جولداۋ ٴبىلىم سالاسىنداعى ماسەلەلەردى تۇپكىلىكتى شەشەدى

استانا. 14 قاراشا. baq.kz – مەملەكەت باسشىسى ەلدەگى ٴبىلىم سالاسىنا قاتىستى كەيبىر تۇيىندەردى جىل باسىنداعى جولداۋىندا ەرەكشە اتاپ وتكەن بولاتىن. سونداي-اق، بۇل سالاداعى ٴبىرقاتار ماسەلەلەردى شۇعىل شەشۋ كەرەكتىگىن دە نازاردان تىس قالدىرماعان ەدى. اسىرەسە، اپاتتى جاعدايداعى مەكتەپتەر مەن بالالاردىڭ ٴۇش اۋىسىمدا وقۋىن كۇن تارتىبىنەن تۇسىرمەۋ كەرەكتىگىن تىلگە تيەك ەتكەن، - دەيدى وڭتۇستىك قازاقستان وبلىستىق ٴبىلىم باسقارماسىنىڭ جەتەكشىسى البينا ەلشىبەۆا.

- وسى رەتتە ٴبىزدىڭ باسقارما وبلىس اكىمدىگى مەن ٴبىلىم جانە عىلىم مينيسترلىگى وكىلدەرىمەن كەڭەسە وتىرىپ، ەلباسى اتاپ كورستەكەن ماسەلەلەر ٴتۇيىنىن تارقاتۋمەن تياناقتى اينالىسىپ كەلەدى. سونىڭ ناتيجەسىندە، بۇگىنگى تاڭدا وڭىردەگى 48 اپاتتى جاعدايدا تۇرعان مەكتەپتىڭ 32-سىندە قۇرىلىس جۇمىستارى جۇرگىزىلۋدە. ال 10 مەكتەپتىڭ قۇرىلىسى 2015 جىلى قولعا الىنادى دەپ جوسپارلانعان. قالعان التى مەكتەپكە قۇرىلىس جۇمىسىن جۇرگىزۋ ٴۇشىن قۇجاتتارى ازىرلەنۋ ۇستىندە. سونىمەن قاتار، وبلىسىمىزدىڭ 21 مەكتەبىندە ٴۇش اۋىسىمدىق نەگىزدە ساباق جۇرگىزىلەدى. ونىڭ تورتەۋىنە قوسىمشا عيماراتتار سالىنىپ، ولار جىل سوڭىنا دەيىن پايدالانۋعا بەرىلەدى دەپ كۇتىلۋدە. وسىنداي تاعى ٴۇش قۇرىلىس نىسانى كەلەسى جىلى قولدانىلاتىن بولادى، - دەيدى باسقارما جەتەكشىسى.

ونىڭ ايتۋىنشا، اعىمداعى جىلدا 115 ٴبىلىم مەكەمەسىندە قۇرىلىس جۇمىستارى جۇزەگە اسىرىلعان. وسى ماقساتقا 26،9 ملرد تەڭگە قارجى بولىنگەن بولسا، ونىڭ 14 ملرد تەڭگەگە جۋىعى وبلىستىق بيۋدجەتتەن بولىنگەن كورىنەدى.

- ەلباسىنىڭ جاڭا ەكونوميكاداعى جاڭا ساياسات اتاۋىمەن حالىققا ارناعان «نۇرلى جول» جولداۋىندا جوعارىدا اتالعان ماسەلەلەردى تۇپكىلىكتى شەشۋدىڭ ناقتى جولدارى كورسەتىلگەن. ٴتىپتى، وسى باعىتتا جۇمسالۋى ٴتيىس قاراجات كولەمىن دە ەلباسىمىزدىڭ ٴوزى اتاپ كورسەتتى. ياعني، ٴۇش اۋىسىمدىق مەكتەپ پەن اپاتتى جاعدايداعى مەكتەپتەر ماسەلەسىن شەشۋ ٴۇشىن 70 ملرد تەڭگە باعىتتاۋ كەرەكتىگىن ايتتى. ال وبلىسىمىزدىڭ مەكتەپ قابىرعاسىنداعى بالالارى ٴۇشىن ورىن تاپشىلىعىن جويۋ مەن وعان قاتىستى جۇمىستاردى وڭتايلى ۇيىمداستىرۋعا 20 ملرد تەڭگە باعىتتاۋ ارقىلى بىزدەر الداعى ٴۇش جىل ىشىندە بۇل ماسەلەنىڭ ٴتۇيىنىن تۇپكىلىكتى شەشەتىن بولامىز، - دەيدى ٴبىلىم سالاسىنىڭ بىلىكتى مامانى.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!