«قازاۆتوجول» حالىقارالىق جول فەدەراسياسىنىڭ مۇشەسى بولدى

استانا. 18 قىركۇيەك. baq.kz - قازاقستاندىق جولشىلار ىستامبۇلداعى «ەۋروپا مەن ورتالىق ازيا» حالىقارالىق جول فەدەراسياسىنىڭ جەرگىلىكتى كونگرەسسىنە قاتىستى دەپ حابارلايدى «قتج» ۇك» اق ٴباسپاسوز قىزمەتى.  

فورۋمعا قاتىسۋشى الەمنىڭ 93 ەلىنىڭ جول سالاسىنداعى وكىلدەرى اۆتوجولداردىڭ دامۋ جۇيەسى، جول قوزعالىسى قاۋىپسىزدىگى ماسەلەلەرىن تالقىعا سالدى.

سەسسيا بارىسىندا «قازاۆتوجول» ۇك» اق باسقارما ٴتوراعاسىنىڭ ورىنباسارى ۇلان اليپوۆ بايانداما جاسادى.

ۇ.اليپوۆ «نۇرلى جول» مەملەكەتتىك باعدارلاماسى اياسىندا جۇزەگە اسىرىلىپ جاتقان كولەمدى ينفراقۇرىلىمدىق نىساندار تۋرالى اقپارات بەرىپ، قازاقستان اۆتوكولىك جولدارىنىڭ دامۋ جوسپارىنا، قازىرگى زامانعا ساي كولىكتىك ينفراقۇرىلىمنىڭ سالىنۋىنا، ونىڭ عالامدىق كولىك تورابىندا ينتەگراسيالانۋىنا توقتالدى.

سونداي-اق، بايانداما بارىسىندا حالىقارالىق كولىك ٴدالىزىن دامىتۋ ماقساتىندا جولشىلاردىڭ بىرلەسە جۇمىس جاساۋىنىڭ تيىمدىلىگىن، ازيادان ەۋروپاعا جانە كەرى باعىتتا ترانسقازاقستاندىق باعدار ارقىلى وتپەلى جۇك تاسىمالداۋدىڭ ماڭىزى زور ەكەندىگىن اتاپ ٴوتتى.

«اعىمداعى جىلدىڭ قاراشا ايىندا استانا قالاسىندا «قازاۆتوجول 2015. قوندىرعى، قۇرىلىس جانە جول كومپلەكسىنىڭ سەرۆيستىك يندۋسترياسى» ٴحىى حالىقارالىق كورمەسى وتكىزىلەدى»،- دەدى ۇلان اليپوۆ.

«قازاۆتوجول»-دىڭ «ەۋروپا مەن ورتالىق ازيا» حالىقارالىق جول فەدەراسياسىنىڭ مۇشەسى بولعانى ٴۇشىن ۇ.اليپوۆ فورۋم قاتىسۋشىلارىنا العىسىن ايتتى.

ونىڭ ايتۋى بويىنشا، حالىقارالىق جول فەدەراسياسىنا قاتىسۋىمىز اۆتوكولىك جولدارىنىڭ سالىنۋى مەن دامۋىنا، يننوۆاسيالىق تاجىريبەلەرمەن الماسۋعا، جول قىزمەتى كادرلارىن دايارلاۋعا مول مۇمكىندىك بەرەدى. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!