سەناتورلار «استانا – تەمىرتاۋ» جولىن جاڭعىرتۋ بارىسىمەن تانىستى

استانا. 18 قىركۇيەك. baq.kz – بۇگىن پارلامەنت سەناتى ەكونوميكالىق ساياسات، يننوۆاسيالىق دامۋ جانە كاسىپكەرلىك كوميتەتىنىڭ مۇشەلەرى «نۇرلى جول» مەملەكەتتىك باعدارلاماسىنىڭ اياسىندا سالىنىپ جاتقان استانا – تەمىرتاۋ اۆتوموبيل جولىنىڭ جاڭعىرتىلىپ جاتقان بولىگىنە جۇمىس ساپارىمەن باردى. سەناتورلار قۇرىلىس الاڭدارىندا بولىپ، اقمولا جانە قاراعاندى وبلىستارىنداعى جول قۇرىلىسىنداعى مەردىگەر ۇيىمدارىنىڭ جۇمىسىمەن تانىستى.

اۆتوموبيل جولىنىڭ سالىنىپ جاتقان بولىكتەرىندە بولعان كەزدە اكسيونەرلىك قوعامنىڭ وبلىستىق فيليالدارى مەن مەردىگەر ۇيىمداردىڭ باسشىلارى اتقارىلعان جۇمىستار تۋرالى حاباردار ەتتى. «قازاۆتوجول» ۇلتتىق كومپانياسى» اق باسقارما ٴتوراعاسىنىڭ ورىنباسارى تەمىرحان مەڭدىعاليەۆتىڭ ايتۋىنشا، استانا مەن تەمىرتاۋ اراسىنداعى اۆتوموبيل جولىنداعى جاڭعىرتۋ جۇمىستارى «ەكسپو-2017» كورمەسىنە ورايلاستىرىپ، 2016 جىلدىڭ اياعىندا تولىق اياقتالادى. اۆتوموبيل جولى ٴى تەحنيكالىق سانات كورسەتكىشتەرى بويىنشا سالىنادى جانە 4 جولاققا دەيىن كەڭەيتىلەدى. جول قوزعالىسىنا قاتىسۋشىلاردىڭ قاۋىپسىزدىگى ٴۇشىن اۆتوموبيلدەردىڭ قارسى بەتكە شىعىپ كەتپەۋى ٴۇشىن كەدەرگىلەر ورناتىلادى، ٴسويتىپ جول-كولىك وقيعالارى ەلەۋلى تۇردە ازاياتىن بولادى.
سەناتورلار جانە كومپانيا وكىلدەرى جۇمىس ورىندارىن ساقتاۋ ماسەلەلەرىن دە تالقىلادى. «بارلىق مەردىگەر كومپانيالارمەن ۋاعدالاستىققا قول جەتكىزىلدى، قازىرگى كەزدە ٴبىزدىڭ كومپانيا جەرگىلىكتى اتقارۋشى ورگاندار مەن مەردىگەر ۇيىمدار اراسىندا قول قويۋ ٴۇشىن جۇمىس ورىندارىن ساقتاۋ تۋرالى ٴبىرقاتار مەموراندۋمدار ازىرلەدى»، - دەدى ت.مەڭدىعاليەۆ.
جەرگىلىكتى تۇرعىنداردى جۇمىسپەن قامتۋدى ارتتىرۋ ماقساتىندا مەردىگەر ۇيىمدار جۇمىسقا اۆتوموبيل جولىنا جاقىن جەردەگى ەلدى مەكەندەردىڭ تۇرعىندارىن تارتىپ وتىر.
كەزدەسۋ سوڭىندا «قازاۆتوجول» ۇلتتىق كومپانياسى» اق باسقارما ٴتوراعاسىنىڭ ورىنباسارى اتقارىلاتىن جۇمىستاردىڭ بەلگىلەنگەن كەستەسى مەرزىمىندە ورىندالىپ وتىرعانىن اتاپ ٴوتتى. ول سونداي-اق دەپۋتاتتارعا استانا مەن تەمىرتاۋ اراسىنداعى جاڭا اۆتوموبيل جولىنىڭ ساپاسى بارلىق ستاندارتقا سايكەس كەلەتىنىن ايتتى.
پارلامەنتشىلەر قۇرىلىس جۇمىستارىنىڭ بارىسىنا قاناعاتتانعاندىق ٴبىلدىردى جانە باستالعان جوبالاردى تابىستى اياقتاۋعا تىلەكتەستىگىن جەتكىزدى.
 

فوتو: kapital.kz

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!