استانا: 
689 
0
استانا. 27 قىركۇيەك. baq.kz – قىزىلوردادا قالا كۇنى مەرەكەسىنە وراي كەزەكتە تۇرعان ازاماتتار ٴۇشىن جاپپاسباي باتىر كوشەسى بويىنان 2 تۇرعىن ٴۇي پايدالانۋعا بەرىلىپ، بارلىعى 120 وتباسى باسپانالى بولدى دەپ حابارلايدى وبلىس اكىمدىگىنىڭ ٴباسپاسوز قىزمەتى.
قونىس يەلەرىن وبلىس اكىمى قىرىمبەك كوشەربايەۆ قۇتتىقتاپ، جاڭا پاتەر كىلتتەرىن سالتاناتتى تۇردە تابىس ەتتى.
- ەلباسىنىڭ الەۋمەتتىك سالانى ەرەكشە قولداۋىنىڭ ارقاسىندا تۇرعىن ٴۇي قۇرىلىسى قىزىلوردا وبلىسىندا جوعارى قارقىنمەن جۇزەگە اسىرىلىپ كەلەدى. ايتا كەتەيىك، بيىل قىزىلوردا وبلىسىندا قۇرىلىس كولەمى بىلتىرعى جىلمەن سالىستىرعاندا 3،5 ەسەگە وسسە، وبلىس ورتالىعى قىزىلوردا قالاسىندا 8 ەسەگە ارتىپ وتىر. جىل سوڭىنا دەيىن قىزىلوردا قالاسىندا 2406 پاتەر كىلتى تابىستالىپ، 43 كوپقاباتتى تۇرعىن ٴۇي سالىنباق. ٴدال مۇنداي كورسەتكىش قىزىلوردانىڭ تاريحىندا بولعان ەمەس. بۇگىن مىنە، قاسيەتتى قۇربان ايت مەرەكەسىندە، قالا كۇنى مەرەكەسى اياسىندا سىزدەر ٴۇشىن قۋانىشتى جاعداي - ەڭسەسى بيىك، جاڭادان ىرگەتاسى قالانعان ۇيدە قونىس تويىن تويلاپ جاتسىزدار. قۋانىشتارىڭىز قۇتتى بولسىن! قۇربان ايتتارىڭىز قابىل بولسىن،- دەدى ايماق باسشىسى.
مەرەكە كۇنى باسپانالى بولىپ، پاتەر كىلتىن العانداردىڭ اراسىندا ۇلى وتان سوعىسىنىڭ ارداگەرى، كوپ بالالى جانە از قامتىلعان وتباسىلار مەن مۇمكىندىگى شەكتەۋلى جاندار دا بار.
جالپى، قالا كۇنى مەرەكەسى بيىل كەڭ كولەمدە اتالاپ وتىلۋدە. قاۋىن-قاربىز، كونديتەرلىك ونىمدەر جانە بالالار شىعارماشىلىعى فەستيۆالى، جاس اقىندار ٴمۇشايراسى، اۋىل شارۋاشىلىق جارمەڭكەسى، سپورتتىق سايىستار ۇيىمداستىرىلدى. قالا كۇنى مەرەكەسى ەسترادا جۇلدىزدارىنىڭ قاتىسۋىمەن وتەتىن گالا-كونسەرتپەن قورىتىندىلانادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2434
0