BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

15 جىل بويى پاتەر جالداساق تا، ٴوز ۇيىمىزگە اقشا جينادىق – جانات بازاربايەۆا

مەملەكەتتىك باعدارلامانىڭ العاشقى 455 قاتىسۋشىسى تۇرعىن ٴۇي قۇرىلىس جيناق بانكىمەن («بايتەرەك» حولدينگىنىڭ ەنشىلەس ۇيىمى) ساتىپ الۋ-ساتۋ كەلىسىمشارتىن بەكىتىپ، جاڭا پاتەرگە كوشىپ كىرۋگە دايىن. ۇيلەر اقتاۋ قالاسىنداعى «ايراقتى» تۇرعىن ٴۇي كەشەنىندە ورنالاسقان، دەپ حابارلايدى baq.kz اقپارات اگەنتتىگى.

تازا ارلەۋدەگى پاتەرلەردىڭ 1 شارشى مەترىنىڭ باعاسى 154 510-163 618 تەڭگە ارالىعىندا.

بۇل ۇيلەردى جەڭىلدەتىلگەن باعامەن ساتىپ الۋ ٴۇشىن بانك سالىمشىلارىنا شوتقا 30% كولەمىندەگى ەڭ تومەنگى باستاپقى جارنا جيناۋ نەمەسە سالۋ قاجەت بولدى. بۇل – «نۇرلى جەر» باعدارلاماسىنىڭ تالابى. مىسالى، باعاسى 7 ملن تەڭگە بولاتىن ٴبىر بولمەلى پاتەردى ساتىپ الۋ ٴۇشىن تۇرعىن ٴۇي قۇرىلىس جيناق بانكىندەگى شوتقا 2 100 000 تەڭگە جيناۋ قاجەت ەدى. بۇل جاعدايدا العاشقى ٴۇش جىل ىشىندەگى اي سايىن تولەنەتىن سوما 60 800 تەڭگە، ال ٴۇش جىلدان كەيىن 56 800 تەڭگەنى قۇرايدى.

«باسپانالى بولعانداردىڭ جارتىسى، دالىرەك ايتقاندا 253 ادام شوتتارىنا قاجەت سومانىڭ 50%-ىن جيناپ، پاتەرلەردى اسا ٴتيىمدى شارتتارمەن ساتىپ الا الادى. جەتپەيتىن سومانى بانك جىلدىق مولشەرلەمەسى 5% بولاتىن زاەم تۇرىندە بەردى. بۇل – تۇرعىن ٴۇي قۇرىلىس جيناق جۇيەسىنىڭ ارتىقشىلىقتارىن جاقسى بىلەتىن، تارتىپكە ۇيرەنگەن، ماقساتىنا جەتە بىلەتىن جاندار. تاعى 202 سالىمشى دەپوزيتتەرىندە 30% كولەمىندەگى ەڭ تومەنگى باستاپقى جارنانى جيناي الدى. ولار دا جەڭىلدەتىلگەن تالاپتارمەن زاەم الدى، بۇل جولدا كومەككە «نۇرلى جەر» باعدارلاماسى كەلدى»، - دەپ ٴتۇسىندىردى تۇرعىن ٴۇي قۇرىلىس جيناق بانكى باسقارما ٴتورايىمىنىڭ ورىنباسارى قۇرالاي ٴالىموۆا.

بۇگىن ول ماڭعىستاۋ وبلىسىنىڭ اكىمى ەرالى توعجانوۆپەن بىرگە تۇرعىن ٴۇي قۇرىلىس جيناق بانكى سالىمشىلارىن جاڭا قونىستارىمەن قۇتتىقتادى.

پاتەر كىلتىن العانداردىڭ اراسىندا بانك سالىمشىسى جانات بازاربايەۆا دا بار. ول ٴۇش بولمەلى ٴۇيدىڭ يەسى اتانىپ وتىر. وسى كۇنگە جەتۋ ٴۇشىن جاناتتىڭ وتباسى بىرلەسىپ 5 جىل بويى اقشا جيناعان ەكەن. ناتيجەسىندە بازاربايەۆتاردىڭ شوتىندا 4 ملن تەڭگەنىڭ باسى قۇرالعان. بۇل سوما العاشقى جارنا رەتىندە ىسكە جاراپتى، ٴقازىر بانك سالىمشىسى جۇبايىمەن جانە ٴۇش وقۋشى ۇلىمەن كوشۋگە دايىندالۋدا.

«15 جىل بويى پاتەر جالدادىق، اي سايىن 80 000-100 000 تەڭگەدەن تولەپ جۇردىك. وسىعان قاراماستان ماقسات قويىپ، ٴوز ۇيىمىزگە دەپ اقشا جينادىق. اتا-انامىز كومەكتەستى، مەملەكەت سىيلىقاقىسى مەن ٴوز سىياقىسىن قوسىپ وتىرعان بانك تە قولداۋ ٴبىلدىردى، ٴوزىمىز دە ۇنەمدەپ، دەپوزيتكە بارىنشا كوپ اقشا سالىپ جۇردىك. الدىنا ماقسات قويعان ادام مىندەتتى تۇردە سول ماقساتىنا جەتەدى. ٴبىزدىڭ وتباسى – مۇنىڭ دالەلى»، - دەيدى جانات بازاربايەۆا.

بارلىعى ماڭعىستاۋ وبلىسىندا 48 925 ازامات تۇرعىن ٴۇي قۇرىلىس جيناق بانكىنەن شوت اشىپ، قاراجات جيناپ جاتىر. مۇنىڭ ىشىندە 14 860 كەلىسىمشارت 2017 جىلى اشىلعان. وتكەن جىلدىڭ ىشىندە ايماقتا تۇراتىن 1000-نان استام ادام تۇرعىن ٴۇي قۇرىلىس جيناق بانكىنەن قولجەتىمدى زاەم الىپ، باسپانالى بولدى. 2018 جىلى تەك «نۇرلى جەر» باعدارلاماسىنىڭ اياسىندا عانا 1100-دەي پاتەر پايدالانۋعا بەرىلەدى دەپ جوسپارلانىپ وتىر.

قازىرگى ۋاقىتتا «ايراقتى» ىقشام اۋدانىنداعى پاتەرلەردى ساتىپ الۋشىلار پۋلىنا قوسىمشا ىرىكتەۋ ٴجۇرىپ جاتىر. وتىنىشتەر 2018 جىلدىڭ 1 اقپانىنا دەيىن قابىلدانادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي