شەتەلدىكتەر قازاقستان تۋرالى كوپ بىلۋلەرى قاجەت – كورەي عالىمى

اقتوبە، baq.kz ٴتىلشىسى. پرەزيدەنت نۇرسۇلتان نازاربايەۆتىڭ قازاقستاننىڭ ايماقتارىن دامىتۋ بويىنشا ستراتەگياسىنىڭ ماڭىزىن وتاندىق جانە شەتەلدىك ساراپشىلار ايتىپ بەردى. اقتوبەدە وتكەن حالىقارالىق عىلىمي-تاجىريبەلىك كونفەرەنسياعا كەلگەن شەتەل عالىمدارى ەلىمىزدىڭ 30 جىلعا جۋىق ۋاقىت ىشىندە ادام تانىماستاي وزگەرگەنىنە تاڭدانىستارىن جاسىرمادى.

تاۋەلسىزدىك العان 27 جىلدا دامۋشى ەلدەر قاتارىنا قوسىلعان قازاقستاننىڭ بۇگىنگى جەتىستىگىنە شەتەلدىك ساراپشىلاردىڭ كوزقاراسى ايرىقشا.وڭتۇستىك كورەيانىڭ پۋسان قالاسىنداعى تونميون ۋنيۆەرسيتەتىنىڭ عىلىمي قىزمەتكەرى سون سي مون از ۋاقىتتا جاس مەملەكەتتىڭ الپاۋىت ەلدەرمەن يىق تىرەسە ساياسي شارالارعا قاتىسىپ جۇرگەنىنە تاڭدانىسىن جاسىرمادى. 30-دان استام ەلدى ارالاعان وڭتۇستىك كورەيا ازاماتى قازاق ٴتىلىن جەتىك مەڭگەرگەن. ٴقازىر قۇدايبەرگەن جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىندەگى «كورەي ٴتىلى ورتالىعىنىڭ» ديرەكتورى.

«قازاقستان ماعان قاتتى ۇنايدى. حالقى - قوناقجاي. ٴقازىر قازاقتار اراسىندا دوستارىم كوپ. قازاقستاننىڭ 27 جىل ىشىندە وسىلاي دامىعانى تاڭقالارلىق جاعداي. الەمنىڭ كوپ ەلدەرىن ارالادىم. قازاقستاندى بىلەتىندەرى از. دەگەنمەن، قازاقستاندىقتاردىڭ تاراپىنان جارنامالانىپ، ايتىلۋى كەرەك. ەلدىڭ دامۋ قارقىنى وتە جوعارى. كەڭەس وداعى كەزىندەگى جىلدارمەن سالىستىرعاندا ٴقازىر الدەقايدا ىلگەرىلەگەن»،-دەدى وڭتۇستىك كورەيانىڭ تونميون ۋنيۆەرسيتەتىنىڭ عىلىمي قىزمەتكەرى سون سي مون.

تاۋەلسىز مەملەكەت، استانا مەن شەكارا - پرەزيدەنت نۇرسۇلتان نازاربايەۆتىڭ تاريحتا قالاتىن ٴۇش ماڭىزدى ەڭبەگى. ٴوڭىر باسشىسى بەردىبەك ساپاربايەۆ مەملەكەت باسشىسىنىڭ ەڭبەگىن وسىلاي باعالادى.

«پرەزيدەنت نۇرسۇلتان نازاربايەۆتىڭ قازاقستان، قازاق ٴۇشىن جاساعان ەڭبەگىن بىلەمىز. تاۋەلسىز مەملەكەت، شەكارا، استانا سەكىلدى تاريحتا قالاتىن ٴۇش ماڭىزدى ەڭبەگى بار. كەڭەس ۇكىمەتى كەزىمەن سالىستىرعاندا ٴقازىر قازاقستاندىقتاردىڭ ٴومىر ٴسۇرۋ ۇزاقتىعى 73 جاسقا دەيىن ارتتى. مەملەكەت باسشىسى قازاقستاننىڭ نەگىزگى دامۋى وڭىرلەرگە بايلانىستى ەكەنىن، حالىقتىڭ نەگىزگى بولىگىنىڭ وڭىرلەردە تۇراتىنىن ەسكەرە كەلە تاۋەلسىزدىك العان جىلداردان باستاپ، وڭىرلەرگە كوپ كوڭىل ٴبولدى. سوڭعى 10 اي ىشىندە ٴبىزدىڭ ەكونوميكامىزعا 500 ملرد. تەڭگەنىڭ ينۆەستيسياسى تارتىلدى. وتكەن 27 جىل ىشىندە اقتوبەدە 14 ميلليون شارشى مەتر تۇرعىن ٴۇي بەرىلدى. بيىل 600 مىڭ شارشى مەتر تۇرعىن ٴۇيدى پايدالانۋعا بەردىك. بارلىعى مەملەكەت باسشىسىنىڭ، قابىلدانعان مەملەكەتتىك باعدارلامالاردىڭ ناتيجەسىندە جاسالدى. اقتوبە - ەلدەگى ٴتورتىنشى ٴىرى قالا. ٴبىزدىڭ مارتوك اۋدانى قازاقستاننىڭ باتىستاعى قاقپاسى بولۋ كەرەك. ول جەردە ەكونوميكالىق ايماق قۇرىلۋ قاجەت»،-دەدى اقتوبە وبلىسىنىڭ اكىمى بەردىبەك ساپاربايەۆ.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!