شيەلى تۇرعىندارى كوگىلدىر وتىنمەن قامتىلدى (فوتو)

استانا. 15 قازان. baq.kz – ۇلتتىق وپەراتور «قازترانسگاز» اق-نىڭ «قىزىلوردا وبلىسىنىڭ 5 ەلدى-مەكەنىن گازداندىرۋ» ينۆەستيسيالىق جوباسى اياسىندا «شيەلى» اۆتوماتتاندىرىلعان گاز تاراتۋ ستانسياسى ىسكە قوسىلدى. بۇل جايىندا كومپانيانىڭ ٴباسپاسوز قىزمەتى حابارلاپ وتىر. 

سالتاناتتى شاراعا قىزىلوردا وبلىسىنىڭ اكىمى قىرىمبەك كوشەربايەۆ پەن «قازترانسگاز» اق باس ديرەكتورىنىڭ ٴبىرىنشى ورىنباسارى سەرىك ەستاي قاتىستى.

ەلدىمەكەنگە گاز قۇبىرى «بەينەۋ-بوزوي-شىمكەنت» ماگيسترالىنەن تارتىلعان، ۇزىندىعى - 17 شاقىرىم. سونىمەن قاتار، 270 شاقىرىم بولاتىن اۋىلىشىلىك قۇبىر تارتىلعان. ناتيجەسىندە 30 مىڭنان استام تۇرعىنىن، ونىڭ ىشىندە 6 جارىم مىڭ جەكە تۇرعىن ٴۇي، 84 كوپپاتەرلى ٴۇي، 74 كوممۋنالدىق-تۇرمىستىق كاسىپورىن كوگىلدىر وتىنمەن قامتاماسىز ەتىلدى.

«قازترانسگاز» اق باس ديرەكتورىنىڭ ٴبىرىنشى ورىنباسارى سەرىك ەستايدىڭ ايتۋىنشا، جىل سايىن ۇلتتىق وپەراتور رەسپۋبليكا بويىنشا 35 مىڭنان استام ابونەنتتىڭ ۇيىنە گاز كىرگىزگەن. جۇزەگە اسىرىلىپ جاتقان ينۆەستيسيالىق جوبا اياسىندا ٴبىر عانا قىزىلوردا وبلىسىندا بيىل 1250 كم گاز قۇبىرى سالىنىپتى.

ەستەرىڭىزگە سالا كەتەيىك، وتكەن اپتانىڭ سوڭىندا كومپانيا جاڭاقورعان كەنتىن كوگىلدىر وتىنعا قوسقان بولاتىن. الداعى ۋاقىتتا ايتەكە بي اۋىلى مەن ارال قالاسىنىڭ تۇرعىندارى دا تابيعي گازعا قول جەتكىزەدى دەپ جوسپارلانىپ وتىر. «قىزىلوردا وبلىسىنىڭ 5 ەلدىمەكەنىن گازداندىرۋ» ينۆەستيسيالىق جوباسى جىل سوڭىندا بايقوڭىر قالاسىن گازداندىرعاننان كەيىن اياقتالادى دەپ كۇتىلۋدە.

جالپى، جوبا اياسىندا قىزىلوردا وبلىسىنىڭ 190 مىڭ تۇرعىنى كوگىلدىر وتىنعا قوسىلادى. وسى ۋاقىتقا دەيىن 1439 كم گاز قۇبىرى تارتىلىپ، 81 گاز تاراتۋ پۋنكتى، 258 شكافتىق پۋنكتتەر سالىندى. قۇبىرلار مەن ينفراقۇرىلىمدىق نىساندار تۇگەلدەي دەرلىك كەستەدەن ەرتە ىسكە قوسىلىپ جاتقانىن ايتىپ ٴوتۋ كەرەك.  

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!