BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پەتروپاۆلدىڭ كىرە بەرىسىنە جىراۋدىڭ ەسكەرتكىشى قويىلادى

پەتروپاۆلدا كوپشىلىك «دسر» دەپ اتاپ كەتكەن شاعىن اۋدانداعى جەكە تۇرعىن ۇيلەر ٴسۇرىلىپ جاتىر. ولاردىڭ ورنىن ٴزاۋلىم عيماراتتار باسپاق. جاڭا اۋدان «جاس وركەن» دەگەن اتقا يە بولىپ، كوشەنىڭ باسىنا قوجابەرگەن جىراۋدىڭ ەسكەرتكىشى قويىلماق. قازىرگى تاڭدا ەل ساۋلەتشىلەرى اراسىندا ەسكەرتكىشتىڭ جوباسىنا بايقاۋ جاريالاندى، دەپ حابارلايدى baq.kz ٴتىلشىسى.

بۇگىندە تەرەزەلەرىنە دەيىن جەرگە كىرىپ كەتكەن، كەيبىرىنىڭ سالىنعانىنا عاسىرعا جۋىق ۋاقىت وتكەن ەسكى لاشىقتار ٴسۇرىلىپ جاتىر. ورنىنا اسپانمەن تالاسقان ٴزاۋلىم تۇرعىن ٴۇي كەشەندەرى، زاماناۋي الەۋمەتتىك-مادەني نىساندار بوي كوتەرمەك.

«جوسپار اۋقىمدى. جۇمىستى قالاعا كىرە بەرىستەگى كوپىردى جاڭارتۋدان باستاپ جاتىرمىز. كوشە بويىنداعى ەسكى ۇيلەر سۇرىلۋدە، سۇرىقسىز دۇڭگىرشەكتەر الىنىپ تاستالۋدا. قازىرگى تاڭدا جامبىل كوشەسى مەن تاعى ەكى كوشەگە جارىق-ديودتى جانە قۋات ۇنەمدەيتىن شامدار ىلىنۋدە. جاسىل جەلەك ەگىلىپ، ٴساندى قورشاۋلار ورناتىلادى. ٴبىر سوزبەن قالانىڭ كىرە بەرىسى جاڭا كەيىپكە ەنەدى»، – دەيدى پەتروپاۆل قالاسىنىڭ اكىمى مارات تاسماعامبەتوۆ.

جامبىل كوشەسى بويىندا جاڭارتىلاتىن اۋماق 62 گەكتاردى الىپ جاتىر. سالىناتىن نىساندار ىشىنەن الەمدىك ستاندارتتارعا ساي تەننيس ورتالىعىن، پروكۋراتۋرا عيماراتىن، وقۋشىلار سارايىن جانە زاماناۋي تەاتردى ەرەكشە اتاپ وتكەن ٴجون. وقۋشىلار سارايىنىڭ جالپى اۋدانى 13،5 مىڭ شارشى مەتردى قۇراماق، 1800 بالاعا شاقتالعان. ۇيىرمەلەرگە ارنالعان 40 بولمە، 4 شەبەرحانا، 8 زەرتحانا جانە 3 كورمە زالى جوبالانعان. بۇلاردان بولەك كونسەرت، كونفەرەنسيا، ارت زالدارى مەن مۇراجاي، دىبىس جازۋ ستۋدياسى، مەدياتەكا بولادى. جانە ٴوڭىرىمىزدىڭ بىلىكتى it ماماندارىنا ارنالعان ورتالىق تا وسىندا ورنالاسادى.

ال امبەباپ تەننيس ورتالىعىندا ٴبىر مەزەتتە مىڭ كورەرمەن سياتىن زال بولادى. كەشەندە 4 جابىق جانە ٴۇش اشىق تەننيس كورت جابدىقتالماق. كەيبىر كورتتار قاجەت بولعان جاعدايدا باسكەتبول جانە ۆولەيبول وينايتىن الاڭدارعا اينالدىرىلماق. جوبا قۇنى 1،8 ملرد. تەڭگە. قالا اكىمىنىڭ سوزىنشە، مەملەكەتتىك-جەكەشەلىك ارىپتەستىك بويىنشا سالىنىپ جاتقان جاڭا نىسان تەك سپورتتىق قانا ەمەس، بۇقارالىق جانە مادەني شارالاردى وتكىزۋگە دە ىڭعايلى.

رەسپۋبليكالىق بيۋدجەت قارجىسىنا بوي كوتەرەتىن وبلىستىق پروكۋراتۋرا عيماراتى دا قالاداعى ەڭسەلى نىسانداردىڭ ٴبىرى بولماق. 500 كورەرمەنگە ارنالعان زالى بار تەاتر عيماراتى يسمايلوۆ-جامبىل-چەليۋسكين كوشەلەرى تۇيىسەتىن تۇستا سالىنباق. قازىرگى تاڭدا جوبالىق-سمەتالىق قۇجاتتارىنا تۇزەتۋ ەنگىزۋ جۇمىستارى جالعاسۋدا. ولاردان بولەك بىرنەشە تۇرعىن ٴۇي كەشەندەرى بوي كوتەرەدى. ەڭ بيىك ٴۇي 18 قاباتتان تۇرماق. ٴقازىردىڭ وزىندە «كازگرادستروي» قۇرىلىس كومپانياسى سالعان «مەچتا» جانە «قىزىلجار» تۇرعىن ٴۇي كەشەندەرى كوشەگە كورىك بەرىپ تۇرعانى انىق. سوڭعى ۇلگىدە جابدىقتالعان سپورت سارايىنىڭ دا قىسى-جازى ەسىگى ٴبىر جابىلعان ەمەس.

«مەن «جاس وركەن» اۋدانىندا 5 جىلدان بەرى تۇرامىن. سوڭعى 2-3 جىل ىشىندە ول قاتتى وزگەردى. سپورت سارايى سالىندى. ەندى وقۋشىلار سارايىنىڭ سالىناتىنىن ەستىپ قۋانىپ جاتىرمىز. ٴبىزدىڭ قالامىزعا وسىنداي مادەنيەت ورىندارى كەرەك-اق. ٴزاۋلىم ۇيلەر دە بوي كوتەرىپ جاتىر. بۇرىنعى ايقىش-ۇيقىش جولدار جوندەلدى. قالامىزدىڭ وسىلاي كوركەيىپ كەلە جاتقاندىعى قۋانتادى»، - دەيدى قالا تۇرعىنى ەركەگۇل ەسماعۇلوۆا.

بۇگىنگى تاڭدا پەتروپاۆل قالاسى بويىنشا 13 مىڭداي ادام باسپانا كەزەگىندە تۇر ەكەن. بيىل جىل سوڭىنا دەيىن ٴبىر مىڭنان استام پاتەر پايدالانۋعا بەرىلەدى. ال «جاس وركەننىڭ» تۇرعىن ٴۇي كەشەندەرىنىڭ قۇرىلىسى بىتكەن كەزدە قونىس تويلارى ەسەلەپ كوبەيەتىنى انىق.

«جاس وركەن» شاعىن اۋدانىندا 11 تۇرعىن ٴۇي كەشەنى سالىنادى دەپ جوسپارلانعان. بۇل شامامەن ەكى مىڭداي پاتەر. تۇرعىن ٴۇي كەشەندەرى الەمنىڭ وزىق ۇلگىلەرى بويىنشا تۇرعىزىلماق. مىسالى ٴقازىر ٴبىز 332 پاتەرلىك باسپانانى سالۋعا بايقاۋ جاريالادىق. ٴبىر ۇيدە مىڭنان استام ادام تۇرادى دەگەن ٴسوز. بۇل ٴبىر اۋىلدىڭ حالقىنا تەڭ. سوندىقتان ٴۇيدىڭ ٴبىرىنشى قاباتىنا سابيلەرگە ارنالعان شاعىن ورتالىق ورنالاستىرىلادى»، – دەيدى پەتروپاۆل قالاسىنىڭ اكىمى.

باسپانالاردىڭ دەنى مەملەكەتتىك «نۇرلى جەر» باعدارلاماسى بويىنشا سالىنباق. سونىمەن قاتار، جەكە ينۆەستيسيا ەسەبىنەن دە تۇرعىزىلاتىندارى بار. وسىلايشا ەلىمىزدەگى ەڭ كونە قالالاردىڭ ٴبىرى قىزىلجار جاسارىپ، بۇرىنعىسىنان دا جايناي تۇسپەك.

فوتو: اۆتور


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي