جولداۋدىڭ قوس ٴبولىمى ٴبىزدىڭ سالاعا ناقتى تاپسىرمالار جۇكتەيدى – م. تۇسىپبەكوۆ

استانا. 17 قاراشا. baq.kz – بۇگىن قر پرەزيدەنتى جانىنداعى ورتالىق كوممۋنيكاسيالار قىزمەتىنىڭ الاڭىندا ەلىمىزدىڭ تەحنيكالىق ينتەليگەنسيا وكىلدەرى مەملەكەت باسشىسى ن. نازاربايەۆتىڭ حالىققا ارناعان «نۇرلى جول» - بولاشاققا باستار جول» اتتى جولداۋىن ٴاقپاراتتىق-تۇسىندىرۋ جۇمىستارىنا ورايلاستىرىلىپ ۇيىمداستىرىلعان ٴباسپاسوز ٴماسليحاتىنا قاتىستى، - دەپ حابارلايدى baq.kz ٴتىلشىسى. 

بريفينگكە قاتىسقان تەحنيكا عىلىمىنىڭ دوكتورى، ق. ساتپايەۆ اتىنداعى قازاق ۇلتتىق ۋنيۆەرسيتەتىنىڭ پروفەسسورى ماحاببات تۇسىپبەكوۆ مەملەكەت باسشىسىنىڭ جولداۋىنا وراي ٴوزىنىڭ پىكىرىن بىلاي ٴبىلدىردى.

- مەن ٴوزىم ماشينا جاساۋ سالاسىنىڭ مامانىمىن. ال ەلباسىمىزدىڭ «نۇرلى جول - بولاشاققا باستار جول» اتتى جاڭا ەكونوميكالىق ساياساتىنىڭ ٴدال وسى سالامەن تىعىز بايلانىستى ەكەنى بايقالادى. بۇل جولداۋدىڭ ٴبىرىنشى ٴبولىمىنىڭ ٴوزى كولىك-لوگيستيكاسى ينفراقۇرىلىمىن جاڭارتۋ تۋرالى بولىپ كەلەدى. ەندەشە، وسى جوبا اياسىندا سالىناتىن قۇرىلىس نىساندارىنىڭ عاسىرلار بويى ەل يگىلىگىنە جۇمىس ىستەيتىندىگىنە سەنىمدىمىن. اتاپ ايتسام، مىسالى «باتىس ەۋروپا – باتىس قىتاي» ٴدالىزى مەن «استانا – وسكەمەن»، «استانا - اقتوبە»، «الماتى – وسكەمەن»، «قاراعاندى – جەزقازعان» «قىزىلوردا – اتىراۋ – استاراحان» سىندى جولداردى جاڭارتىپ، كەڭەيتۋ جايىندا ناقتى تاپسىرمالار جۇكتەلگەن. سونىمەن قاتار، جولداۋدا ايتىلعان وسى ٴبولىم مەن التىنشى ٴبولىم اراسىنداعى مالىمدەمەلەر ٴبىزدىڭ سالاعا تىكەلەي قاتىستى بولعاندىقتان، بىزدەرگە ناقتى تاپسىرمالار جۇكتەيدى دەپ ويلايمىن. ياعني، مامان دايارلاۋ ٴىسى بويىنشا. ەنگدەشە، ەلىمىزدە كولىك جوندەيتىن كاسىپورىنداردى كوپتەپ اشۋىمىز قاجەت. سوعان سايكەس ماماندىق يەلەرىن دايىنداۋ ىسىنە دە جەتە كوڭىل بولگەن ٴجون. الداعى ۋاقىتتا 10 جوعارى وقۋ ورنىنا قارجى ٴبولىنىپ، ينجەنەر ماماندارىن دايىنداۋ ٴىسى قولعا الىنعالى وتىر. دەمەك، ماشينا جاساۋ سالاسى ماماندارىنىڭ جولدارى اشىلادى دەگەن ٴسوز، - دەيدى ماحاببات رىمقۇل ۇلى.

ونىڭ اتاپ وتۋىنشە، قازاقستان پرەزيدەنتى ٴوز جولداۋىندا جول قۇرىلىسى سالاسىنا زور كوڭىل ٴبولدى. ال وسى سالاعا قاجەتتى كولىكتەردى جوندەيتىن كاسىپورىندار ەلىمىزدە از.

نۇرلىبەك دوسىباي
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!