«نۇرلى جول» قۇرىلىس سالاسىنىڭ قارقىنىن ارتتىردى

استانا. 9 اقپان. baq.kz – اقتوبە وبلىسىندا جۋىردا عانا جاڭادان ٴىرى 4 كاسىپورىن ىسكە قوسىلدى. ونىڭ ٴبىرى – گاز وڭدەيتىن، ەكىنشىسى – اقتوبەدە رەلس شىعاراتىن زاۋىت بولسا، بۇلارعا مەملەكەت باسشىسى بەكىتىپ بەرگەن «نۇرلى جول» باعدارلاماسى دەم بەردى دەپ نىق سەنىممەن ايتۋعا بولادى.

ايتكەنمەن، دۇنيەجۇزىندە بولىپ جاتقان ەكونوميكالىق داعدارىس وڭىردەگى كاسىپورىندارعا دا ٴوزىنىڭ اسەرىن تيگىزىپ جاتىر. ٴقازىر ٴتيىستى ٴىس-شارالار قولعا الىنۋدا. ارنايى جۇمىس توبى قۇرىلىپ، جىلدىڭ اياعىنا دەيىن جاڭادان تاعى 5 كاسىپورىن ىسكە قوسىلۋى كەرەك. سونىمەن قاتار، 139 ملرد. تەڭگە ينۆەستيسيا جاڭادان قوسىلعان كاسىپورىندارمەن تولىقتىرىلادى دەپ جوسپارلانعان. جاھاندىق داعدارىستىڭ سالدارىنان وڭىردەگى قۇرىلىس سالاسى دا بىلتىرعى كورسەتكىشپەن سالىستىرعاندا تومەندەگەن. سەبەبى، ول ينۆەستيسياعا بايلانىستى. «نۇرلى جول» مەملەكەتتىك باعدارلاماسىنا سايكەس، ٴبىرقاتار قۇرىلىس نىساندارى سوڭعى بىر-ەكى اي توڭىرەگىندە ىسكە قوسىلدى.
ايماقتاعى قۇرىلىس ماسەلەسىنە قاتىستى ايتار بولساق، بۇگىندە 343،7 مىڭ شارشى مەتر تۇرعىن ٴۇي پايدالانۋعا بەرىلگەن. جىل سوڭىنا دەيىن بۇل كورسەتكىش 476 مىڭ شارشى مەتردەن كەم بولمايدى. ناتيجەسىندە 4 700 وتباسىن پاتەرمەن قامتاماسىز ەتىلەدى دەپ كۇتىلۋدە.
جالپى، اقتوبە وبلىسىندا 2015 جىلدىڭ 10 ايىندا قۇرىلىس جۇمىستارىنىڭ ورىندالعان كولەمى 101،1 ملرد. تەڭگەنى قۇراعان. ٴسويتىپ، تۇرعىن ٴۇي قۇرىلىس جيناق جۇيەسى ارقىلى وڭىرلەر اراسىندا اقتوبە وبلىسى 145 مىڭ شارشى مەتر كولەمىمەن ەكىنشى ورىنعا تۇراقتاعان.
مەملەكەت باسشىسىنىڭ تاپسىرماسىنا وراي، وبلىستا يندۋستريالاندىرۋ باعدارلاماسى قالىپتى جۇرگىزىلىپ جاتىر. سونىمەن قاتار، شاعىن جانە ورتا بيزنەستى دامىتۋ شارالارى جۇيەلى تۇردە جۇرگىزىلۋدە. وسىعان دەيىن 8000 بىرلىك شاعىن جانە ورتا بيزنەس سۋبەكتىلەرى اشىلىپ، سونىڭ ارقاسىندا 12 مىڭ جۇمىس ورنى ساقتالىپ، تاعى 4،6 مىڭ جاڭا جۇمىس ورنى پايدا بولدى. قازىرگى تاڭدا كاسىپكەرلىكتى قولداۋ ورتالىعىنىڭ 15 بولىمشەسى مەن 12 بيزنەس-مەكتەپ جانە 1 ينۆەستورلارعا قىزمەت كورسەتۋ ورتالىعى ايماقتا جۇمىس ىستەپ تۇر. ناتيجەسىندە، شاعىن جانە ورتا بيزنەس سۋبەكتىلەرىنىڭ سانى 52 مىڭنان اسىپ، ولاردا قىزمەت ەتەتىن ادامداردىڭ سانى 130 مىڭعا جۋىقتاعان. ال ولاردىڭ وندىرگەن ونىمدەرى 192 ملرد. تەڭگەدەن اسىپ جىعىلدى.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!