جولداۋ كوڭىلدەرگە سەنىمدىلىك ۇيالاتتى – ج. احمەتبەكوۆ

استانا. 15 قاراشا. baq.kz – بۇگىن قر پرەزيدەنتى جانىنداعى ورتالىق كوممۋنيكاسيالار قىزمەتىنىڭ الاڭىندا ٴماجىلىس دەپۋتاتتارىنىڭ قاتىسۋىمەن وتكەن ەلباسىنىڭ «نۇرلى جول» - بولاشاققا باستار جول» جولداۋىن ٴاقپاراتتىق-تۇسىندىرۋ جۇمىستارىنا وراي ۇيىمداستىرىلعان ٴباسپاسوز ٴماسليحاتىندا جامبىل احمەتبەكوۆ وسىلاي مالىمدەدى، - دەپ حابارلايدى baq.kz ٴتىلشىسى.  

- 2007 جىلدارداعى جاھاندىق داعدارىس كەزىندە مەملەكەت باسشىسى ەل ەكونوميكاسىن تۇرالاتپاي، امان الىپ شىعۋ ٴۇشىن ۇلتتىق قوردان 10 ملرد تەڭگەگە جۋىق قاراجات بولدىرگەنى بەلگىلى. سونىمەن قاتار، ول وتە ناتيجەلى دە بولدى. ال ەندى ەلباسىنىڭ كەشەگى جولداۋىندا مۇنداي ماسەلە تاعى دا ايتىلعان. ياعني، بۇل جولى ۇلتتىق قوردان 100 ملرد تەڭگە ٴبولىپ، ەل كاسىپكەرلەرىن قولداۋ ارقىلى داعدارىستان ەلدى كۇيرەتپەي، ەكونوميكانى قۇلدىراتپاي امان الىپ شىعۋعا الدىن الا قامدانۋ كەرەكتىگىنە كوڭىل بولىنگەن. نۇرسۇلتان ٴابىش ۇلىنىڭ ۇكىمەتكە جۇكتەگەن مۇنداي تاپسىرماسى ەل تۇرعىندارىنىڭ كوڭىلىنە زور سەنىمدىلىك ۇيالاتتى دەپ ويلايمىن، - دەدى دەپۋتات.

- ويتكەنى، جولداۋ – ەلباسى ساياساتىنىڭ اشىقتىعى، ەلدىڭ ەكونوميكالىق جانە الەۋمەتتىك دامۋىنىڭ داڭعىل جولى. پرەزيدەنت ٴاربىر ازاماتتى جۇمىسپەن قامتۋ ارقىلى ەل ەكونوميكاسىن جاقسارتۋ ساياساتىن جالعاستىرا تۇسۋدە، - دەيدى جامبىل اۋجان ۇلى.

نۇرلىبەك دوسىباي،
سۋرەتتى تۇسىرگەن – ازات ەسەمبەكوۆ
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!