدى baq.kz ٴتىلشىسى.

«كۇدىكتى كەزەكشىلىككە كەلىپ، قارۋ العان. ول قىزمەتتىك كولىكتى الۋ ٴۇشىن گاراجعا بارعان ساتتە وعان تۋىسىن كەلگەن. ياعني – ونىڭ اپكەسىنىڭ كۇيەۋى. ول جۇبايىمەن 6 اي بىرگە تۇرماعان. ۇيىنەن كەتىپ قالعان. ولاردىڭ ٴۇش بالاسى بولعان. كەزەكشىلىكتى تاپسىرۋعا كەلگەندە ەكى پوليسيا قىزمەتكەرى اراسىندا (جوعارىدا اتالعان – اۆتور) سەبەپتەرگە بايلانىستى جانجال تۋىنداعان. سالدارىنان وق اتىلعان. زارداپ شەگۋشى 21:00-دە قازا تاپتى»، - دەدى مينيستر سەنات كۋلۋارىندا.

ونىڭ ايتۋىنشا، قازىرگى تاڭدا تىركەلگەن فاكتى بويىنشا تەرگەۋ جۇرگىزىلۋدە.

«ادام ٴولتىرۋ» بابى بويىنشا قىلمىستىق ٴىس قوزعالدى. سونداي-اق قاۋىپسىزدىك دەپارتامەنتى دە تىركەلگەن فاكتى بويىنشا تەرگەۋدى باستادى. قالعان اقپاراتتى تەرگەۋ اياقتالعان سوڭ حابارلايمىز. وقيعانىڭ ٴمان-جايى قىلمىستىق تەكسەرىس بارىسىندا انىقتالادى»، - دەدى قالمۇحانبەت قاسىموۆ.

سونداي-اق مينيستر قوس پوليسيانىڭ جۇمىسقا ٴتيىستى تەكسەرىستەن وتكەننەن كەيىن عانا قابىلدانعانىن اتاپ ٴوتتى.

«ولار پسيحولوگ جانە پوليگرافتىڭ تەكسەرىسىنەن وتەدى. مۇنىڭ بارلىعى بىزدە بار»، - دەدى ول.

ايتا كەتەيىك، قايعىلى وقيعا الماتىداعى جەرگىلىكتى پوليسيا قىزمەتىنىڭ اۋماعىندا بولعان. قوس پوليسيا قىزمەتكەرى بىر-بىرىنە تۋىس بولىپ كەلگەن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي