BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تۇركىستاندا جاڭا اۆتوبەكەتتىڭ ىرگەتاسى قالاندى

استانا، baq.kz. بۇگىن تۇركىستان قالاسىندا وبلىس اكىمى جانسەيىت تۇيمەبايەۆتىڭ قاتىسۋىمەن زاماناۋي جاڭا اۆتوبەكەت قۇرىلىسىنىڭ ىرگەتاسىن قالاۋ ٴراسىمى ٴوتتى. بۇل تۋرالى تۇركىستان وبلىسى اكىمىنىڭ ٴباسپاسوز قىزمەتى حابارلايدى.

جاڭا اۆتوبەكەت 3 گەكتار اۋماقتا ورنالاساتىن بولادى. الداعى ۋاقىتتا تاۋلىگىنە 10 مىڭ جولاۋشىعا، ياعني 600 اۆتوبۋسقا قىزمەت كورسەتپەك. سالتاناتتى شاراعا قاتىسقان وبلىس باسشىسى ٴوڭىر تۇرعىندارىن ايتۋلى جاڭالىقپەن قۇتتىقتادى.

«بۇگىن تۇركىستان قالاسىندا تاعى ٴبىر جاعىمدى وقيعانىڭ كۋاسى بولىپ وتىرمىز. ەل تىلەگى ەسكەرىلىپ، كيەلى شاھارىمىزدا تاعى ٴبىر اۆتوبەكەتتىڭ ىرگەتاسى قالانعالى تۇر. قالا ورتالىعىنداعى كولىك جانە جولاۋشىلار جۇكتەمەسىن ازايتىپ، ەكولوگيالىق جاعدايدى جاقسارتۋ ماقساتىندا شىمكەنت باعىتىنان زاماناۋي جاڭا اۆتوبەكەت سالعالى وتىرمىز. نىساننىڭ عيماراتى 2880 شارشى مەتردى قۇرايتىن بولادى. وندا كۇتۋ زالى، بيلەت كاسسالارى، جۇرگىزۋشىلەردى مەديسينالىق كۋالاندىرۋ پۋنكتى، ديسپەتچەرلىك پۋنكت، انا مەن بالا بولمەسى قاراستىرىلعان. جوباعا سايكەس، اۆتوتۇراق، پەررون، اۆتوبۋستاردى تەحنيكالىق بايقاۋ جانە قاداعالاۋ جايلارى ورنالاسادى. اۆتوبەكەت قۇرىلىسى اياقتالعاننان كەيىن شامامەن 50-گە جۋىق ادام جاڭا جۇمىسپەن قامتىلاتىن بولادى. ەندەشە قۇرىلىستىڭ ٴساتتى اياقتالۋىن تىلەيمىن»، - دەدى جانسەيىت قانسەيىت ۇلى.

جوبانىڭ جالپى قۇنى – 1 ملرد. 875 ملن. تەڭگە. اۆتوتۇراق پەن بەكەت الدىنداعى الاڭنىڭ اۋماعى – 3400 شارشى مەتر، وتىرعىزۋ پەررونى – 3600 شارشى مەتر، جولاۋشىلاردى ٴتۇسىرۋ پەررونى – 1100 شارشى مەتر، ال كوگالداندىرۋ ايماعى – 6000 شارشى مەتردى قۇرايدى. جاڭا اۆتوبەكەتتىڭ قۇرىلىسىن 2019 جىلدىڭ جەلتوقسانىنا دەيىن تولىق اياقتاۋ جوسپارلانعان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي