BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تالدىقورعاندا قۇقىق قورعاۋ قىزمەتتەرى ورتالىعى اشىلدى

بۇگىن تالدىقورعان قالاسىندا ازاماتتارعا قۇقىق قورعاۋ قىزمەتتەرى ورتالىعى اشىلدى. مۇندا «ٴبىر تەرەزە» قاعيداسى بويىنشا وبلىس تۇرعىندارىنىڭ ساپالى كومەك الۋىنا مۇمكىندىك جاسالعان. ورتالىقتا جوعارى ساناتتى زاڭگەرلەر، ادۆوكاتتار، مەدياتورلار، نوتاريۋستار، پوليسيا جانە پروباسيا قىزمەتكەرلەرى ٴتۇرلى كەڭەستەرىن بەرىپ، كومەگىن كورسەتەدى. جاڭا ورتالىقتىڭ اشىلۋىمەن ٴوڭىر تۇرعىندارىن وبلىس اكىمى اماندىق باتالوۆ قۇتتىقتادى، دەپ حابارلايدى baq.kz اقپارات اگەنتتىگى الماتى وبلىسى اكىمدىگىنىڭ ٴباسپاسوز قىزمەتىنە سىلتەمە جاساپ.

مەملەكەت باسشىسى ن.ٴا.نازاربايەۆ ٴوز سوزىندە: «مەملەكەتتىك ورگاندار، سونىڭ ىشىندە قۇقىق قورعاۋ قىزمەتى جۇمىسىنىڭ تيىمدىلىگىن كورسەتەتىن باستى كورسەتكىشتەرىنىڭ ٴبىرى - ونىڭ حالىق ٴۇشىن اشىقتىعى جانە قولجەتىمدى بولۋى»، - دەپ اتاپ وتكەن بولاتىن. سول سەبەپتى، بۇگىن ٴبىز وتە قاجەتتى شارانىڭ اشىلۋىنا كۋا بولىپ وتىرمىز. سىزدەرگە بۇگىننەن باستاپ قۇقىق قورعاۋ قىزمەتتەرى ورتالىعى كومەك كورسەتەتىن بولادى. ونىڭ جۇمىسى ازاماتتاردىڭ ارىز-شاعىمدارى مەن وتىنىش-تىلەكتەرىن جىلدام ٴارى ساپالى قاراۋعا، اكىمشىلىك كەدەرگىلەردى بولدىرماۋعا جانە ازاماتتاردىڭ قۇقىق قورعاۋ، مەملەكەتتىك ورگاندارعا دەگەن سەنىمىن ارتتىرۋعا باعىتتالعان، - دەپ اتاپ ٴوتتى ٴوڭىر باسشىسى.

سالتاناتتى شارادا الماتى وبلىسىنىڭ پروكۋرورى ازامات جىلقىبايەۆ ٴوز سوزىندە ورتالىقتى اشۋدىڭ ارقاسىندا ازاماتتارعا ەڭ قاجەتتى دەگەن سالا ماماندارى ٴبىر عيماراتتا وتىرىپ، قاجەتتى كومەكتى كورسەتەتىن جانە بۇل قىزمەت ٴتۇرى تۇتىنۋشىلار ٴۇشىن وتە ىڭعايلى بولاتىندىعىن اتاپ ٴوتتى. سونداي-اق وسى ورتالىقتىڭ اشىلۋىنا قولداۋ بىلدىرگەنى ٴۇشىن وبلىس باسشىلىعىنا العىسىن بىلدىرگەن وبلىس پروكۋرورى، بۇگىننەن باستاپ ورتالىققا جۇگىنگەن ازاماتتار ساپالى قۇقىقتىق قىزمەتتى پايدالانۋعا تولىقتاي مۇمكىندىگى بارىن جەتكىزدى.

جاڭا عيماراتتىڭ لەنتاسىن قييۋ سالتاناتىنان كەيىن شاراعا قاتىسۋشىلار مەن قوناقتار ورتالىقتىڭ جۇمىسىمەن تانىسىپ شىقتى. مۇندا پروكۋرورلار مەن ىشكى ىستەر دەپارتامەنتى قىزمەتكەرلەرىنىڭ جۇمىس كابينەتتەرىنەن وزگە نوتاريۋس، ادۆوكات، مەدياتور، پسيحولوگ، ادىلەت جانە پروباسيا قىزمەتى ماماندارىنىڭ جۇمىس كابينەتتەرى قاراستىرىلعان. بارلىق كەڭەس بەرۋ قىزمەتى - تەگىن. سونداي-اق بۇل جەردە پروكۋرورلار ازاماتتاردىڭ وتىنىشتەرىن قابىلداپ، ٴتۇرلى ماسەلەلەردىڭ شەشىمىن تابۋعا باعىت-باعدار بەرىپ، جولىن كورسەتەتىن بولادى.

ەسكەرتە كەتەتىن بولساق، ورتالىق عيماراتىن قالپىنا كەلتىرۋ جانە قاجەتتى ارنايى قۇرال-جابدىقتارمەن قامتاماسىز ەتۋ ٴۇشىن وبلىستىق بيۋدجەتتەن 47 ملن. تەڭگە قاراجات بولىنگەن بولاتىن.

ورتالىقتا حالىققا ساپالى قىزمەت كورسەتۋ ٴۇشىن بارلىق قاجەتتى جاعدايلار جاسالعان. اتاپ ايتقاندا، قابىرعالارى اينەكتەن تۇرعىزىلعان كابينەتتەر، كۇتۋشىلەرگە ارنالعان جايلى كۇتۋ ورىندارى، اۋديو جانە بەينە تىركەۋ قۇرىلعىلارى ورناتىلعان، كەلۋشىلەردى قاجەتتى اقپاراتتاردان قۇلاعدار ەتۋ ماقساتىندا ۇلكەن ەكراندار ورناتىلعان. سونىمەن قاتار ورتالىقتا بەينە بايلانىس ارقىلى ازاماتتاردىڭ وتىنىشتەرىن ٴتيىستى ورگاندارعا جولداۋعا ارنالعان كابينەتتەر دە بار.

ورتالىقپەن تانىسۋدان كەيىن وبلىس اكىمى ا.باتالوۆ ورتالىق قىزمەتكەرلەرىنە حالىقتىڭ مۇددەسى ٴۇشىن تابىستى ٴارى جەمىستى ەڭبەك ەتۋلەرىن تىلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي