BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

نۇرلى جەر: حالىقتى باسپانامەن كوبىرەك قامتىعان وبلىستار بەلگىلى بولدى

2017 جىلى «نۇرلى جەر» باعدارلاماسى ارقىلى 11،2 ملن شارشى مەتر تۇرعىن ٴۇي پايدالانۋعا بەرىلدى. وڭىرلەردە باسپانانى قولدانىسقا بەرۋ بويىنشا باتىس قازاقستان، وڭتۇستىك جانە قوستاناي وبلىسى الدا كەلەدى، دەپ حابارلايدى baq.kz اقپارات اگەنتتىگى.

بيىل «نۇرلى جەر» باعدارلاماسىنىڭ باستالعانىنا 1 جىل بولدى. وسى ۋاقىت ارالىعىندا ەلباسى ۇسىنعان جوبا ارقىلى 100 مىڭ 812 باسپانا پايدالانۋعا بەرىلدى. ونىڭ 72 مىڭ ٴ904-ى كوپقاباتتى، ال قالعان 27 مىڭ ٴ908-ى جەكە ۇيلەر. وڭىرلەردە باسپانانى قولدانىسقا بەرۋ بويىنشا 42،4 پايىزبەن باتىس قازاقستان، 36،2 پايىزبەن وڭتۇستىك جانە قوستاناي وبلىسى 35،6 پايىزبەن الدا كەلەدى.

اتالعان باعدارلامانىڭ ٴبىرىنشى باعىتى بويىنشا، وڭىرلەردە ساتىپ الۋ قۇقىعىنسىز جالعا بەرىلەتىن جالپى الاڭى 288 مىڭ شارشى مەتر بولاتىن تۇرعىن ۇيلەردىڭ قۇرىلىسى ٴجۇرىپ جاتىر. بۇل شامامەن 5 376 پاتەر. وتكەن جىلدىڭ 12 ايىندا حالىقتىڭ الەۋمەتتىك ٴالسىز توپتارىنا 2 620 باسپانا بەرىلگەن. جوسپار بويىنشا اتالعان جۇمىستار 2019 جىلعا دەيىن اياقتالادى. بۇل رەتتە رەسپۋبليكالىق بيۋدجەتتەن 25 ملرد تەڭگە ٴبولىنىپ وتىر.

سونىمەن قاتار، «نۇرلى جەر» باعدارلاماسى اياسىندا تۇرعىن ٴۇي قۇرىلىسى ٴجۇرىپ جاتقان اۋداندارعا، سونىڭ ىشىندە جەكە تۇرعىن ٴۇي سالىنىپ جاتقان جەرلەرگە ينجەنەرلىك كوممۋنيكاسيا تارتۋ شارالارى دا اتقارىلۋدا. قازىرگى ۋاقىتتا 70،3 مىڭ ۋچاسكەدە جەلى تارتۋ جۇمىستارى جۇرگىزىلىپ جاتىر.

باعدارلامانىڭ ٴۇشىنشى باعىتى اياسىندا، ياعني، كرەديتتىك تۇرعىن ٴۇي قۇرىلىسى بويىنشا ەلىمىزدە 16 مىڭ 217 پاتەر قولدانىسقا بەرىلدى.

ال جەكە قۇرىلىس سالۋشىلاردى ىنتالاندىرۋ ٴۇشىن ەكىنشى دەڭگەيلى بانكتەر ولارعا 2017-2018 جىلدارى 152 ملرد تەڭگە زايم بەرەدى. بۇل سوماعا جەكە قۇرىلىس سالۋشىلار 600 مىڭ شارشى مەتر تۇرعىن ٴۇي سالۋلارى كەرەك.

يپوتەكالىق نەسيە بەرۋدىڭ قولجەتىمدىلىگىن جوعارىلاتۋ ماقساتىندا «نۇرلى جەر» باعدارلاماسى ارقىلى 120 ملرد تەڭگەگە 8 مىڭ زايم بەرۋ جوسپارلانعان. 2017 جىلى جالپى سوماسى 13،4 ملرد تەڭگە بولاتىن 1،3 مىڭ زايم بەرىلگەن. ال بيىلعى ماقسات - جالپى سوماسى 106،6 ملرد تەڭگە بولاتىن 6،7 مىڭ زايم بەرۋ.

بيىل اتالعان باعدارلاما اياسىندا تاعى دا 100 مىڭ پاتەر پايدالانۋعا بەرىلەدى دەپ جوسپارلانىپ وتىر.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي