استانا: 
1358 
0
استانا. 15 ناۋرىز. baq.kz - بۇگىن سىر ەلىنەن «قىزىلوردا-جەزقازعان» باعىتىنا قاتىنايتىن العاشقى جولاۋشىلار پويىزى جولعا شىقتى. ايتا كەتەيىك، بۇل جوبا «نۇرلى جول» باعدارلاماسى اياسىندا جۇزەگە اسىپ وتىر، دەپ حابارلايدى baq.kz.
«قىزىلوردا – جەزقازعان» پويىزى بىلتىر عانا قولدانىسقا بەرىلگەن «جەزقازعان-سەكسەۋىل-بەينەۋ» جاڭا تەمىرجولى ۇستىمەن جۇرەدى. جاڭا پويىز قىزىلوردا وبلىسىنىڭ سولتۇستىگىندە ورنالاسقان 65 ستانسيا ارقىلى وتەدى. ەندى قىزىلوردالىقتار سارىارقا ولكەسىنە ٴبىر تاۋلىك ىشىندە پويىزبەن تىكەلەي بارا الادى.
- ەلباسى باستاماسىمەن تەمىر جول، كولىك جولدارى قۇرىلىستارىنىڭ جۇرگىزىلۋى مەملەكەتىمىزدىڭ، قالا بەردى وبلىستاردىڭ بىرى-بىرىمەن ساۋدا-ساتتىعىن، بارىس-كەلىسىن، الىس-بەرىسىن، ەكونوميكالىق بايلانىستارىن نىعايتىپ، حالىقتىڭ تۇرمىسىن تۇزەيتىن بولادى. «قىزىلوردا – جەزقازعان» پويىزىنىڭ قاتىناۋى ناۋرىز قارساڭىندا سىر جۇرتشىلىعى عانا ەمەس ەكى اراداعى قانشاما حالىق ٴۇشىن شىن مانىندە ۇلكەن سىي بولدى، - دەدى وبلىس اكىمى قىرىمبەك كوشەربايەۆ.
جاڭا جولاۋشىلار پويىزى 5 ۆاگوننان تۇرادى. بيلەتتەردىڭ دە باعاسى ٴتيىمدى. ماسەلەن، جولاۋشى بايان ٴالىموۆا بۇرىن جەزقازعانعا اۆتوبۋس ارقىلى قاتىناعان. ول تەمىر جولدىڭ ٴتيىمدى تۇستارى كوپ ەكەندىگىن ايتادى.
– اسىرەسە، قىستى كۇندەرى قينالاتىنبىز. جەزقازعاننىڭ جولى قاۋىپتىرەك بولاتىن. ەندى بۇل قيىنشىلىقتار ارتتا قالدى. ەندى پويىزبەن ەش ۋايىمسىز جەزقازعانعا قاتىنايتىن بولدىق، - دەيدى جولاۋشى بايان ٴالىموۆا.
ايتا كەتەيىك، ەكى ٴوڭىر اراسىنداعى بايلانىستى نىعايتۋ ماقساتىندا بيىل «قىزىلوردا-جەزقازعان» اراسىنداعى جولدى اسفالتتاۋ جۇمىستارى باستالادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2434
0