«نۇرلى جول» اياسىندا الماتى وبلىسى بويىنشا 6 تۇرعىن ٴۇي سالىنادى

«تۇرعىن ٴۇي قۇرىلىس جيناق بانكى» بۇكىل قىزمەت كەزەڭىندە 110 مىڭ وتانداسىمىزعا باسپانا جاعدايىن جاقسارتۋعا كومەكتەسكەن. بۇگىنگى تاڭدا اتالعان بانكتىڭ الماتى وبلىسى بويىنشا 22 مىڭنان استام سالىمشىسى بار.

ولاردىڭ جالپى جيناقتالعان سوماسى 9 ميللياردتان استام تەڭگەنى قۇراپ وتىر. ۇستىمىزدەگى جىلدان باستاپ 6 مىڭنان جوعارى جاڭا كەلىسىمشارتقا قول قويىلعان. قازىرگى ۋاقىتتا سالىمدار سانى 20 مىڭ بىرلىكتەن اسادى. وتكەن جىلى شامامەن 4 ميلليارد تەڭگە نەسيە بەرىلگەن. بۇل تۋرالى الماتى وبلىستىق وڭىرلىك كوممۋنيكاسيالار قىزمەتىندە وتكەن بريفينگتە «قازاقستاننىڭ تۇرعىن ٴۇي قۇرىلىس جيناق بانكى» اق الماتى وبلىستىق فيليالىنىڭ ديرەكتورى عالىمجان شالعىمبايەۆ ايتتى.

بۇگىنگى تاڭدا «وڭىرلەردى دامىتۋدىڭ 2020 جىلعا دەيىنگى باعدارلاماسى» اياسىندا «بارلىق سانناتتاعى ازاماتتارعا ارنالعان باسپانا» باعىتى بويىنشا جالپى اۋدانى 44،2 مىڭ م2 13 تۇرعىن ٴۇي، ونىڭ ىشىندە 650 پاتەر قولدانۋعا بەرىلگەن، جالپى قۇنى 4 ملرد. 173 ملن. تەڭگەنى قۇرايدى.

ال، «جاس وتباسىلارعا ارنالعان باسپانالار» بويىنشا 8 تۇرعىن ٴۇي، ونىڭ ىشىندە جالپى اۋدانى 26،6 مىڭ م2 بولاتىن 507 پاتەر پايدالانۋعا بەرىلدى. ەندى وسى جىلدىڭ سوڭىنا دەيىن جالپى اۋدانى 6،9 مىڭ م2. 50 پاتەرلىك 2 تۇرعىن ٴۇي پايدالانۋعا ۇسىنىلاتىن كورىنەدى.

سونداي-اق، بيىلعى ينفراقۇرىلىمدىق دامۋدىڭ "نۇرلى جول" باعدارلاماسى بويىنشا كرەديتتىك تۇرعىن ٴۇي قۇرىلىسىنا ارنالعان تۇرعىن ٴۇي قۇرىلىس جيناق جۇيەسىن بارىنشا پايدالانۋ ٴۇشىن قاراجات بولىنگەندىگىن دە اتاپ ٴوتتى. بۇل باعدارلامانىن وزگەشەلىگى، تۇرعىن ٴۇي قۇرىلىسىنا ۇلتتىق قوردان قاراجات تەك ٴبىر رەت قانا بولىنەدى. بانك سالىمشىلارى سالىنعان تۇرعىن ٴۇيدى ساتىپ العاننان كەيىن، بولىنگەن قاراجات ەكى جىل ارالىعىندا قايتا قۇرىلىسقا پايدالانۋعا بەرىلەدى. «نۇرلى جول» باعدارلاماسى بويىنشا سالىناتىن ۇيلەردىڭ 1 شارشى مەترىنىڭ باعاسى شامامەن 140 مىڭ تەڭگە بولماق.

- "نۇرلى جول" اياسىندا 2016-2017 جىلدارى بانك جەلىسى بويىنشا شامامەن 33 جارىم مىڭ شارشى مەتر تۇرعىن ٴۇي ەنگىزۋ جوسپارلانعان. جالپى العاندا 672 پاتەرلى 6 تۇرعىن ٴۇي سالىنادى. 2016-2017 جىلدار كورسەتكىشىن تارازىلار بولساق، بانكتىڭ الماتى وبلىسىمەن ىنتىماقتاستىعىندا ٴوسۋ ديناميكاسى بايقالادى، - دەپ اتاپ ٴوتتى عالىمجان شالعىمبايەۆ.

سالىمشىلاردىڭ وتەماقىسى تۋرالى دا بىرەر ٴسوز. بانك وكىلىنىڭ ايتۋىنشا، ۇستىمىزدەگى جىلدىڭ 1 تامىزىندا وتەماقى تولەۋدىڭ ٴبىرىنشى ترانشى اياقتالعان. ەندى 2017 جىلدىڭ 1 شىلدەسىنە دەيىن ەكىنشى ترانشىنا نۇكتە قويىلماق. 2016 جىلعى تولەۋ كەزىندە بيۋدجەت قاراجاتى ەسەبىنەن - 18،7 ملرد. تەڭگە، ال بانك قارجىسىنان 10،4 ملرد. تەڭگە اۋدارىلعان.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!