BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تۇركىستان وبلىسىندا ٴبىلىم كۇنى قارساڭىندا 28 مەكتەپ پايدالانۋعا بەرىلدى

1 قىركۇيەك - ٴبىلىم كۇنى قارساڭىندا تۇركىستان وبلىسىندا 28 جاڭا مەكتەپ پايدالانۋعا بەرىلىپ، وقۋشىلاردى ٴبىلىم نارىمەن سۋسىنداتۋعا كىرىسىپ كەتتى، دەپ حابارلايدى baq.kz اقپارات اگەنتتىگى.

شاكىرتتەرى جاڭا مەكتەپ عيماراتىنا كىرگەن ٴبىلىم وردالارىنىڭ ٴبىرقاتارى ورداباسى اۋدانىندا ورنالاسقان. 2018-2019 جىلعى جاڭا وقۋ جىلىندا اتالعان اۋداندا 3 مەكتەپتىڭ جاڭا عيماراتى ەل يگىلىگىنە بەرىلدى. سولاردىڭ ٴبىرى 35 مىڭنان استام تۇرعىنى بار شۇبارسۋ اۋىلىنان اشىلدى. 600 ورىندىق جاڭا عيماراتقا قونىس اۋدارۋ سالتاناتىنا وبلىس اكىمى جانسەيىت تۇيمەبايەۆ ارنايى بارىپ، تاياۋ جىلدارى اۋداندا ٴۇش اۋىسىمدا ٴبىلىم بەرۋ ماسەلەسى تولىقتاي شەشىلەتىنىن جەتكىزدى.

"بۇگىن ٴبىز ورداباسى اۋدانى شۇبارسۋ ەلدىمەكەنىندەگى ٴۇش اۋىسىمدا ٴبىلىم بەرىپ كەلگەن «دوستىق» مەكتەبىنىڭ جاڭا وقۋ عيماراتىنا قونىستانۋىنىڭ كۋاسى بولىپ، اۋىل تۇرعىندارىنىڭ قۋانىشىن ٴبولىسىپ وتىرمىز. ٴۇش اۋىسىمدا ٴبىلىم بەرەتىن اۋدانداعى قالعان ەكى مەكتەپتىڭ ماسەلەسىن شەشۋ ٴۇشىن ٴتيىستى جۇمىستار جۇرگىزىلىپ، اۋدان ورتالىعىنداعى امانگەلدى اتىنداعى جانە «تەمىرلان» مەكتەپتەرىنىڭ ٴار قايسىسىنا 600 ورىندىق جاڭا مەكتەپ سالۋ جۇمىستار جۇرگىزىلۋدە. دەمەك، ورداباسى اۋدانى بويىنشا ٴۇش اۋىسىمدى مەكتەپتەردىڭ ماسەلەسى تولىق شەشىلەتىن بولادى"، - دەگەن وبلىس اكىمى مەكتەپ ۇجىمىنا كومپيۋتەر بولمەسىنىڭ سەرتيفيكاتىن تاپسىردى.

جالپى، ەلىمىز تاۋەلسىزدىك العان 27 جىل ىشىندە ورداباسى اۋدانى بويىنشا 28 جاڭا مەكتەپ عيماراتى سالىنىپ پايدالانۋعا بەرىلسە، ونىڭ ٴ5-ۋى وسى شۇبارسۋ ەلدى مەكەنىندە ەكەن. كەلەسى جىلى، وسى شۇبارسۋ ەلدىمەكەنىندە تاعى ٴبىر مەكتەپتىڭ قۇرلىسىن سالۋ ٴۇشىن ٴتيىستى قۇجاتتار دايىندالىپ جاتىر. "دوستىق" مەكتەبى قۇرىلىسىنىڭ كونكۋرستىق قۇنى 831745 مىڭ تەڭگەنى قۇراعان. وعان ۇلتتىق قوردان، رەسپۋبليكالىق جانە جەرگىلىكتى بيۋدجەتتەن قارجى بولىنگەن. ٴبىر جىلدا سالىنىپ بىتكەن عيماراتتىڭ جالپى الاڭى – 6949،6 شارشى مەتر. مۇندا 1180 وقۋشى وقيدى. ولارعا 120 ۇستاز ٴبىلىم بەرەدى. ٴۇش قاباتتى مەكتەپتە 24 وقۋ كابينەتى، حيميا، فيزيكا، بيولوگيا زەرتحانالارى، مۋلتيمەديالى-لينگوفوندى جانە كومپيۋتەر سىنىپتارى بار. سونىمەن قاتار، كىتاپحانا مەن وقۋ زالىمەن قامتىلعان.

ەندى، بيىل وقۋشىلاردىڭ يگىلىگىنە تاپسىرىلعان 28 مەكتەپتىڭ سانىن جىكتەسەك. ورداباسىداعى شۇبارسۋدان بولەك، جاڭا وقۋ جىلىندا بەرەكە ەلدى مەكەنى مەن تەسپە اۋىلدارىندا 200 ورىندىق مەكتەپتەردىڭ قۇرىلىسى ٴبىتتى. سونىمەن بىرگە، بايدىبەكتەگى سارقىراما، تۇيەتاس، بايدىبەك اتا جانە تۇراقتى ەلدى مەكەندەرىندە 150 ورىندىق ٴبىلىم وشاقتارى پايدالانۋعا بەرىلدى. جاڭا عيماراتقا قارىق بولعان اۋدانداردىڭ ىشىندە سارىاعاش (7 مەكتەپ) پەن ماقتاارال (4 مەكتەپ) اۋداندارى دا بار. ال، تولەبي مەن سايرام اۋداندارىندا جانە ارىس پەن تۇركىستان قالالارىندا 300 جانە 600 ورىندىق 2 مەكتەپتەن پايدالانۋعا بەرىلدى. سونداي-اق، قازىعۇرت پەن جەتىساي اۋداندارىنا ٴبىر-بىر جاڭا مەكتەپتەن بۇيىردى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي