باس كولىك پروكۋراتۋراسى شاعىن اۆياسيادا كوپتەگەن زاڭ بۇزۋشىلىقتى انىقتادى - وقيعا|26 قىركۇيەك 2018، 20:48
كۋرسى ۆاليۋت وبنوۆليايۋتسيا
استانا:

باس كولىك پروكۋراتۋراسى شاعىن اۆياسيادا كوپتەگەن زاڭ بۇزۋشىلىقتى انىقتادى

فوتو: ашық дереккөзден

باس كولىك پروكۋراتۋراسى شاعىن اۆياسيا سۋبەكتىلەرىنە تەكسەرۋ جۇرگىزدى، دەپ حابارلايدى baq.kz اقپارات اگەنتتىگى.

ازاماتتىق اۆياسيا كوميتەتىنىڭ قىزمەتكەرلەرى مەن تاۋەلسىز ماماندار (اۆياتورلار) تارتىلعان تەكسەرۋ ناتيجەسىندە، كوپتەگەن بۇزۋشىلىقتار، ونىڭ ىشىندە ۇشۋ قاۋىپسىزدىگىنە اسەر ەتەتىن بۇزۋشىلىقتار انىقتالدى.

اتاپ ايتقاندا، الماتى جانە قوستاناي وبلىستارىنىڭ اۋماعىندا «ان-2» اۋە كەمەلەرىن پايدالاناتىن اۆياكومپانيالار ولاردىڭ پلانەرىنە، قوزعالتقىشىنا جانە اۋە بۇراندالارىنا تەحنيكالىق قىزمەت كورسەتۋ مەن جوندەۋ جۇمىستاردىڭ جوسپارلى تۇرلەرىن جۇرگىزبەگەن. وعان قوسا اۆياتەحنيكانى جوندەۋگە جۇمسالاتىن قارجىنى ۇنەمدەۋ ماقساتىندا ۇشۋ ساعاتتارى تومەندەتىلگەن.

«قاراعاندى وبلىسىندا وقۋ-جاتتىعۋ ۇشۋىنا ارنالعان «fk14 polaris» اۋە كەمەلەرى تيپتىك ەمەس اۋە بۇراندالارىمەن پايدالانىلعان. الماتى اۋەكومپانياسى ٴتۇپنۇسقاسى راستالماعان اۋە كەمەلەرىنىڭ اگرەگاتتارى مەن جيىنتىقتاۋشى بۇيىمدارىن پايدالانعان. قوستاناي وبلىسىنىڭ اۋە كەمەلەرىنە تەحنيكالىق قىزمەت كورسەتۋدى ۋاكىلەتتى مەملەكەتتىك ورگاننىڭ ٴتيىستى رۇقساتى جوق ماماندار جۇرگىزگەن»، - دەپ تولىقتىرىلعان حابارلامادا.

سونىمەن قاتار، الماتى وبلىسىنداعى اۋەكومپانيانىڭ ۇشقىشتارى مىندەتتى ۇشار الدىنداعى مەديسينالىق تەكسەرۋدەن وتكىزىلمەگەن. قوستاناي وبلىسىندا بولسا، بەلگىلەنگەن جۇمىس جانە ۇشۋ ۋاقىتىنىڭ نورماسىنان ارتىق ۇشۋلاردى ورىنداعان.

«سەرتيفيكاتتاۋ راسىمىنەن ٴوتۋ كەزىندە اۋە كەمەلەرىنىڭ پلانەرىنە (1 بىرلىك)، قوزعالتقىشىنا (2 بىرلىك) جانە ۆينتىنە (50 بىرلىك) كۇردەلى جوندەۋ جۇرگىزۋ تۋرالى جالعان قۇجاتتاردى پايدالانۋشىلاردىڭ 53 فاكتىسى انىقتالدى. بۇل تۇرعىدا باس كولىك پروكۋراتۋراسى ينۆەستيسيالار جانە دامۋ مينيسترلىگىنە زاڭبۇزۋشىلىقتى جويۋ تۋرالى ۇسىنىس ەنگىزدى. جالعان قۇجاتتاردى پايدالانۋ تۋرالى ماتەريالدار سوتقا دەيىنگى تەرگەۋ جۇرگىزۋ ٴۇشىن كولىكتەگى ىشكى ىستەر ورگاندارىنا جولداندى»، - دەلىنگەن حابارلامادا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي