د.نازاربايەۆا: ٴبىلىم بەرۋ نىساندارى قۇرىلىسى كەزىندە قاراجاتتى يگەرۋ ۋاقتىلى جۇزەگە اسۋى ٴتيىس

قر پرەمەر-مينيسترىنىڭ ورىنباسارى داريعا نازاربايەۆا «نۇرلى جول» ينفراقۇرىلىمدى دامىتۋدىڭ 2015-2019 جىلدارعا ارنالعان مەملەكەتتىك باعدارلاماسىن جۇزەگە اسىرۋ ماسەلەلەرى جونىندەگى كەڭەستە ٴبىلىم بەرۋ سالالارىنىڭ قۇرىلىسىنا باعىتتالعان قارجىلاي قاراجاتتى ۋاقتىلى يگەرۋ بويىنشا شارالار قابىلداۋدى تاپسىردى، دەپ حابارلايدى pm.kz.

اعىمداعى جىلى ۇلتتىق قور قاراجاتى ەسەبىنەن ٴبىلىم بەرۋ نىساندارىنىڭ قۇرىلىسىنا 57 ملرد تەڭگە ٴبولىندى، ونىڭ اياسىندا 96 نىساننىڭ قۇرىلىسى جۇرگىزىلىپ جاتىر، ولاردىڭ ىشىندە – 51،2 ملرد تەڭگە سوماعا 77 مەكتەپ، سونداي-اق 6،7 ملرد تەڭگە سوماعا 19 بالاباقشا.

كەڭەس بارىسىندا قر ٴبىلىم جانە عىلىم ۆيسە-مينيسترى بيبىگۇل اسىلوۆا 1 تامىزداعى جاعداي بويىنشا جەرگىلىكتى اتقارۋشى ورگاندارعا 26،9 ملرد تەڭگە – جىلدىق جوسپاردىڭ 46% اۋدارىلعانىن مالىمدەدى.

ۆيسە-مينيستر 21 ٴبىلىم بەرۋ نىسانى پايدالانۋعا بەرىلگەنىن ايتىپ ٴوتتى، ونىڭ ىشىندە 13 مەكتەپ (قىزىلوردا وبلىسىندا - 2، وقو-دا - 7، اقتوبە، شىعىس قازاقستان جانە ماڭعىستاۋ، سولتۇستىك قازاقستان وبلىستارىندا - 1 مەكتەپتەن)، سونداي-اق 8 بالاباقشا (الماتى وبلىسىندا - 2، قاراعاندى، ماڭعىستاۋ وبلىستارىندا، سقو-دا، وقو-دا، الماتى قالاسىندا – 1 نىساننان).

«جەدەل مالىمەتتەرگە سايكەس 23،7 ملرد تەڭگە نەمەسە قارجىلاندىرۋ جوسپارىنان 88،2% يگەرىلدى. يگەرىلمەگەن قاراجات قالدىعى 3،2 ملرد تەڭگەنى قۇرايدى. يگەرىلمەگەن قاراجاتتىڭ ەڭ كوپ ۇلەسى 5 وڭىرگە – الماتى، شىعىس قازاقستان، قاراعاندى، وڭتۇستىك قازاقستان وبلىستارىنا، استانا قالاسىنا تيەسىلى»، - دەپ باياندادى ب. اسىلوۆا.

وعان قوسا، ول مەردىگەرلەرمەن سوتتىڭ تالقىلاۋى، مەردىگەردىڭ قۇرىلىس-مونتاج جۇمىستارى كەستەسىنەن كەيىن قالۋى، مەملەكەتتىك ساتىپ الۋلاردىڭ اياقتالماعان راسىمدەرى جانە كەلىسىم-شارتتى كەش جاساۋ قاراجاتتىڭ يگەرىلمەۋىنىڭ نەگىزگى سەبەپتەرى بولىپ تابىلاتىنىن ايتتى.

ٴوز كەزەگىندە پرەمەر-مينيستردىڭ ورىنباسارى د.نازاربايەۆا وبلىستاردىڭ، استانا جانە الماتى قالالارىنىڭ اكىمدىكتەرىنە ٴبىلىم بەرۋ نىساندارىن پايدالانۋعا بەرۋ مەرزىمدەرىن ورىنداماۋعا جول بەرمەۋ بويىنشا مەردىگەرلەرمەن جۇيەلى جۇمىستى قامتاماسىز ەتۋدى تاپسىردى.

«قارجىلاي قاراجاتتى ۋاقتىلى يگەرۋ بويىنشا شارالاردى قابىلداۋ، سونداي-اق باقىلاۋدى كۇشەيتۋ جانە سايكەس ۆەدومستۆو تاراپىنان نىساندار قۇرىلىسىنىڭ بارىسىنا مونيتورينگ جۇرگىزۋ تەتىگىن جاساۋ قاجەت»، - دەدى د. نازاربايەۆا.

تەگي
• قازاقستان

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!