قىزىلوردا قالاسىندا 4 ادامنىڭ ٴومىرىن قيعان جول اپاتىنا قاتىستى جاڭا دەرەكتەر پايدا بولدى، دەپ حابارلايدى baq.kz ايماقتاعى ٴتىلشىسى.
استانا: 
5445 
0
قىزىلوردا قالاسىندا 4 ادامنىڭ ٴومىرىن قيعان جول اپاتىنا قاتىستى جاڭا دەرەكتەر پايدا بولدى، دەپ حابارلايدى baq.kz ايماقتاعى ٴتىلشىسى.
وقىس وقيعا 1 قازاندا ساعات 19-00 شاماسىندا تۇڭعىش پرەزيدەنت ساياباعى ماڭىندا ورىن العان. سونىڭ سالدارىنان 3 ادام وقيعا بولعان جەردە قايتىس بولسا، اۋىر جاراقاتتانعان تاعى ٴبىر ادام اۋرۋحانادا كوز جۇمدى.
قىزىلوردا وبلىستىق ىشكى ىستەر دەپارتامەنتى جەرگىلىكتى پوليسيا قىزمەتىنىڭ باستىعى باۋىرجان يبرايەۆتىڭ ايتۋىنشا، «ۆاز-2115» اۆتوكولىگى اۋەجاي باعىتىمەن كەلە جاتىپ سۇلتان بەيبارىس كوشەسى مەن اۋەجاي تراسساسى اۋماعىندا «باتىس قىتاي-باتىس ەۋروپا» تاسجولىنان قىزىلورداعا قاراي كەلە جاتقان «snacman» جۇك كولىگى جانە «وپەل-ۆەكترا» اۆتوكولىكتەرىمەن سوقتىعىسقان.
«وقيعا سالدارىنان «ۆاز-2115» كولىگىنىڭ جۇرگىزۋشىسى مەن وسى كولىكتەگى ەكى جولاۋشى سول جەردە قايتىس بولسا، اۋىر جاراقاتتانعان ەكەۋى وبلىستىق مەديسينا ورتالىعىنا جەتكىزىلدى. الايدا، سونىڭ بىرەۋى مەديسينالىق مەكەمەدە دۇنيە سالدى. «وپەل-ۆەكترا» كولىگىندەگى 4 جولاۋشى وبلىستىق مەديسينا ورتالىعىنىڭ قابىلداۋ بولىمىندە دارىگەرلەرگە تەكسەرىلدى جانە ولار ۇيلەرىنە قايتارىلدى. مۇنداي ادام ولىمىنە اكەلگەن جول اپاتى بيىلدىققا ٴبىرىنشى رەت بولىپ وتىر»، – دەدى باۋىرجان يبرايەۆ.
ال قالالىق ٴىىب جەرگىلىكتى پوليسيا قىزمەتى باستىعىنىڭ ورىنباسارى رۋسلان شاعىربايدىڭ ايتۋىنشا، قايتىس بولعان ادامداردىڭ ٴ3-ۋى ەر ازامات بولسا، ٴ1-ۋى ايەل. قازا تاپقان اسكەريلەر قر قورعانىس مينيسترلىگىنىڭ اسكەري بولىمىندە قىزمەت ەتەدى.
«قايتىس بولعان ادامدار 25-30 جاستاعى ازاماتتار. ال جول اپاتىنا قاتىسى بار جۇك كولىگىنىڭ جۇرگىزۋشىسىنە بۇرىن اكىمشىلىك جازا تاعايىندالماعان. ول ماس ەمەس. تاجىريبەلى جۇرگىزۋشى جانە قىزىلوردا قالاسىنىڭ تۇرعىنى. جاسى قىرىقتىڭ ۇستىنە شىققان. قالعان دەرەكتەر تەرگەۋ بارىسىندا انىقتالاتىن بولادى»، – دەدى رۋسلان شاعىرباي.
سونداي-اق، بۇگىندە سول قيىلىسقا باعدارشام ورناتۋ ماسەلەسى شەشىلۋدە.
ەستەرىڭىزگە سالا كەتەيىك، بۇعان دەيىن قىزىلوردادا جۇك كولىگى مەن جەڭىل كولىكتىڭ سوقتىعىسقانى تۋرالى حابارلاعان بولاتىنبىز.
ۆيدەو: الەۋمەتتىك جەلىدەن الىنعان
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5528
0