ەقدب «ورتالىق-وڭتۇستىك» جول ٴدالىزىن قارجىلاندىرادى

استانا. 20 اقپان. baq.kz - ەۋروپا قايتا قۇرۋ جانە دامۋ بانكى استانا مەن الماتى قالالارىن جالعايتىن «ورتالىق-وڭتۇستىك» جول ٴدالىزىن قارجىلاندىرادى.
 

حالىقارالىق بانك جالپى ۇزىندىعى 228 شاقىرىمعا سوزىلعان جولدىڭ 80 شاقىرىمى ٴۇشىن 103 ملن دوللار بولمەك. بۇل تۋرالى ىستامبۇلدا وتكەن «ورتالىق ازيا» ينۆەستيسيالىق فورۋمىندا بەلگىلى بولدى. ەلىمىزدىڭ قارجى ٴمينيسترى باقىت سۇلتانوۆ پەن ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتي جوبانى جۇزەگە اسىرۋ بويىنشا كەلىسىمگە قول قويدى. ىستامبۇلدا ەۋروپا قايتا قۇرۋ جانە دامۋ بانكى مەن financial times ۇيىمىنىڭ ۇيىتقى بولۋىمەن ورتالىق ازيانىڭ ينۆەستيسيالىق مۇمكىندىكتەرىنە ارنالعان جيىن ٴوتتى. وندا ايماقتا جاعىمدى ينۆەستيسيالىق كليماتتى قالىپتاستىرۋ تەتىكتەرى، ينفراقۇرىلىمدى زاماناۋي ستاندارتتارعا سايكەستەندىرۋ مەن «جىبەك جولىن» جاڭعىرتۋ سىندى وڭىردەگى وزەكتى ماسەلەلەر كوتەرىلدى. فورۋمعا قاتىسۋشى حالىقارالىق ساراپشىلار ٴوز تاجىريبەلەرىمەن ٴبولىستى.

مەحمەت شيمشەك، تۇركيا رەسپۋبليكاسى پرەمەر-مينيسترىنىڭ ورىنباسارى: - بۇكىل الەم ينۆەستيسياعا تاۋەلدى. جاھاندىق ەكونوميكالىق قيىندىقتار كاپيتال اينالىمىنا كەرى اسەر ەتىپ، ونىڭ كولەمىن ازايتقان بولار. ٴبىراق مەملەكەتتەردى سول تىعىراقتان وتاندىق ەكونوميكاسىنا سالىنعان ينۆەستيسيالار قۇتقارىپ الىپ شىعادى. بۇل رەتتە وندىرىستىك كەشەندەر سالۋدى ۇسىنامىز. بۇل ينفراقۇرىلىمدىق وزگەرىستەردى تالاپ ەتەتىن ۇلكەن جۇمىس. سونداي-اق كىشى جانە ورتا بيزنەسكە تارتىلعان كاپيتال دا ٴوزىن-وزى اقتايتىنىن بۇگىنگى ۋاقىت دالەلدەپ بەردى. ەۋروپا قايتا قۇرۋ جانە دامۋ بانكى ورتالىق ازياعا بولەتىن ينۆەستيسيا كولەمىن جىل سايىن وسىرۋدە. بۇگىندە ايماققا سالىنعان كاپيتال 10 ملرد ەۋروعا جەتتى. حالىقارالىق بانك ورتا ازيا ەلدەرىنىڭ اراسىندا ەڭ كوپ قازاقستاننىڭ جوبالارىن قارجىلاندىردى. مىسالى بىلتىر وسى ماقساتتا 708،6 ملن ەۋرو ٴبولىندى. بۇل قوماقتى قارجى اسىرەسە، ەلىمىزدەگى 5 ينستيتۋسيونالدىق رەفورما مەن «100 ناقتى قادامدى» جۇزەگە اسىرۋعا تاپتىرماس مۇمكىندىك بولىپ وتىر. وسىلايشا، قازاقستان ەۋروپا قايتا قۇرۋ جانە دامۋ بانكىمەن بىرلەسىپ، 200-گە جۋىق جوبالار بويىنشا ىسكەرلىك بايلانىستارىن نىعايتىپ الدى.

باقىت سۇلتانوۆ، قر قارجى ٴمينيسترى: - ەۋروپا قايتا قۇرۋ جانە دامۋ بانكنىڭ ٴبىزدىڭ ٴوڭىردىڭ دامۋىنا ۇلەسى وتە ۇلكەن. ويتكەنى 20 جىلدىڭ ىشىندە ٴبىراز ٴىرى جوبالار ىسكە اسىرىلعان. بارلىق ينۆەستيسيانى ەسەپتەگەندە 10 ملرد اقش دوللارىنان اسىپ وتىر. ونىڭ ىشىندە 7 ملرد-تان استام 200 جوبا قازاقستاندا جاسالدى. بۇگىنگى ينفراسترۋكتۋرا، سالىنعان جولدار، تەمىر جولدار ٴبىزدىڭ ەكونوميكامىزدىڭ وسۋىنە وڭ اسەر بەرىپ جاتىر. ەۋروپا قايتا قۇرۋ جانە دامۋ بانكى ورتا ازيا ەلدەرىنىڭ نارىقتىق جۇيەنىڭ تالاپتارىنا ساي وندىرىستىك الەۋەتتى ارتتىرۋعا ارنالعان باستامالارىن جوعارى باعالايدى. حالىقارالىق بانك بۇل باعىتتا قازاق ەلىمەن ارىپتەستىك بايلانىستاردى تەرەڭدەتۋگە مۇددەلى. فورۋم اياسىندا ەلىمىزدىڭ ينفراقۇرىلىمىن جەتىلدىرۋ ٴۇشىن ەۋروپا قايتا قۇرۋ جانە دامۋ بانكى مەن قازاقستان اراسىندا استانا مەن الماتى قالالارىن جالعايتىن «ورتالىق-وڭتۇستىك» جول ٴدالىزىن قارجىلاندىرۋ بويىنشا كەلىسىم جاسالدى.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!