BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تۇركىستان وبلىسىندا «نۇرلى جول» باعدارلاماسىمەن جول جوندەلدى

فوتو: 1news.zp.ua

استانا، baq.kz. تۇركىستان وبلىسىندا بيىل مەملەكەتتىك «نۇرلى جول» باعدارلاماسىمەن 165،1 شاقىرىم جول جالپى جوندەۋدەن وتكەن. بۇل تۋرالى 24kz سايتى حابارلايدى.

وعان رەسپۋبليكالىق بيۋدجەت ەسەبىنەن 3 ميلليارد 400 ميلليون تەڭگە قارجى بولىنگەن. ال كەلەر جىلى وڭىردە «نۇرلى جول» باعدارلاماسى شەڭبەرىندە 300 شاقىرىمنان استام وبلىستىق ماڭىزى بار اۆتوموبيل جولدارىنا جوندەۋ جۇمىستارىن جاساۋ جوسپارلانۋدا. وعان ەلىمىزدىڭ قازىناسىنان 7 ميلليارد 528 ميلليون تەڭگە قارالىپ وتىر. ٴقازىر باعدارلاما اياسىندا وبلىستىڭ بىرنەشە اۋداندارىندا كۇردەلى جوندەۋ، ورتا جوندەۋ جانە جولدى قايتا قالپىنا كەلتىرۋ جۇمىستارى قارقىن العان. ماسەلەن، سايرام اۋدانى مەن شىمكەنت قالاسىن بايلانىستىراتىن 9 شاقىرىمدىق اۆتوموبيل جولىنىڭ قۇرىلىسىن مەردىگەر مەكەمە وسى جىلدىڭ ٴساۋىر ايىندا باستاعان. الداعى 2020 جىلى تولىق اياقتاپ قولدانىسقا تاپسىراتىن بولادى.

ماماندار اتالعان جولدىڭ ەنى 5 مەترگە ۇزارعانىن ايتادى. بۇرىن مۇندا قاراما-قارسى باعىتتا ەكى كولىك وتسە، ەندى 4 كولىك قاتار جۇرە الادى.

«2،6 شاقىرىم جولدىڭ ٴبىرىنشى قاباتى توسەلگەن. كەلەسى جىلعا دا ىستەلەتىن جۇمىستار بار. تەمىرجول وتكەلى دە تۇر. ونى ٴبىز كەلەر جىلعا جوسپارلاپ جاتىرمىز»، - دەدى سەرىكتەستىك باسشىسىنىڭ ورىنباسارى ٴابجات اكىموۆ.

«نۇرلى جول» مەملەكەتتىك باعدارلاما اياسىندا جولدارعا رەسپۋبليكالىق بيۋدجەتتەن 3،4 ميلليارد تەڭگە ٴبولىنىپ، 165 شاقىرىم اۆتوموبيل جولدارىنا قايتا جاڭارتۋ، كۇردەلى جوندەۋ، ورتاشا جوندەۋ جۇمىستارى جۇرگىزىلىپ جاتىر.

«ٴبىز ٴبىرىنشى كەزەكتە وبلىس ورتالىعىن جانە دە تۋريزم نىساندارىنا باراتىن جولداردى جوندەپ جاتىرمىز. سايرام اۋدانىندا 2 جولىمىزدا قايتا جاڭارتۋ جۇمىستارى ٴجۇرىپ جاتىر جانە تۇلكىباس اۋدانىندا تۇلكىباس ستانساسىنان ت.رىسقۇلوۆ اۋىلىنا باراتىن جولدى دا جاڭارتىپ جاتىرمىز»، - دەيدى وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى روللان يبراگيموۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي