تارازدا قايرات رىسقۇلبەكوۆتىڭ ەسكەرتكىشى بوي كوتەردى

ەسكەرتكىشتىڭ اشىلۋ راسىمىندە قازاقستان جازۋشىلار وداعىنىڭ مۇشەسى، دراماتۋرگ ەلەن ٴالىمجان، «پاتريوتتىق قوزعالىس «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ مۇشەسى مۇرات بەرداليەۆ، قايرات رىسقۇلبەكوۆتىڭ اپكەسى گۇلنار رىسقۇلبەكوۆا ٴسوز سويلەپ، حالىق باتىرىنىڭ تاۋەلسىزدىك جولىنداعى ەرلىگى ەل جادىندا ماڭگى ساقتالاتىنى ٴسوزسىز ەكەنىن ايتتى.

جامبىل وبلىسى اكىمىنىڭ باستاماسىم ق.رىسقۇلبەكوۆ اتىنداعى ساياباقتى قايتا جاڭعىرتۋ جۇمىستارى 1986 جىلعى «جەلتوقسان» وقيعاسىنا قاتىسۋشىلارعا دەگەن قۇرمەت كورسەتۋ جانە تاۋەلسىزدىك جولىن وسكەلەڭ ۇرپاققا جەتكىزە وتىرىپ، ولاردىڭ وتانعا دەگەن پاتريوتتىق سەزىمدەرىن كۇشەيتۋ ماقساتىندا قولعا الىنعان بولاتىن.

ساياباقتا ٴبىرقاتار جاڭا نىساندار سالىنىپ، ەسكىرگەندەرىنە جاڭعىرتۋ جۇمىستارى جۇرگىزىلدى. ساياباقتىڭ ەسكيزدىك جوباسى «تابىس جوبا» جشس تاراپىنان ازىرلەنگەن. جوبانىڭ جالپى سمەتالىق قۇنى – 403،9 ملن تەڭگەنى قۇرايدى. جالپى اۋماعى – 6،5 گا. ساياباقتىڭ بۇرىنعى جوباسىندا ق.رىسقۇلبەكوۆتىڭ تەك ٴبيۋستى عانا بولعان. ونىڭ ورنىنا حالىق باتىرىنىڭ تولىق ەسكەرتكىشى ورناتىلدى (پوستامەنتتىڭ بيىكتىگى – 2،2 م; ەسكەرتكىشتىڭ بيىكتىگى – 2،8 م).