BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«نۇرلى جەر» اياسىندا باسپانا كىمدەرگە بەرىلەتىنى بەلگىلى بولدى

فوتو: 365info.kz

ەلىمىزدە «نۇرلى جەر» باعدارلاماسى اياسىندا الداعى 15 جىلدا ساتىپ الۋ قۇقىعىنسىز بەرىلەتىن جالدامالى جانە كرەديتتىك باسپانا سالىنادى. ەندى جالدامالى تۇرعىن ٴۇي مۇگەدەكتەر مەن جەتىم بالالارعا عانا بەرىلمەك. ال قالعان ازاماتتار تۇرعىن ٴۇي قۇرىلىس جيناق جۇيەسى ارقىلى كرەديتتىك باسپانا الۋ مۇمكىندىگىنە يە، دەپ حابارلايدى sputnik قازاقستان.

ەلىمىزدە بىرنەشە جىل بويى الدىمەن وڭىرلەردى دامىتۋ، ودان كەيىن «نۇرلى جول» باعدارلاماسى اياسىندا ساتىپ الۋ قۇقىعىمەن جالدامالى ۇيلەر سالىندى. بۇل ۇيلەردىڭ بارلىعى بيىلعى جىلدىڭ سوڭىنا دەيىن تۇگەل تاپسىرىلىپ، ازاماتتارعا ون بەس جىلعا جالعا بەرىلەدى. وسى ۋاقىتتا ولار باسپانانى مەرزىمىنەن بۇرىن ساتىپ الا الادى. اۋەلى العاشقى بەس جىلدا تۇرعىندار جالداپ وتىرعان ٴۇيىن مەنشىگىنە الا المايتىن ەدى، ەندى «نۇرلى جەر» باعدارلاماسىنا ٴتيىستى وزگەرتۋلەر ەنگىزىلىپ، باسپانانى ساتىپ الۋ قۇقىعىنا يە بولدى.

ال بيىلعى جىلدان باستاپ «نۇرلى جەر» باعدارلاماسى اياسىندا ساتىپ الۋ قۇقىعىنسىز بەرىلەتىن جالدامالى باسپانا سالىنا باستايدى. قاراجات رەسپۋبليكالىق بيۋدجەتتەن تىكەلەي جەرگىلىكتى اتقارۋشى ورگاندارعا بولىنبەك. ٴبىراق بۇل ۇيلەر ٴبىرىنشى ساناتتاعى مۇگەدەكتەر مەن جەتىم بالالارعا عانا قاراستىرىلعان. بار بولعانى ولار 500-600 تەڭگە كولەمىندە ەكسپلۋاتاسيالىق شىعىنداردى عانا وتەيدى. جالپى، رەسپۋبليكا بويىنشا جىل سايىن 3 مىڭ پاتەردەن 15 جىلدا 45 مىڭ پاتەر تاپسىرىلماقشى. ال قالعان ساناتتاعى ازاماتتار ٴۇشىن كرەديتتىك باسپانا سالىنادى. بۇل ۇيلەر تۇرعىن ٴۇي قۇرىلىس جيناق جۇيەسى ارقىلى بەرىلەدى.

باعدارلاماعا جاۋاپتى مينيسترلىك وكىلىنىڭ ايتۋىنشا، كرەديتتىك تۇرعىن ٴۇيدىڭ باعاسى نارىقتاعىدان الدەقايدا ارزان بولادى.

«ەندى 25 جاسقا، 35 جاسقا، جاس وتباسىلارعا دەگەن ٴبولىنۋ بولمايدى. تولەۋ مۇمكىنشىلىگى بار جانە تولەۋ مۇمكىنشىلىگى جوق ازاماتتار دەپ قاراستىرىلادى. تولەۋ مۇمكىنشىلىگى جوق ازاماتتار ٴۇشىن جالعا بەرىلەتىن، ٴبىراق ساتىلمايتىن ۇيلەر، ال تولەۋ مۇمكىنشىلىگى بار تۇرعىندار ٴۇشىن كرەديتتىك باسپانا سالىنادى. بۇكىل وڭىرلەردە كرەديتتىك باسپانانىڭ شارشى مەترى 140 مىڭ، تەك استانا، الماتى، اقتاۋ، اتىراۋ قالالارىندا عانا 180 مىڭ تەڭگە بولادى. بۇل ارزان، نارىقتاعى باعا بۇدان جوعارى. مەملەكەتتىڭ كومەگى وسى»، — دەپ اتاپ ٴوتتى ماجىلىستە وتكەن وتىرىستا قر ينۆەستيسيالار جانە دامۋ مينيسترلىگىنىڭ قۇرىلىس ىستەرى كوميتەتىنىڭ ٴتوراعاسى مارحابات جايىمبەتوۆ.

بۇدان بولەك، مەملەكەتتىك باعدارلاماعا قاتىسۋشىلار ٴۇشىن تاعى ٴبىر جەڭىلدىك كوزدەلىپ وتىر.

«ەكىنشى، پاتەر الۋ ٴۇشىن جيناۋ قاجەت قاراجاتتىڭ سوماسىن 50 پايىزدان 30 پايىزعا دەيىن ٴتۇسىردى. تاعى دا «نۇرلى جەرگە» وزگەرىس ەنگىزىپ، مەملەكەتتىك باعدارلاما بويىنشا 15 پايىزعا دەيىن ٴتۇسىرۋدى قاراستىرىپ جاتىرمىز»، — دەدى ول.

بۇل باعىت بويىنشا ەلىمىزدە 15 جىلدا شامامەن 285 مىڭ وتباسى باسپانالى بولادى. ايتپاقشى، «نۇرلى جەر» باعدارلاماسىندا باسپانالى بولۋدىڭ باسقا دا جولدارى بار. ماسەلەن، ازاماتتارعا بۇكىل ينفراقۇرىلىمى تارتىلعان جەر ۋچاسكەلەرى بولىنەدى. بۇدان بولەك، جەڭىلدەتىلگەن يپوتەكا قاراستىرىلعان. ياعني، بانكتىڭ پايىزدىق مولشەرلەمەسىنىڭ جەتى پايىزىن مەملەكەت وتەيدى. ٴدال وسىنداي مۇمكىندىك قۇرىلىس كومپانيالارىنا دا جاسالماقشى.

وسى جۇمىستاردىڭ ناتيجەسىندە 15 جىلدا 1،5 ميلليون وتباسى باسپانالى بولادى دەپ جوسپارلانىپ وتىر.

بۇگىنگى كۇنى ەلىمىزدە 2،5 ميلليون ادام باسپاناعا مۇقتاج. 1 ملن 300 ادام 10 سوتىق جەر الۋعا، 428 مىڭنان استام ادام اكىمدىكتەردە كەزەكتە تۇر. ال 800 مىڭ ادام — تۇرعىن ٴۇي قۇرىلىس جيناق بانكىنىڭ سالىمشىسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي