پاتەر العىسى كەلەتىندەرگە جاقسى جاڭالىق

فوتو: Шыңғыс Қаппаров

بۇگىن «نۇرلى جەرگە» جاۋاپتى مەكەمەلەردىڭ وكىلدەرى اتالعان باعدارلامانى ىسكە اسىرۋداعى نەگىزگى ماسەلەلەر تۋرالى ايتتى. «نۇرلى جەر» بويىنشا ٴدال ٴقازىر بىلۋگە لايىق نە بار؟ baq.kz اقپارات اگەنتتىگى تۇرعىنداردى قولجەتىمدى باسپانامەن قامتۋ ىسىندەگى نەگىزگى مالىمەتتەرگە توقتالادى.

«نۇرلى جەر» ارقىلى جىل سوڭىنا دەيىن قانشا پاتەر سالىنادى؟

ينۆەستيسيالار جانە دامۋ ۆيسە-مينيسترى رومان سكليار ايتقانداي، 2017 جىلدىڭ 7 ايىنىڭ قورىتىندىسىنا سايكەس ەلىمىزدە

• تۇرعىن ٴۇي قۇرىلىسىنا 445 ملرد تەڭگە ٴبولىندى
• جالپى اۋدانى 6،2 ملن شارشى مەتردى قۇرايتىن تۇرعىن ٴۇي پايدالانۋعا بەرىلدى ونىڭ 75،5 ملرد تەڭگەسى مەملەكەتتىك ينۆەستيسيالار
• ناتيجەدە مەملەكەت قارجىسى ەسەبىنەن 8 829 پاتەر سالىندى

ال جىلدىڭ اياعىنا دەيىن 25 005 پاتەر سالىنادى.

7 اي قورىتىندىسى بويىنشا جالپى اۋدانى 6،2 ملن شارشى مەتردى قۇرايتىن تۇرعىن ٴۇي پايدالانۋعا بەرىلدى دەدىك. بۇل «نۇرلى جەر» مەملەكەتتىك باعدارلاماسى جوسپارىنىڭ 61%-ى. 2016 جىلدىڭ وسى ۋاقىتىمەن سالىستىرعاندا جوسپار 8،2%-عا ارتىق ورىندالعان.

قاي وڭىرلەر الدا كەلەدى؟ تۇرعىن ۇيلەردى سالۋ بويىنشا استانا، الماتى، ماڭعىستاۋ جانە وڭتۇستىك قازاقستان وبلىستارى جوعارى كورسەتكىشتەرگە يە. ماڭعىستاۋ، قىزىلوردا، اتىراۋ جانە باتىس قازاقستان وبلىستارىندا جەكە تۇرعىن ۇيلەردىڭ ۇلەسى باسىم.

«جاقسى جاڭالىعىم بار!»

بيىل تۇرعىن ٴۇي قۇرىلىس جيناق بانكى كەپىلسىز كرەديت بەرە باستايدى. مۇنى راسىندا بۇگىنگى جيىننىڭ باستى جاڭالىعى دەۋگە بولادى.

قىركۇيەك ايىنان تۇرعىن ٴۇي قۇرىلىس جيناق بانكى ارنايى جوبانى جۇزەگە اسىرا باستاماق. ەندى پاتەردى كەپىلسىز كرەديت ارقىلى الۋىمىزعا بولادى.

«جاقسى جاڭالىعىم بار. قازاقستاندا تۇرعىن ٴۇي قۇرىلىسىنا كەپىلدىك بەرۋ قورى ازاماتتارعا ۇلەسكەرلىك قۇرىلىسقا قاتىسۋعا مۇمكىندىك بەرەدى. «بايتەرەك» حولدينگىنىڭ ەنشىلەس كومپانياسى قۇرىلىستى اياقتاۋعا كەپىلدىك بەرۋ ٴۇشىن قۇرىلدى. وسىعان وراي ٴبىز العاشقى جوبانى قولعا الدىق. قىركۇيەك ايىنان باستاپ «ميللەنيۋم پارك» تۇرعىن ۇيىنە قۇجاتتاردى قابىلداي باستايمىز. مۇنداعى پاتەردىڭ ٴبىر شارشى مەترى 290 مىڭ تەڭگەدەن باستالادى. ٴبىز وسى ٴۇيدى ٴوز سالىمشىلارىمىزعا بەرەمىز» دەدى «قازاقستاننىڭ تۇرعىن ٴۇي قۇرىلىس جيناق بانكى» اق باسقارما ٴتورايىمى ٴلاززات يبراگيموۆا.

كەپىلدىكتى ۇلەسكەرلىك قۇرىلىسىنا قاتىسۋ شارتى بەرەدى. سەبەبى، جوعارى اتالعان نىسان «بازيس ا» كومپانياسىنا تيەسىلى. ول تۇرعىن ٴۇي قۇرىلىسى كەپىلدىك بەرۋ قورىنان كەپىلدىك العان. بۇل - «نۇرلى جەر» مەملەكەتتىك باعدارلاماسىنىڭ ٴبىر كومپەنتەنتى.

«قازاقستاننىڭ تۇرعىن ٴۇي قۇرىلىس جيناق بانكى» اق باسقارما ٴتورايىمى بارلىق تىلەك بىلدىرۋشىلەردى باعدارلاماعا قاتىسۋعا شاقىردى.

استانادا پاتەر ارزانداپ جاتىر

مۇنى دا قاراپايىم حالىق ٴۇشىن جاعىمدى جاڭالىق دەۋگە بولادى. ەلوردادا پايدالانۋدا بولعان تۇرعىن ۇيلەر رىنوگىندا توقىراۋ بار. بۇعان نە سەبەپ؟

2016 جىلدىڭ وزىندە 89 مىڭ پاتەر قولدانىسقا بەرىلىپتى. ۇسىنىستىڭ كوپتىگى ەسكى ۇيلەردىڭ باعاسى تومەندەۋىنە اسەر ەتىپ جاتىر.

وسى جىلدىڭ 4 ايىندا تاعى 37 مىڭ پاتەر پايدالانۋعا بەرىلدى. نەگىزگى ينۆەستيسيالىق قىزىعۋشىلىق استانادا. جاڭا كوپتەپ ۇيلەر سالىنىپ جاتىر. ول قولدانىستا بولعان ۇيلەر باعاسىنا اسەر ەتىپ، باعانى تومەندەتۋدە، دەيدى

ٴلاززات يبراگيموۆا. الايدا، ول قىركۇيەك ايىندا پاتەر باعاسى قۇلدىرايدى دەگەن بولجام نەگىزسىز دەپ ويلايتىنىن ايتتى.

«پاتەرلەرگە سۇرانىس بار. وتكەن اپتادا تجقب-نىڭ استاناداعى فيلاليىندا ٴبىر كۇندە 50 قارىز بەرىلدى. سوندىقتان رەسپۋبليكا بويىنشا سۇرانىس بار. مەنىڭ ويىمشا، پاتەرلەردىڭ باعاسى جوعارىدا ايتىلعانداي تومەندەمەيدى. تەك باعا تۇراقتالادى. ٴبىزدى باعالاردىڭ تۇراقتاعانى قۋانتادى. سەبەبى، باعا تەڭگەمەن بەلگىلەنەدى. ٴبىزدىڭ جيناعان اقشامىز دا تەڭگەمەن ساقتالادى. نەگىزگى ماقساتىمىز بولعان دەدوللاريزاسياعا قول جەتكىزىپ وتىرمىز. بىزدە وتكەن جىلدارداعىداي ەشكىم پاتەرىنىڭ باعاسىن دوللارمەن كورسەتپەيدى» دەدى ول.

استانادا پاتەر الۋ ٴۇشىن ايىنا قانشا تەڭگەدەن جيناۋ كەرەك؟

ايىنا 40 مىڭ تەڭگە جيناپ، پاتەر الۋعا مۇمكىندىگىمىز بار. ماسەلە نەنى تاڭدايتىنىمىزدا. پاتەر مە، الدە ويىن-ساۋىق پا؟ «قازاقستاننىڭ تۇرعىن ٴۇي قۇرىلىس جيناق بانكى» اق باسقارما ٴتورايىمى ٴلاززات يبراگيموۆا ماسەلەنى وسىلاي قويادى.

جۋرناليست ودان «قاراپايىم تۇرعىن استانادا پاتەر الۋ ٴۇشىن قانشا تابىس تابۋى قاجەت؟» دەپ سۇراعان بولاتىن.

يبراگيموۆانىڭ ايتۋىنشا، استانادان پاتەر الۋ ٴۇشىن تابىس كولەمى ايىنا 150 مىڭ تەڭگە بولسا جەتكىلىكتى. تەك ونىڭ 40 مىڭىن دەپوزيتكە سالىپ وتىرۋى كەرەك. ٴبىر دەپوزيتكە اي سايىن ەڭ جوعارى سوما 40 مىڭ تەڭگە سالسا، ول 12 ايدا 480 مىڭ تەڭگە جينايدى. مەملەكەت قوسىمشا 96 مىڭ تەڭگە الادى. بانك تاعى 2% بەرەدى. جالپى ول بارلىعىن قوسقاندا ٴبىر جىلدا 600 مىڭعا جۋىق تەڭگە جينايدى. ول 3 ٴۇش جىلدا 1 ملن 800 تەڭگە بولادى.

«ارينە بارلىعىن ۇنەمدەۋگە تۋرا كەلەدى. ول مەيرامحاناعا، كافەگە جانە كوڭىل كوتەرۋدى ۇمىتادى. پاتەر نەمەسە كوڭىل كوتەرۋ، وسى ەكەۋىنىڭ بىرەۋىن تاڭداۋ كەرەك» دەپ كەڭەس بەرەدى بانك باسشىسى.

يبراگيموۆا ٴسوز اراسىندا وڭىرلەردە ٴۇي الۋ جەڭىلدەۋ ەكەندىگىن ايتتى.

«استانا مەن الماتى قالالارىنان ٴۇي الۋعا كونكۋرس جوعارى. ال وڭىرلەردە: تاراز، قىزىلوردا، ورال قالالارىندا اكىمدىكتەر ۇسىنعان كوپ تۇرعىن ٴۇي بار. ول جاققا دايىن باستاپقى جارنامەن كەلە الاسىزدار»دەدى ٴلاززات يبراگيموۆا.

تاعى نەنى ايتۋعا بولادى؟

• بيىل 60 مىڭ جەر ۋچاسكەسىن بەرۋ جوسپارلانسا، قازىرگى تاڭدا ونىڭ 23 مىڭى ازاماتتارعا بەرىلگەن
• استانا ماڭىنداعى يلينكا كەنتىنە ينفراقۇرىلىم تارتىلىپ جاتىر
• ول جەرگە بيىل 8 ملرد تەڭگە ٴبولىندى. جىل سوڭىنا دەيىن جۇمىستار اياقتالادى.
• استانا، الماتى قالالارىندا جەكە مەنشىككە جەر قاراستىرىلماعان. ال وبلىس ورتالىقتارى مەن بارلىق ەلدى مەكەندە جەر تەلىمدەرى بار. ياعني 10 سوتىقتان بەرىلۋدە.
• ماڭعىستاۋ، قىزىلوردا، اقتوبە وبلىستارىندا قارقىندى تۇردە جەكەمەنشىككە ون سوتىق جەرلەرگە ينفراقۇرىلىم تارتىلۋدا

«جىل سايىن وسى باعىتقا 80 ملرد تەڭگە قارجى ٴبولىنىپ وتىر. 15 جىلدىڭ ىشىندە 1 ترلن 200 ملرد قارجى يگەرىلمەك. جالپى 15 جىلدا 600 مىڭنان استام جەر تەلىمى بەرىلەدى دەپ جوسپارلانۋدا. جەتى ايدىڭ ىشىندە 23 مىڭ جەر ۋچاسكەسى بەرىلدى. جىل سوڭىنا دەيىن جوسپار بويىنشا بارلىق 60 مىڭ جەر تەلىمى ەل تۇرعىندارىنا تاپسىرىلادى دەپ جوسپارلانۋدا» دەيدى قۇرىلىس، تۇرعىن ٴۇي كوممۋنالدىق شارۋاشىلىق ىستەرى جانە جەر رەسۋرستارىن باسقارۋ كوميتەتىنىڭ ٴتوراعاسى مارحابات جايىمبەتوۆ.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!