استانا: 
2624 
0
اقتوبەدە «نۇرلى جەر» باعدارلاماسى اياسىندا دايىن ٴۇي جوباسى جۇزەگە اسىرىلىپ جاتىر. وبلىس ورتالىعىنداعى «نۇر اقتوبە» اۋدانىندا ەكى ٴتيپتى كوتتەدجدەردىڭ قۇرىلىسى باستالدى. 2006 جىلى تۇرعىن ٴۇي سالۋعا جەر كەزەگىنە تۇرعان 11 مىڭنان استام اقتوبەلىكتىڭ ٴ300-ى باعدارلاماعا قاتىسۋعا ٴوتىنىش بىلدىرگەن، دەپ حابارلايدى baq.kz ٴتىلشىسى.
اقتوبەدەگى «نۇر اقتوبە» اۋدانىندا بيىل كۇزگە دەيىن 194 تۇرعىن ٴۇيدىڭ قۇرىلىسى اياقتالادى. كولەمى 120-140 شارشى مەترلىك ەكى ٴتيپتى كوتتەدجدەر 2006 جىلى جەر كەزەگىنە تۇرعان ازاماتتارعا ۇسىنىلادى. «نۇرلى جەر» باعدارلاماسى ارقىلى سالىنىپ جاتقان باسپانانىڭ شارشى مەترى 120 مىڭ تەڭگەدەن اسپايدى. ٴقازىر اقتوبە قالاسىندا 118 551 ازامات جەر كەزەگىندە تۇر.
«مۇمكىندىگىنە قاراي وسى 194 ٴۇيدىڭ يەسىن انىقتاۋ ٴۇشىن ٴوتىنىم بەرگەن ادامداردى بانككە تولەم قابىلەتتەرىن انىقتاۋ ٴۇشىن جولدايمىز. ەگەر كەلىسىم بويىنشا تالاپتارعا سايكەس كەلىپ جاتسا، جەر ۋچاسكەلەرىن وسى ۇستىندەگى سالىنعان قۇرىلىسىمەن بىرگە تابىستاۋ ماسەلەسىنە قاتىستى قۇجاتتار راسىمدەلەتىن بولادى»، - دەيدى اقتوبە قالالىق جەر قاتىناستارى ٴبولىمىنىڭ باسشىسى ۇشقىن مىڭبايەۆ.
پيلوتتىق جوبا وڭىرىمىزدە العاش رەت جۇزەگە اسىرىلماقشى. دايىن ۇيلەر «تۇرعىن ٴۇيقۇرىلىس جيناق بانكى» ارقىلى 15 جىلعا نەسيەگە بەرىلەدى. باسپانا الاتىندار ٴۇي قۇنىنىڭ 30 پايىزىن العاشقى جارنا رەتىندە تولەۋى كەرەك. بۇگىنگە دەيىن جەر كەزەگىندە تۇرعان ازاماتتاردىڭ 306-سى «نۇرلى جەر» باعدارلاماسىنا قاتىسۋعا نيەت بىلدىرگەن. ونىڭ ىشىندە 151،2 شارشى مەترلىك تۇرعىن ۇيگە – 106، 140،9 شارشى مەترلى باسپاناعا – 71، 121،9 شارشى مەترىنە – 56 ادام ٴوتىنىش بەرگەن. ٴقازىر بۇل اقتوبەلىكتەردىڭ جازعان وتىنىشتەرى كەزەكتىلىگىنە سايكەس ىرىكتەلىپ جاتىر. 266 ازاماتقا تولەم قابىلەتتىلىكتەرىن انىقتاۋ ٴۇشىن جولداما بەرىلگەن.
«نەسيەنىڭ جالپى مەرزىمى 15 جىل. 5 جىل 5 پايىزبەن تولەنەدى. ودان كەيىن پايىزى 4،5-عا ازايادى. ياعني، العاشقى 5 جىلدا 120 شارشى مەترگە اي سايىن 100 مىڭ تەڭگە تولەسە، 5 جىلدان كەيىن ونىڭ تولەمى 30 پايىزعا دەيىن ازايادى. سوندا قالعان 10 جىلعا 70 مىڭ تەڭگەدەن تولەيدى»، - دەدى «تۇرعىن ٴۇي قۇرىلىس جيناق بانكى» اق ديرەكتورى باۋىرجان جۋاسبايەۆ.
تۇرعىن ۇيلەرگە پايدالانىلاتىن ماتەريالداردىڭ 80 پايىزى جەرگىلىكتى ونىمدەر. قالعان 20 پايىزى وزگە وڭىرلەر مەن شەتەلدەردەن جەتكىزىلەدى. مامانداردىڭ ايتۋىنشا، بارلىق جاعداي جاسالعان باسپانالار قۇر جەر العاننان تيىمدىرەك. ٴقازىر «نۇر اقتوبە» شاعىن اۋدانىندا «نۇرلى جەر» باعدارلاماسى بويىنشا سالىناتىن قۇرىلىستارعا ينجەنەرلىك جەلىلەر جۇرگىزۋ باستالدى. ال، 2006 جىلى كەزەكتە تۇرعاندارعا جەر ۋچاسكەسى قالا ماڭىنداعى جاڭاقونىس، باۋىرلاستار اۋىلدارى مەن 41 رازەزدەن بەرىلەدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2516
0