BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پەتروپاۆلدا كوپقاباتتى ۇيلەر جىلۋسىز وتىر

فوتو: Автор

قىستىڭ كوزى قىراۋدا. پەتروپاۆلدىڭ قاق ورتاسىندا ورنالاسقان كوپقاباتتى ۇيلەرگە جىلۋ بەرىلگەنىمەن، تۇرعىندار توڭىپ وتىر. پارتيزان كوشەسىندەگى 185 جانە وعان ىرگەلەس تۇرعان ۆاسيلەۆ كوشەسىندەگى ٴ18-شى ٴۇيدىڭ يەلەرى توقپەشپەن جان ساقتاۋعا ٴماجبۇر، دەپ حابارلايدى baq.kz ٴتىلشىسى.

پارتيزان كوشەسىندەگى ٴ185-شى ٴۇي 1987 جىلى سالىنىپتى. يرينا اندرەەۆا مۇندا 30 جىلدان بەرى تۇرىپ جاتىر. ازىرگە زەينەتكەر مەن ونىڭ وتباسىن توقپەش قانا قۇتقارىپ تۇر. ونى قوسقاننىڭ وزىندە 16-18 گرادۋس جىلىلىقتان اسپايدى. تۇرعىندار قىس قاھارىنا مىنسە، جىلىتۋ جۇيەسى قاتىپ قالۋى ابدەن مۇمكىن ەكەندىگىن ايتادى.

«باتارەيالاردى جىلى دەۋگە بولماس. تەرەزەنى پوليەتيلەنمەن قاپتاپ قويدىق. جەل سوقپايدى. بولمە تەمپەراتۋراسى 16-18 گرادۋستان اسپايدى. ۇنەمى قالىڭ كيىنىپ جۇرەمىز، كيىممەن ۇيىقتايمىز. نەمەرەم دە سولاي. جوتەلدەن كوز اشپايتىن بولدى. ۇيدە ساباق وقۋ ٴتىپتى قيىن. وسىلاي جالعاسا بەرسە نە بولارىن بىلمەيمىن. كۇن سۋىتسا، جىلۋ قۇبىرلارى قاتىپ قالا ما دەپ قورقامىز. وسى ۇيدە العاشقى كۇننەن بەرى تۇرىپ جاتىرمىن. بۇل جاعداي ەسىمە 1994 جىلدارداعى قيىن كەزدەردى ەسىمە سالادى»، - دەيدى زەينەتكەر يرينا اندرەەۆا.

4-قاباتتا تۇراتىن رۋسلان باچايەۆتىڭ ۇيىندە دە وسىنداي جاعداي. وتاناسى كەنجە ۇلىمەن بىرگە اۋرۋحانادا جاتىر. 10 ايلىق بالا سالقىن ٴتيىپ جوتەلگەن، كەيىن وكپەسى قابىنعان. بۇل ۇيدە سۋعا شومىلۋدىڭ ٴوزى مۇڭ.

«بىزگە جىلۋ كەش بەرىلدى. مىنا ۇيدە وتىرۋ مۇمكىن ەمەس. كەيدە تۋىستارىمىزدىڭ ۇيىنە بارىپ قونامىز. 10 ايلىق بالامىز بار. ٴسابي بولعان سوڭ، ەڭبەكتەگىسى كەلەدى. ەدەن سۋىق. توقپەشكە كۇيىپ قالا ما دەپ ۇرەيلەنىپ وتىرامىز. ەندى مىنە ىستىعى كوتەرىلىپ، اۋرۋحانادان ٴبىراق شىقتى. ٴقازىر ەم الىپ جاتىر. كەيبىر كۇندەرى جىلۋ مۇلدە بولماي قالادى. ٴقازىر كراننان سۋىق سۋ اعىپ تۇر. ول جىلىنۋ ٴۇشىن 10-15 مينۋت بويى كراندى اشىپ قويۋعا تۋرا كەلەدى. تۇندە نەمەسە تاڭەرتەڭ ەرتە تۇرىپ جۋىنامىز. كۇندىز سۋ جىلىنبايدى. قاراشادا ىستىق سۋعا 1800 تەڭگە تولەدىك»، - دەيدى رۋسلان باچايەۆ.

پاتەر يەلەرى جىلىتۋ جۇيەسىنە جاۋاپتى مەكەمەلەردى بىرنەشە رەت شاقىرىپتى. ٴبىراق ودان ناتيجە شامالى. «ارنايى كوميسسيا كەلەتىن كەزىندە جىلۋ باتارەيالارى ىسىپ، ولار كەتكەن سوڭ، قايتا قالپىنا تۇسەدى» دەيدى تۇرعىندار. ەسەسىنە كوممۋنالدىق قىزمەت بەرۋشى كومپانيا اي سايىن تۇبىرتەك اكەلۋدەن جاڭىلمايدى. ٴ311-شى پاتەردىڭ دە ەسىگىن قاعىپ كوردىك. الدىمىزدان تانىس سۇرەڭسىز كورىنىس شىعا كەلدى: اياق قارىعان ەدەن، تەرلەگەن تەرەزە.

«پەردەنى كوتەرىپ قويامىز. باتارەيادان جىلۋ شىقسىن دەپ. تەرەزە بۋلانىپ تەرلەي بەرەدى. كيىممەن جۇرەمىز. وسىنداي جاعدايعا دۋشار بولعانىمىزعا ٴۇش اي بولدى. قالىڭ كيىممەن جۇرەمىز، سولاي تاماق ىشەمىز. ۇيقىعا دا كيىممەن جاتامىز. ٴوزىم دە اۋىرىپ تۇرمىن. پەتروپاۆل جىلۋ جەلىلەرىنە، قالالىق اكىمدىككە شاعىمداندىق. ٴبىزدىڭ جانايقايىمىزعا قۇلاق سالعان ەشكىم جوق»، - دەيدى پارتيزان كوشەسىندەگى ٴ185-شى ٴۇيدىڭ تۇرعىنى بايان جۇمالين.

ۆاسيلەۆ كوشەسىندەگى ٴ18-شى ٴۇيدىڭ تۇرعىندارى «شىقپا جانىم، شىقپالاپ» ارەڭ وتىر. تۇرعىندار اتى بولعانىمەن، زاتى جوق جىلۋ ٴۇشىن اقى تولەپ وتىر. توقپەش تە قالتانى ٴبىراز قاعارى انىق.

تۇتىنۋشىلاردىڭ شاقىرتۋىمەن كەلىپ، «پەتروپاۆل جىلۋ جەلىلەرى» سەرىكتەستىگى تولتىرعان اكتىدە بولمەدەگى اۋا تەمپەراتۋراسى 16، 19 گرادۋس ەكەنى جازىلعان. تالاپ بويىنشا بۇل كورسەتكىش كەمىندە 20 گرادۋس بولۋى شارت. ال قالالىق ٴتۇرعىن-ۇي كوممۋنالدىق شارۋاشىلىعى ينسپەكسياسىنىڭ ماماندارى اتالعان ۇيلەرگە جىلۋ ٴتيىستى دەڭگەيدە بەرىلىپ وتىرعاندىعىن، ٴتىپتى تۇرعىنداردىڭ شاعىمى نەگىزسىز ەكەنىن دە ايتىپ قالدى.

«پارتيزان كوشەسىندەگى ٴ185-شى ۇيدە تۇرعىنداردىڭ ٴوتىنىشى بويىنشا پەتروپاۆل جىلۋ جەلىلەرىمەن بىرلەسىپ، كوميسسيا قۇرىپ، جاعدايدى زەرتتەدىك. بارلىق پاتەرلەرگە باردىق. تەمپەراتۋرا 20 گرادۋستان تومەن بولعان جوق. ول كەزدە سورعىلار ىستەن شىققان بولاتىن. سورعىلار جوندەلدى، تەمپەراتۋرالىق رەجيم قالىپتى. جىل سايىن جاز مەزگىلىندە اتالعان ۇيلەرگە بارىپ، ەسكەرتۋ جاسايمىز. ٴۇيدى جىلىتۋ ماۋسىمىنا دايىنداۋ كەرەكتىگىن ايتىپ، جينالىس تا وتكىزدىك. جىلۋ جۇيەسىن جۋۋ – جەتكىلىكسىز. قىستا توڭباۋ ٴۇشىن قوسىمشا سورعى ورناتۋ كەرەك ەدى. تۇرعىندار ونى تۇسىنبەيدى»، - دەيدى پەتروپاۆل قالالىق تۇرعىن ٴۇي ينسپەكسياسىنىڭ جەتەكشىسى داۋلەت قالياسقاروۆ.

بيىل تەرىسكەي قىسى ادەتتەگى قىتىمىر مىنەزىن كورسەتە قويعان جوق. پەتروپاۆل قالالىق اكىمدىگىنىڭ ماماندارى «جىلۋ بەرىلدى، ودان ارتىق ەشتەڭە ىستەلمەيدى» دەپ قىسقا قايىردى. ٴۇيدىڭ وزدىگىنەن جىلىنباسى انىق. سوندىقتان جالپى سانى 100-دەن استام پاتەردىڭ تۇرعىندارىنا قىس بويى جىلىتقىشپەن جان ساقتاۋعا تۋرا كەلەتىن سىڭايلى.

فوتو: اۆتور


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي