«بايتەرەك» حالىقارالىق قارجى ينستيتۋتتارىمەن ىنتىماقتاستىقتى نىعايتادى

مەملەكەت باسشىسى نۇرسۇلتان نازاربايەۆتىڭ قىتاي حالىق رەسپۋبليكاسىنا جۇمىس ساپارى قارساڭىندا «بايتەرەك» ۇلتتىق باسقارۋشى حولدينگى» اق باسقارما ٴتوراعاسى ەربولات دوسايەۆ بەيجىڭ قالاسىندا بۇگىن ٴبىرقاتار ىسكەرلىك كەلىسسوزدەر وتكىزدى، دەپ حابارلايدى baq.kz.

ەربولات دوسايەۆ قىتايدىڭ ٴىرى مەملەكەتتىك citic group كورپوراسياسىنىڭ پرەزيدەنتى ۆان سزيۋنمەن كەزدەستى. تاراپتار «نۇرلى جول» مەملەكەتتىك باعدارلاماسى جانە يندۋستريالىق-يننوۆاسيالىق دامۋ جونىندەگى وزەكتەندەندىرىلگەن باعدارلاماسى شەڭبەرىندە بىرلەسكەن يندۋستريالىق جانە ينفراقۇرىلىمدىق جوبالاردى ىسكە اسىرۋ بويىنشا ىنتىماقتاستىقتى جالعاستىرۋعا نيەتتى ەكەندەرىن راستادى.

ەربولات دوسايەۆتىڭ قىتاي مەملەكەتتىك بانكىنىڭ ۆيسە-پرەزيدەنتى دين سيانگچۋنمەن كەزدەسۋىندە سەرىكتەس قازاقستاننىڭ دامۋ بانكى («بايتەرەك» حولدينگىنىڭ ەنشىلەس ۇيىمى) ارقىلى «نۇرلى جول» باعدارلاماسى شەڭبەرىندە جوبالاردى قارجىلاندىرۋ كولەمىن ۇلعايتۋ تۋرالى ٴسوز قوزعالدى. سونداي-اق، تاراپتار ادام كاپيتالىن دامىتۋ ماڭىزدىلىعىن اتاپ ٴوتىپ، بىرلەسكەن ترەنينگتەر مەن سەمينارلاردى ۇيىمداستىرۋ ارقىلى تاجىريبە الماسۋدى بەلسەندەتۋدى ۇسىندى.

حولدينگتىڭ ٴباسپاسوز قىزمەتىنىڭ مالىمەتىنشە ەربولات دوسايەۆتىڭ ازيا ينفراقۇرىلىمدىق ينۆەستيسيالار بانكىنىڭ (اييب) ۆيسە-پرەزيدەنتى دي دجەي پانديانمەن جۇرگىزگەن كەلىسسوزدەر قورىتىندىسى بويىنشا تاراپتار ەنەرگەتيكا، كولىك ينفراقۇرىلىمى مەن ازىق-تۇلىكتى وڭدەۋ سالالارىنداعى باسىم ينفراقۇرىلىمدىق جوبالاردى بىرلەسىپ قارجىلاندىرۋ ٴۇشىن اقپاراتپەن الماسۋ جانە جاڭا ينۆەستيسيالىق مۇمكىندىكتەردى ىزدەستىرۋ جونىندەگى جۇمىستاردى جانداندىرۋ قاجەتتىلىگىن تىلگە تيەك ەتتى.

«بايتەرەك» حولدينگىنىڭ جاڭا قۇرالدارىن، ونىڭ ىشىندە كورپوراتيۆتىك كەپىلدىك بەرۋدى پايدالانا وتىرىپ، ينۆەستيسيالىق جوبالاردى قارجىلاندىرۋ مۇمكىندىگىن قاراستىرۋ ۋاعدالاستىعىنا ەربولات دوسايەۆتىڭ قىتايدىڭ «ەكسيمبانك» ۆيسە-پرەزيدەنتى يۋان سينيونگپەن كەزدەسۋىندە قول جەتكىزىلدى. وسىدان بۇرىن «بايتەرەك» حولدينگىنىڭ ەنشىلەس ۇيىمدارى قىتايلىق بانكپەن بىرلەسىپ، مۇنايدى وڭدەۋ جانە مەتاللۋرگيا سالاسىنداعى ٴىرى يندۋستريالىق جوبالاردى تابىستى جۇزەگە اسىرعان بولاتىن.

تەگي
• قازاقستان
• ەكونوميكا

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!