استانا: 
899 
0
استانا. 12 قازان. baq.kz – قازاقستاندا العاش رەت ٴبىر اي ىشىندە ٴبىر وبلىستىڭ بىردەن بەس اۋدانى گازبەن قامتاماسىز ەتىلەدى. 10 قازان كۇنى قىزىلوردا وبلىسىنىڭ اكىمى قىرىمبەك كوشەربايەۆ جانە «قازترانسگاز ايماق» اق-نىڭ باس ديرەكتورى يبۋللا سەرديەۆ جاڭاقورعان اۋدانىندا گاز بەرۋ ساتىنە كۋا بولىپ، كوپتىڭ قۋانىشىمەن ٴبولىستى.
ايتا كەتەيىك، قىزىلوردا وبلىسى اكىمدىگى مەن "قازترانسگاز" اق اراسىندا بىلتىر جاسالعان مەموراندۋمعا سايكەس، جاڭاقورعان، شيەلى، قازالى جانە ارال اۋداندارى مەن بايقوڭىر قالاسىن گازداندىرۋعا قاجەتتى قاراجات بولىنگەن. ال، وبلىستىڭ قالعان اۋداندارى كەلەسى جىلى گازبەن قامتىلاتىن بولادى. ول جۇمىستارعا قاجەتتى 16 ملرد. تەڭگەنى ەۋروپالىق قايتا قۇرۋ جانە دامۋ بانكى ينۆەستيسيالايتىن بولادى.
- ٴبىز وتە قۋانىشتىمىز. پەش جاعىپ، كۇل شىعارۋ ماشاقاتىنان قۇتىلدىق. ٴبىز ٴۇشىن ارمان بولعان كوگىلدىر وتىن ۇيىمىزگە جەتتى. بۇدان ارتىق قانداي مەرەكە كەرەك، - جاڭاقورعاندىق، 5 بالانىڭ اناسى گاۋحار بەكمىرزايەۆا.
وبلىس اكىمى قىرىمبەك كوشەربايەۆ اۋدانعا ارنايى بارىپ، تۇرعىندارىنىڭ قۋانىشىمەن ٴبولىستى.
- ەلباسى ەلدى مەكەندەردى كوگىلدىر وتىنمەن قامتاماسىز ەتۋگە باستى نازار اۋدارۋدى تاپسىرعان. بۇل سونىڭ جەمىسى. جالپى العاندا، وبلىستا الەۋمەتتىك ماسەلەلەر ٴتيىمدى شەشىلىپ كەلەدى: «بەينەۋ-بوزوي-شىمكەنت» ماگيسترالدى گاز قۇبىرى جانە «باتىس ەۋروپا-باتىس قىتاي» حالىقارالىق تاس جولى سالىندى. ەندى گازدى اۋدان ورتالىقتارىنا جەتكىزەتىن قۇبىرلارى سالىنىپ ٴبىتتى. ەندى جاڭاقورعاندىقتار ٴۇشىن شەشەمىن تاپپاعان كۇرمەۋى قيىن ماسەلە اۋىز سۋ بولاتىن. سۋ قۇبىرلارىن سالۋ جوباسى 2016-2018 جىلدارى جوسپارلانعانىمەن، ٴبىز جۇمىستى بيىل باستاي بەرۋگە شەشىم قابىلداپ، جاقىندا العاشقى 200 ملن. تەڭگەنى بولەتىن بولدىق. ەندى جاقىن ارادا جۇمىس باستالادى. وسىلايشا، رەت-رەتىمەن حالىقتىڭ تىرشىلىگى ٴۇشىن قاجەتتى ماسەلەلەردى شەشە بەرەمىز، - دەدى وبلىس اكىمى.
- ٴبىزدىڭ جوبامىزدىڭ باستى ەرەكشەلىگى – وبلىسقا وتاندىق گاز جۇرگىزىلەتىن بولادى، ياعني گاز توقتاۋسىز بەرىلەدى. حالىقتىڭ الەۋمەتتىك از قامتىلعان توپتارىنا جەڭىلدىكتەر قاراستىرىلعان. تۇرعىنداردىڭ جاعدايىنا قاراي وتىرىپ، پايىزى تومەن نەسيەلەر ارقىلى بىرتىندەپ تولەۋ مۇمكىندىگىن دە قاراستىردىق. سونىمەن قاتار، تامىز بەن قازان ارالىعىندا پەش جانە ەسەپتەۋىش قۇرالدارىن ساتىپ الۋشىلارعا 45 پايىزدىق جەڭىلدىك بەرىلەدى، - دەدى «قازترانسگاز ايماق» اق-نىڭ باس ديرەكتورى يبۋللا سەرديەۆ.
جاڭاقورعاندىقتاردىڭ قۋانىشىندا شەك جوق. تالاي جىلعى ارماندارى ورىندالعان اۋدان تۇرعىندارىنىڭ اتىنان ارداگەرلەر كەڭەسىنىڭ ٴتوراعاسى زينابدين شەرماعانبەت قۇتتىقتاۋ ٴسوز سويلەپ، ەلباسىنا سىر جۇرتشىلىعىنىڭ اتىنان العىسىن جولدادى.
ايتا كەتۋ كەرەك، كەلەسى اپتادا شيەلى اۋدانىن گازداندىرۋ باستالادى، ودان كەيىنگى كەزەكتە – قازالى جانە ارال اۋداندارى بار.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2430
0