باقىتجان ساعىنتايەۆ التىنكول تەمىرجول ستانساسىندا بولدى

استانا. 15 ناۋرىز. baq.kz - پرەمەر-مينيستردىڭ ٴبىرىنشى ورىنباسارى باقىتجان ساعىنتايەۆ الماتى وبلىسىنا ٴىس-ساپارى اياسىندا «قورعاس» حالىقارالىق شەكارالىق سەرىكتەستىك ورتالىعى (حشسو)، «قورعاس – شىعىس قاقپاسى» اەا، التىنكول تەمىرجول ستانساسىندا بولىپ، ينفراقۇرىلىم نىساندارىنىڭ سالىنۋ بارىسىمەن تانىستى.  

«قازاقستان تەمىر جولى» ۇك» اق پرەزيدەنتى اسقار مامين اەا دامىتۋ شارالارىمەن جانە كولىكتىك-لوگيستيكالىق ينفراقۇرىلىم نىساندارىنىڭ قۇرىلىسى بارىسىمەن تانىستىردى.

2014 جىلعى شىلدەدە مەملەكەت باسشىسى نۇرسۇلتان نازاربايەۆ قۇرعاق پورت قۇرىلىسىن باستاۋعا پارمەن بەردى. قۇرىلىس جۇمىستارى قىسقا مەرزىمدە اتقارىلىپ، ينفراقۇرىلىمدىق نىسانداردىڭ ٴبىرىنشى كەزەگى 2015 جىلعى جەلتوقساندا بەرىلدى. «بۇل ٴوز كەزەگىندە قۇرعاق پورتتىڭ وپەراتورى بولىپ تابىلاتىن «ktzkhorgos -gateway» كومپانياسىنىڭ وندىرىستىك جانە ينۆەستيسيالىق قىزمەتىنە كىرىسۋىنە مۇمكىندىك بەردى.

بيىلعى جىلى مۇندا 200 مىڭ كونتەينەردى وڭدەۋ، 2020 جىلعا قاراي تولىق قۋاتىن پايدالانىپ، جىلىنا 500 مىڭ كونتەينەر وڭدەۋ جوسپارلانىپ وتىر.

2015 جىلى قحر- ەو- قحر باعدارىنا 47 مىڭ كونتەينەر جىبەرىلدى. بۇل 2014 جىلعى كورسەتكىشپەن سالىستىرعاندا، ەكى ەسەگە جوعارى كورسەتكىش. بۇگىنگى تاڭدا «ktzexpress» كونتەينەرلىك تاسىمال كولەمىن ٴجۇز پايىزعا ٴوسىردى. تىكەلەي تەندەرلەرگە قاتىسۋ، كونتەينەرلەردىڭ رەفريجەراتورلىق پاركىنە ينۆەستيسيا تارتۋ ارقىلى كومپانيا تاسىمالداۋدى جىل بويى اتقارۋعا جەتكىزىپ، پويىزداردىڭ كەرى باعدارىن 46 پايىزعا جۇكپەن قامتاماسىز ەتۋ مۇمكىن بولدى.

قازىرگى كەزدە ينۆەستورلارعا قولايلى جاعداي جاساۋ كەزەك كۇتتىرمەيتىن ماسەلەنىڭ ٴبىرى. ول ٴۇشىن اەا اۋماعىندا ورىندالاتىن تاپسىرىس بەرۋشىنىڭ ٴوتىنىشى قابىلدانعان ساتتەن باستاپ، ونىڭ ەڭ سوڭعى ونىمگە دەيىنگى قۇرىلىمدىق تارتىپتەرىن بارىنشا جەتىلدىرۋ جۇرگىزىلەدى.

بۇگىندە قۇرىلىسشىلار قۇرعاق پورتتىڭ ەكىنشى كەزەڭىنىڭ قۇرىلىسىنا كىرىستى. بەلگىلەنگەن كەستە بويىنشا قۇرىلىس جۇمىستارىن 2016 جىلعى مامىردا اياقتاۋ جوسپارلانىپ وتىر. سونىمەن قاتار، اەا قارقىندى جۇزەگە اسىرىلۋىنا بار جاعداي جاسالىپ جاتىر. جۇمىسشىلارعا ارنالعان تۇرعىن ۇيلەر مەن الەۋمەتتىك-تۇرمىستىق نىساندار سالىنۋدا، 100 مىڭ ادام تۇراتىن جاڭا قالانىڭ باس جوسپارىنىڭ جوباسى جاسالعان.

«ktzkhorgos -gateway» باس ديرەكتورى ك. گەيسەننىڭ ايتۋىنشا، «dpworld» كومپانياسىمەن بىرلەسە وتىرىپ، قازىرگى زامانعى it تەحنولوگياسىن وندىرىسكە ەنگىزىپ، قۇرعاق پورتتىڭ سىرتقى جانە ىشكى بيزنەس ۇدەرىسىن سينحروندى جۇرگىزىپ، جۇمىستى «ٴبىر تەرەزە» ادىسىمەن اتقارۋدى جولعا قويعان. ونىڭ سىرتىندا ەڭبەككەرلەر تۇراقتى تۇردە شەتەلدەگى ترەنينگتەردە بولىپ، بىلىكتىلىگىن كوتەرەدى. جۇمىسقا قابىلداۋعا نەگىزىنەن الماتى وبلىسىنىڭ تۇرعىندارىنا باسىمدىق بەرىلەدى.

ساپار بارىسىندا دەلەگاسيا «قورعاس» حالىقارالىق شەكارالىق سەرىكتەستىك ورتالىعىنىڭ (حشسو) بۇدان ٴارى دامۋ مۇمكىندىكتەرىمەن تانىستى. قورعاس حشسو پرەزيدەنتى ۆاسيليي ٴنيدىڭ ايتۋىنشا، بۇگىنگى تاڭدا 14 نىسان قۇرىلىسى باستالىپ كەتتى. اتاپ ايتقاندا، ورتالىق الاڭ، قولونەرشىلەر قالاسى، كونگرەسس-حولل، 4 ساۋدا گالەرەياسى، اشىق بازار، ساۋىقتىرۋ كەشەنى، ساۋدا ورتالىعى مەن 3 ساۋدا ٴۇيى. 18 نىساننىڭ جوبالىق قۇجاتتارى ازىرلەنىپ جاتىر. جوسپار بويىنشا العاشقى ينۆەستيسيالىق نىساندار قولدانىسقا 2016 جىلى مامىر ايىندا بەرىلەدى.

قازاقستان-قىتاي وتكىزۋ بەكەتىمەن تانىسۋ بارىسىندا باقىتجان ساعىنتايەۆ ونىڭ تەحنولوگيالىق جانە باقىلاۋ قۇرىلعىلارى جاعىنان بارىنشا جەتىلدىرىلۋىن قامتاماسىز ەتىپ، وتكىزۋ مەرزىمىن بارىنشا قىسقارتۋ جونىندە شارالار قابىلداۋدىڭ قاجەت ەكەندىگىن اتاپ ٴوتتى.

«قتج» ۇك» اق –نىڭ «نۇرلى جول» باعدارلاماسى اياسىندا جۇزەگە اسىرىپ جاتقان «قورعاس-شىعىس قاقپاسى» اەا جوباسى قازاقستاننىڭ ترانزيتتىك كولىكتىك الەۋەتىنىڭ دامۋىنا سەرپىن بەرەدى. جاڭا جىبەك جولى ەكونوميكالىق بەلدەۋىنىڭ جاساقتالۋىنا قىزمەت ەتەدى.

«قورعاس –شىعىس قاقپاسى» اەا جوباسى ەۋرازيا قۇرلىعى بويىنشا ماڭىزدى ورىنعا يە. قورعاس –شىعىس قاقپاسى قىتاي جانە وڭتۇستىك-شىعىس ازيا ەلدەرىنەن تمد ەلدەرىنە، ەۋروپا، پارسى شىعاناعى مەن وزگە دە وڭىرلەرگە اپاراتىن جولداردىڭ قيىلىسىندا ٴتيىمدى ورنالاسقان. مۋلتيمودالدىق لوگيستيكانى دامىتۋ مەن ٴىرى وندىرىستىك جانە ساۋدا ورتالىقتارىن ۇيىمداستىرۋ مۇمكىندىكتەرى بۇل جوبانىڭ الەمدىك دەڭگەيدەگى ديستريبۋسيالىق ورتالىققا اينالۋىنا جول اشادى. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!