باقىت بەرەكە-بىرلىگى جاراسقان جەرگە بارادى

استانا. 17 قاراشا. baq.kz – قوعام وزگەرىپ، كۇن وتكەن سايىن الەمدىك ەكونوميكالىق احۋال، گەوساياسي داعدارىستار، جاڭا سىناقتار مەن جاڭا ەكونوميكالىق تالاپتار بارلىق مەملەكەتتەردى تىعىرىققا تىرەپ وتىر. وسى ورايدا، ەلباسى ن.ٴا.نازاربايەۆتىڭ قازاقستان حالقىنا ارناعان «نۇرلى جول - بولاشاققا باستار جول» اتتى جولداۋى الەمدىك احۋالدان تۋعان سۇراقتارعا جاۋاپ ىزدەگەن ازاماتتارىمىزعا بەرىلگەن ناقتى دالەلدەر بولدى دەپ سەنىممەن ايتا الامىن.

ەلباسىنىڭ بيىلعى جولداۋىندا باستى نازار ەلىمىزدىڭ ينفراقۇرىلىمىن دامىتۋ ماسەلەسىنە باعىتتالدى. تاريحقا ۇڭىلەر بولساق، ەكونوميكا ٴۇشىن اۋىر كەزەڭدەردە ينفراقۇرىلىمدى دامىتۋ، ەكونوميكانى جانداندىرۋ ٴۇشىن ەڭ ٴتيىمدى قۇرال بولىپ سانالادى. ٴسوز زەرگەرى ا.بايتۇرسىنوۆ: «بالام قايداسىڭ دەپ ىزدەيتىن ەل بولماسا، ەلىم قايداسىڭ دەپ ىزدەيتىن بالا قايدان شىعادى؟» دەپ بەكەر ايتپاعان. ۇلت كوشباسشىسى ن.ٴا. نازاربايەۆ الداعى جىلداردى جان-جاقتى ەكونوميكالىق ساراپتاي وتىرىپ، نەگىزگى باعىتتاردى ايقىنداپ، 2015 جىلدان باستاپ جاس وتباسىلارعا باستاپقى جارناسىز جانە تومەن پايىزدىق كورسەتكىشتە ۇيلەر سالۋعا 180 ميلليارد تەڭگە قاراجات بولىنەتىنىن جەتكىزدى.

«وتباسى – شاعىن مەملەكەت، ال مەملەكەت – ۇلكەن وتباسى». كەز كەلگەن دەنى دۇرىس وتباسى اينالاسىندا بولىپ جاتقان وزگەرىستەرگە زەر سالىپ ٴۇڭىلىپ، ٴتۇسىنىپ، الىس-جاقىن بولاشاققا جوسپار قۇرادى. دەسەك تە، بۇگىنگى تاڭدا جاڭادان وتباسىن قۇرعان جاستاردىڭ ۇشتەن ٴبىرى ٴبىر جىلدىڭ ىشىندە اجىراسىپ جاتىر. بۇعان ارينە، كوپتەگەن الەۋمەتتىك ماسەلەلەر ىقپال ەتەتىنى تۇسىنىكتى. دەگەنمەن دە، كەيبىر مالىمەتتەرگە سايكەس، ەلىمىزدەگى جالپى جاس وتباسىلاردىڭ 80% جۋىعىندا جەكە پاتەر جوقتىعىن ەسكەرسەك، ەلباسى ن.ٴا. نازاربايەۆ جاستاردى قولجەتىمدى باسپانامەن قامتاماسىز ەتۋ ماسەلەسىن ٴدوپ باسىپ ايتتى.

پرەزيدەنتتىڭ بيىلعى جولداۋى قانشالىقتى قارقىندى جانە كۇتپەگەن جەردەن بولسا، الداعى كۇندەرى اتقارىلاتىن جۇمىستاردىڭ سونشالىقتى ماڭىزدىلىعىن جانە ەلىمىز ٴۇشىن اسا جاۋاپكەرشىلىكپەن، جىلدام، ناتيجەلى ورىندالۋى كەرەكتىگىن كورسەتىپ وتىر. باقىت - بەرەكە-بىرلىگى جاراسقان جەرگە بارامىن دەيدى ەكەن. سول سەكىلدى جەتىستىك - كەڭەسە بىلگەن جەردە، بىرلىك پەن تىرلىك بار جەردە. سولاي بولعاندا عانا ەلباسى ٴوز جولداۋىندا اتاپ كورسەتكەندەي، جالپىۇلتتىق يدەيا - قازاقتىڭ ۇلتتىق شاڭىراعى – قازاقستان قۇت پەن بەرەكەنىڭ، ىنتىماق پەن ىرىستىڭ وشاعىنا اينالماق!

مۇراتبەك ەرجاقىپوۆ،

قىزىلوردا وبلىسى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!