پاۆلودار وبلىسىندا تاۋەلسىزدىك العاننان بەرى 450 كوشەنىڭ اتاۋى وزگەرتىلگەن

فوتو: pavlodarnews.kz

پاۆلودار، baq.kz. ەلىمىز تاۋەلسىزدىك العاننان بەرگى ۋاقىت ىشىندە پاۆلودار وبلىسىنا قاراستى قالا، اۋدان جانە اۋىلداردا 450 كوشەنىڭ اتاۋى وزگەرتىلگەن. بۇل تۋرالى pavlodarnews.kz سايتى حابارلايدى.

بۇل تۋرالى «قوعامدىق كەلىسىم» مەكەمەسىندە «ۇلتتىق ونوماستيكالىق ماسەلەلەر» اتتى رەسپۋبليكالىق سەمينار بارىسىندا وبلىس اكىمىنىڭ ورىنباسارى مەيرام بەگەنتايەۆ ٴمالىم ەتتى.

«15 ەلدى مەكەن مەن ەكى اۋداننىڭ اتىن قايتا اتاۋ جونىندە شەشىم شىقتى. بۇل سالاداعى جۇمىس الداعى ۋاقىتتا دا جالعاسىن تاباتىن بولادى»، - دەدى مەيرام بەگەنتايەۆ.

قر مادەنيەت جانە سپورت مينيسترلىگى جانىنداعى ٴتىل ساياساتى كوميتەتىنىڭ ٴتوراعاسى قۋات بوراشەۆتىڭ سوزىنشە، جىل باسىنان بەرى وسى سالانى زەرتتەپ جۇرگەن عالىمداردىڭ، قۇزىرلى ورگان وكىلدەرىنىڭ قاتىسۋىمەن جەتى دوڭگەلەك ۇستەل ۇيىمداستىرىلعان. اۋىل، اۋدان جانە قالا اتاۋلارىنا بايلانىستى 726 ۇسىنىس ٴتۇسىپ، كوپتەگەن ەلدى مەكەندەردىڭ تاريحي اتاۋلارى قايتارىلدى. سونىمەن قاتار، ەكى اۋدان مەن ٴبىر وبلىستىڭ اتى اۋىستىرىلدى.

«ونوماستيكالىق سالاعا بايلانىستى ٴالى دە شەشىمىن تاپپاعان ماسەلەلەر بار. مىنە، سوعان ساي قاجەتتى شارالاردىڭ بارلىعىن قولدانىپ، ەلىمىز بەن جەرىمىزگە جات اتاۋلاردى جويىپ، تاريحي اتاۋلاردى قايتا قالپىنا كەلتىرۋ كەرەك. بۇل سالادا رەسپۋبليكالىق ونوماستيكالىق كوميسسيا كوپ جۇمىس اتقارۋدا. كەلەسى وتىرىستا باتىس قازاقستان وبلىسىنداعى زەلەنوۆكا اۋدانىن - بايتەرەك، شىعىس قازاقستان وبلىسىنا قاراستى زىريانوۆ اۋدانىن - التاي دەپ قايتا اتاۋ ماسەلەسى قاراستىرىلاتىن بولادى. بۇل رەتتە مىنا ماسەلەنى ەسكەرۋىمىز كەرەك: كەيبىر وبلىستاردا رەسپۋبليكامىزعا اتى ٴمالىم قوعام جانە مەملەكەت قايراتكەرلەرىنىڭ ەمەس، جەرگىلىكتى جەردە لاۋازىمدى قىزمەت اتقارعان ازاماتتاردىڭ اتىن شىعارۋ ماسەلەسى بەلەڭ الىپ كەتتى. مىسالى، كەڭەس ۇكىمەتىنىڭ تۇسىندا اۋداندىق پارتيا كوميتەتى، وبلىستىق كەڭەس، وبلىستىق حالىق دەپۋتاتى بولعان ازاماتتاردىڭ ەسىمدەرىن كوشەلەر مەن اۋدان، اۋىلدارعا بەرۋ ماسەلەسى ۇسىنىلادى. ارينە، ونداي ازاماتتاردىڭ ەڭبەگى ۇمىتىلمايدى، ٴبىراق ەسىمدەرىن اۋداندار مەن اۋىلدارعا بەرۋدى قۇپتامايمىز. سونىمەن قاتار، ونوماستيكالىق سالانى دامىتقان كەزدە جەرشىلدىكتەن، رۋشىلدىقتان اۋلاق بولۋ كەرەك»، - دەدى قۋات بوراشەۆ.

«ٴتىل-قازىنا» ۇلتتىق عىلىمي پراكتيكالىق ورتالىعىنىڭ ۇيىمداستىرۋىمەن وتكەن شارا بارىسىندا ەلدى مەكەندەردىڭ تاريحي اتاۋلارىن، جەر-سۋ اتتارىن قايتا قالپىنا كەلتىرۋ تۋرالى ونوماستيكالىق ماسەلەلەر تالقىلاندى.

تەگي
• پاۆلودار وبلىسى

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!