«ارسەلورميتتال تەمىرتاۋ» كاسىپورنىنداعى ٴورتتىڭ قايدان شىققانى بەلگىلى بولدى

فوتو: ашық дереккөзден

قاراعاندى، baq.kz ٴتىلشىسى. «ارسەلورميتتال تەمىرتاۋ» مەتاللۋرگيالىق كومبيناتىندا گاز قۇبىرىنىڭ بۇزىلۋى ناتيجەسىندە بولعان ٴورتتىڭ سەبەپتەرى مەن توتەنشە جاعدايدان زارداپ شەككەندەردىڭ جاعدايى جايلى كومپانيانىڭ اتقارۋشى ديرەكتورى ۆاديم باسين جۋرناليستەرگە بەرگەن سۇحباتىندا ايتتى.

10 قاراشا كۇنى كەشكە تەمىرتاۋداعى «ارسەلورميتتال تەمىرتاۋ» مەتاللۋرگيالىق كومبيناتىنىڭ كونۆەرتورلىق سەxىنىڭ سىرتقى جاعىنداعى گاز قۇبىرىندا جالىنداۋ ورىن العان بولاتىن. «ارسەلورميتتال تەمىرتاۋ» كومپانياسى ٴوندىرىس ورنىندا بولعان اپاتقا گيدراۆليكالىق سوققى سەبەپ بولۋى مۇمكىن دەپ وتىر.

«ساراپتامالاردىڭ قورىتىندىسى كوميسسيانىڭ جۇمىسى ٴۇشىن قوسىمشا ۋاقىت قاجەت بولماعان جاعدايدا ون تاۋلىكتەن كەيىن بەلگىلى بولىپ، جاريالانادى. اپاتقا گيدراۆليكالىق سوققى سەبەپ بولۋى مۇمكىن. اپات سالدارىنان وتتەگى، ازوت قۇبىرى، سۋ قۇبىرى، سۇيىتىلعان گاز قۇبىرى جانە سىعىلعان اۋا قۇبىرى زاقىمداندى. قىزمەتكەرلەردىڭ قاۋىپسىزدىگىن قامتاماسىز ەتۋ جونىندە شارالار ۋاقىتىلى قابىلداندى، جاعدايدى باعالاۋ جۇرگىزىلدى جانە زاۋىتتىڭ قالىپتى جۇمىسىن قامتاماسىز ەتۋ ٴۇشىن قاجەتتى شارالار جاسالدى. ٴبىز ٴۇشىن ەڭ باستىسى – ورىن العان وقيعانىڭ سەبەبىن ٴتۇسىنۋ جانە بولاشاقتا وسىعان جول بەرمەۋ»، - دەيدى ۆاديم باسين.

ونىڭ ايتۋىنشا، ٴوندىرىستىڭ جۇمىسىن تولىق قالپىنا كەلتىرۋگە شامامەن ٴۇش اپتا ۋاقىت كەتەدى. قالپىنا كەلتىرۋ جۇمىستارىنىڭ جوسپارى، كەستەسى قۇرىلعان. جوندەۋ-قالپىنا كەلتىرۋ جۇمىستارىن جۇرگىزۋ ٴۇشىن كومبينات پەن مەردىگەرلىك ۇيىمداردىڭ ماماندارى، تەحنيكاسى جۇمىلدىرىلدى

قازىرگى ۋاقىتتا كاسىپورىندا №7 اگلوماشيناسى جانە №4 دومنا پەشى، №5 جانە 7 كوكس باتارەيالارى قالىپتى رەجيمدە جۇمىس ىستەپ تۇر. جەو-باس جانە جەو-2 جىلۋ كوزدەرىنىڭ جۇمىسىنا اپات ەشقانداي اسەرىن تيگىزبەگەن.

«جارىلىس بولدى دەگەن اقپارات تارادى. كاسىپورىندا جارىلىس بولعان جوق، بۇل گيدروديناميكالىق سوققى بولاتىن. سونىڭ اسەرىنەن جاقىن جەردەگى گاز قۇبىرلارىنا زاقىم كەلىپ، ٴورت شىقتى. گاز جىبەرۋ توقتاتىلعاننان كەيىن جالىن ٴسوندىرىلدى. توتەنشە وقيعا ورىن العان ۋاقىتتا جاقىن جەردە تۇرعان بەس ادام ازداعان جاراقات الدى. قازىرگى ۋاقىتتا ولاردىڭ ۇشەۋى ەڭبەككە جارامسىزدىق دەمالىسىندا. ەكەۋى باس جاراقاتىن السا، بىرەۋىنىڭ وڭ قولىندا كىشكەنتاي ساۋساعى سىنعان. ەشكىم اۋرۋحاناعا جاتقان جوق. اپات سەبەپتەرىن انىقتاۋ ٴۇشىن ارنايى كوميسسيا قۇرىلدى، ونى قر ينۆەستيسيالار جانە دامۋ مينيسترلىگى يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ ٴتوراعاسى باسقارادى. قازىرگى ۋاقىتتا ٴۇش باعىت بويىنشا جۇمىستار جۇرگىزىلۋدە. ٴبىرىنشىسى – اپات سەبەپتەرىن تەكسەرۋ، ەكىنشىسى - زاۋىتتىڭ قىسقى ۋاقىتتا قالىپتى جۇمىس ىستەۋىن قامتاماسىز ەتۋ، ٴۇشىنشى – قالىپتى جۇمىس رەجيمىنە كوشۋ ٴۇشىن قۇبىرلاردى قالپىنا كەلتىرۋ»، - دەيدى كومپانيانىڭ وكىلى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!