«نۇرلى جول» باعدارلاماسى بويىنشا 275 وتباسى باسپانالى بولدى

استانا. 18 قىركۇيەك. baq.kz - «بايتەرەك» حولدينگى قازاقستاندىقتاردى الەۋمەتتىك جالدامالى تۇرعىن ۇيمەن قامتاماسىز ەتۋ باعدارلاماسى شەڭبەرىندە الماتى قالاسى «اقكەنت» شاعىن اۋدانىندا جالپى اۋدانى 19 195 شارشى مەتر 275 پاتەرلىك تۇرعىن ٴۇي كەشەنىن پايدالانۋعا تاپسىرۋدى قامتاماسىز ەتتى 

پاتەر كىلتتەرىن سالتاناتتى تۇردە تاپسىرۋ راسىمىنە الماتى قالاسىنىڭ اكىمى باۋىرجان بايبەك جانە «بايتەرەك» حولدينگىنىڭ باسشىسى قۋاندىق بيشىمبايەۆ قاتىستى.

تۇرعىن ٴۇي كەشەنىندەگى بارلىق پاتەرلەر تازا ارلەنگەن كۇيىندە تاپسىرىلدى جانە قونىس اۋدارۋعا تولىقتاي دايىن.تۇرعىن ٴۇيدىڭ 1 شارشى مەترىنىڭ جالدىق قۇنى 1 120 تەڭگەنى قۇرايدى.
«بۇگىنگى كۇنى ەل پرەزيدەنتىنىڭ تاپسىرماسى بويىنشا قازاقستاننىڭ بارلىق وڭىرىندە قازاقستاندىقتاردىڭ ەڭ ماڭىزدى پروبلەماسى – باسپانا تاپشىلىعى بىرتىڭدەپ شەشىمىن تابۋدا. «بايتەرەك» حولدينگى بۇگىندە اۋقىمدى جۇمىس اتقاردى – الەۋمەتتىك جالدامالى تۇرعىن ٴۇي باعدارلاماسى اياسىندا جىل باسىنان بەرى قازاقستان بويىنشا شامامەن 4 مىڭ پاتەر تاپسىرىلىپ قويدى، جىل سوڭىنا دەيىن تاعى دا 3 مىڭعا جۋىق باسپانا بەرىلەتىن بولادى»، - دەدى جۇما كۇنى الماتىدا كىلتتەردى تابىستاۋ سالتاناتىندا ٴسوز سويلەگەن ق. بيشىمبايەۆ.

الەۋمەتتىك جالدامالى تۇرعىن ٴۇيدى سالۋ مەن ساتىپ الۋعا قازاقستان رەسپۋبليكاسى ۇلتتىق قورىنان 2015 جىلعا 92،5 ملرد. تەڭگە ٴبولىندى. بۇگىنگى تاڭدا «بايتەرەك» حولدينگى قۇرىلىس سالۋشىلارىمەن 86،4 ملرد. تەڭگە سوماسىنا شارتتار جاساستى.
جالپى، «وڭىرلەردى 2020 جىلعا دەيىنگى دامىتۋ باعدارلاماسىن» ىسكە اسىرۋ شەڭبەرىندە حولدينگ 2015 جىلى كەمىندە 400 مىڭ شارشى مەتردى سالۋ مەن ساتىپ الۋدى جوسپارلاپ وتىر، بۇل الەۋمەتتىك جالدامالى تۇرعىن ۇيمەن قازاقستان بويىنشا 7 000 وتباسىنى قامتاماسىز ەتۋگە مۇمكىندىك بەرەدى. قازىرگى ۋاقىتتا استانا، الماتى، شىمكەنت، اقتوبە، كوكشەتاۋ، قوستاناي، سەمەي، تاراز، قاراعاندى، اقتاۋ، تالدىقورعان جانە قىزىلوردا قالالارىندا اۋدانى 226،4 شارشى مەتر 3 983 پاتەردى پايدالانۋعا بەرۋ قامتاماسىز ەتىلدى.
باعدارلامانى ىسكە اسىرۋدىڭ 5 جىلى ىشىندە جالدامالى تۇرعىن ٴۇيدىڭ شامامەن 1 483 شارشى مەترىن بەرۋ جوسپارلانادى. بۇل 29 مىڭعا جۋىق پاتەر.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!