الماتى وبلىسىندا كولىك ۇرلاۋمەن اينالىسىپ كەلگەن قىلمىسكەر ۇستالدى

تالدىقورعان، baq.kz. الماتى وبلىسىنىڭ پوليسەيلەرى كولىك ۇرلادى دەگەن كۇدىكپەن 39 جاستاعى وبلىس تۇرعىنىن ۇستادى.

"كۇدىكتى ازاماتتىڭ بۇعان دەيىن دە كولىك ۇرلاعانى انىقتالدى" - دەلىنگەن الماتى وبلىسى پوليسيا دەپارتامەنتىنىڭ ٴباسپاسوز قىزمەتى تاراتقان حابارلامادا.

پانفيلوۆ اۋدانىنىڭ ورتالىعىنداعى كوپ قاباتتى ۇيلەردىڭ اۋلاسىنان «مازدا» ماركالى كولىكتىڭ ۇرلانۋ دەرەگى بويىنشا ٴتارتىپ ساقشىلارىنىڭ جەدەل-ىزدەستىرۋ شارالارى بارىسىندا جەرگىلىكتى تۇرعىن قىلمىسقا قاتىسى بار دەگەن كۇدىككە ٴىلىندى. قىلمىستى اشۋعا باعىتتالعان ٴتيىستى شارالار كەزىندە كۇدىكتى انىقتالىپ، ونىڭ تۇرعىلىقتى مەكەنجايىنان ايعاقزاتتار تابىلدى.

«كولىك ۇرلىعىنا قاتىسى بار دەگەن كۇدىكپەن پانفيلوۆ اۋدانىنىڭ 39 جاستاعى ازاماتى ۇستالدى. سونداي-اق، تەكسەرۋ بارىسىندا كۇدىكتىنىڭ بيىل تامىز ايىندا بولعان «ۆاز-2109» كولىگىنىڭ ۇرلىعىنا قاتىسى بار ەكەنى انىقتالدى. كۇدىكتىنىڭ ۇيىنەن ۇرلانعان كولىكتەردىڭ قوسالقى بولشەكتەرى، مەملەكەتتىك تىركەۋ نومىرلەرى تابىلىپ، تاركىلەندى. كۇدىكتىگە قاتىستى بۇلتارتپاۋ شاراسى رەتىندە ەشقايدا كەتپەۋ جانە ٴتيىستى مىنەز-قۇلقى تۋرالى قولحات الىندى»،- دەپ اتاپ ٴوتتى وبلىستىق پوليسيا وكىلدەرى.

سونىمەن قاتار، پوليسەيلەر تاراتقان اقپاراتقا سايكەس، وسى كۇنى جامبىل اۋدانى ٴتارتىپ ساقشىلارى دا اۋدان تۇرعىنىنىڭ «ميتسۋبيسي» اۆتوكولىگىن ۇپتەپ كەتكەن 47 جاستاعى جەرگىلىكتى تۇرعىندى قۇرىقتادى. كۇدىكتى اۋداندىق ۋاقىتشا ۇستاۋ وقشاۋلاعىشىنا قاماققا الىندى. قازىرگى تاڭدا كۇدىكتىلەردىڭ وزگە دە قىلمىستارعا قاتىسى انىقتالۋدا. كولىك ۇرلىعىنا قاتىستى قىلمىستىق ٴوندىرىس قر قىلمىستىق كودەكسىنىڭ 200-بابىنا سايكەس جۇرگىزىلىپ جاتىر.

«وڭىردە اۆتوكولىكتەردى ۇرلاۋ قىلمىستارىن اشۋ جانە ولاردىڭ الدىن الۋعا باعىتتالعان شارالار ۇنەمى جۇرگىزىلەدى. بيىل جىل باسىنان بەرى الماتى وبلىسىنىڭ پوليسەيلەرى قولدى بولعان 220 استام تەمىر تۇلپاردى تاۋىپ، ولاردى زاڭدى يەلەرىنە قايتاردى»،- دەپ اتاپ ٴوتتى وڭىردەگى ىزدەستىرۋ بولىمشەسىنىڭ باستىعى پوليسيا پودپولكوۆنيگى ە. كارىبايەۆ.

تەگي
• قىلمىس
• الماتى وبلىسى

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!