BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

كوكشەتاۋلىقتار اۋىزسۋدى ساتىپ الىپ ىشۋدە

فوتو: insider.zt.ua

اۋىز سۋ جايى كوكشەتاۋدا ايتىلا-ايتىلا ابدەن جاۋىر بولعان ماسەلە. قۇبىر سۋى ىشۋگە مۇلدەم جارامسىز. شىرىگەن قۇبىرلارمەن كەلەتىن قۇرامىندا لاي-قوقىستان باسقا تەمىردىڭ قالدىقتارى بار سۋدى جۇرت تەك كىر-قوڭدارىن جۋىپ، تۇرمىستىق قاجەتتىلىكتەرگە عانا قولدانادى، دەپ حابارلايدى baq.kz ايماقتىق ٴتىلشىسى.

كوكشەتاۋعا اۋىز سۋ "شاعالالى" جانە "سەرگەەۆكا" سۋ قويمالارىنان جەتكىزىلەدى. تۇرعىنداردىڭ پايىمىنشا، سۋ ساپاسىنىڭ تومەندەۋىنىڭ نەگىزگى سەبەبى، سۋ قۇبىرلارى جەلىلەرى مەن كولونكالارداعى سۋدىڭ ۋاقىتىلى تازارتىلماۋىندا.

«قۇرامىندا مەتالى كوپ كراننىڭ سۋىن قايناتىپ ىشكەنمەن پايدا جوق. سودان سۋ تازارتقىش ساتىپ الىپ جان ساقتاۋعا كوشتىم. سۋ جەلىلەرى ابدەن ەسكىرىپ، توزىعى جەتكەندىكتەن، سۋمەن بىرگە قۇبىردىڭ ەزىلگەن مەتالى بىرگە اعادى. كوكشەتاۋدىڭ ابدەن بەرەكەسىن قاشىرعان اۋىزسۋ ماسەلەسىن قاشان شەشىلەرى بەلگىسىز»، - دەيدى قالا تۇرعىنى بايبول قۇسايىنوۆ.

«كوكشەتاۋ سۋ ارناسى» كوممۋنالدىق كاسىپورنى ديرەكتورىنىڭ ورىنباسارى سۆەتلانا دەدكوۆانىڭ ايتۋىنشا، 2016 جىلى سۋ تازارتۋ ستانسياسىنىڭ ٴبىر سۇزگىسى، 2017 جىلى ەكى سۇزگىسى جوندەلگەن. سۋ تازارتاتىن كۆارس قۇمدارى دا اۋىستىرىلعان.

«سەرگەەۆ سۋ قويماسىنان اۋىزسۋ تازارتىلعان كۇيىندە جەتكىزىلەدى. شاعالالىدان الىناتىن سۋ وزىمىزدە تازارتىلادى. الايدا تازارتقىش ستانسياسى 50 جىل بۇرىن سالىنعاندىقتان، ەسكىرگەن كۇيدە تۇر. سول سەبەپتەن اۋىز سۋ جەتكىلىكتى دەڭگەيدە تازارتىلماي وتىر»، - دەيدى س.دەدكوۆا.

قالالىق تۇتىنۋشىلار قۇقىن قورعاۋ باسقارماسى ماماندارىنىڭ تەكسەرۋ ناتيجەلەرى بويىنشا سۋدىڭ 60%-ى سانيتارلىق تالاپقا ساي ەمەستىگى بەلگىلى بولىپ وتىر. ال كوممۋنالدىق كاسىپورىن باسشىلارى تازارتۋ ستانسياسىنداعى زەرتحانادا اۋىزسۋ 100 % تازارتىلاتىندىعىن ايتادى.

«كوكشەتاۋ قالاسى مەن ونىڭ اۋماعىن بارلىعى 299 شاقىرىمدىق جەلى اۋىزسۋمەن قامتيدى. 383 سۋ كولونكاسى جۇمىس ىستەپ تۇر. ەگەر اۋى سۋ سانيتارلىق تالاپقا ساي بولماي شىقسا، سۋ قۇبىرىنا جوندەۋ، دەزينفەكسيا جۇمىستارى جۇرگىزىلەدى. زەرتحانا قىزمەتكەرلەرى سۋ ساپاسىن ۇنەمى باقىلاۋدا ۇستايدى»، - دەيدى «كوكشەتاۋ سۋ ارناسى» مەملەكەتتىك كوممۋنالدىق كاسىپورنىنىڭ باس ديرەكتورى زەينۇر الىبەكوۆ.

كوكشەتاۋلىقتاردىڭ دەنى اۋىزەكى تىلدە «ەسكى ەت كومبيناتى» دەپ اتالاتىن اۋماقتاعى تۋمگوەۆتار وتباسى تۇراتىن ۇيدەن بۇلاق سۋىن تاسىپ ىشەدى. قۇدىق باسىندا سۋ العان ادامداردىڭ كەزەگى ۇزىلمەيدى.

«ٴۇيىمىزدىڭ جانىنان قۇدىق قازىلعانىنا 20 جىل ٴوتىپتى. اۋەلدە ٴبىزدىڭ ۇيدەن كورشىلەر عانا سۋ الاتىن. كەيىن قالا تۇرعىندارى دا كەلە باستادى. اتام حامبەرت اكەمە: «اۋىزسۋدى ەشكىمگە ساتپا!» دەپ امانات ەتكەن ەكەن. اكەم ول اماناتتى بۇلجىتپاي ورىنداپ كەلەدى. جۇرتشىلىق ٴبىزدىڭ ٴۇيدىڭ سۋىن ٴىشىپ، العىسىن ٴبىلدىرىپ جاتسا، ٴبىز ٴۇشىن ودان ارتىق باقىت جوق، - دەيدى وسى اۋلەتتىڭ كەنجەسى رۋسلان تۋمگوەۆ.

كولىگى بارلار قالا شەتىندەگى «بارماشكا» دەپ اتالاتىن اۋماقتان بۇلاق سۋىن تاسىپ ىشەدى، باسقالار سۋ تازارتاتىن قۇرىلعىلاردى پايدالانىپ، جان ساقتاۋدا.

«ٴوزىم كوپقاباتتى ۇيدە تۇرسام دا، ٴدامى ەرەكشە بۇلاقتىڭ سۋىن ۇنەمى پايدالانامىن. ىدىس پەن كىر-قوڭىمىزدى جۋعانىمىز بولماسا، حلور قوسىلعان كراننان اققان سۋدى ىشپەيمىن. ٴتۇسى دە ساپ-سارى، كەيدە دامىنەن تەمىر تاتى سەزىلەدى. كۇندەلىكتى كراننان اعىزىپ ٴىشىپ وتىرعان سۋىڭىزدى تۇندىرىپ قويىڭىزشى، ىدىستىڭ تۇبىندە كادىمگىدەي تۇنبا پايدا بولادى»، - دەيدى زەينەتكەر اناتوليي ۆورونين.

وتكەن عاسىردىڭ 60-شى جىلدارى سالىنعان بولاتتان قۇيىلعان سۋ قۇبىرلارى مەن كاناليزاسيا جۇيەلەرىنىڭ پايدالانىلۋ مەرزىمى 20 جىل ەكەن. 1986 جىلدان بەرى جوندەۋدى قاجەت ەتىپ تۇرعان قالاداعى سۋ قۇبىرلارى جاپپاي اۋىستىرۋدى قاجەت ەتىپ تۇر. ماماندار بۇل ماسەلەنى شەشۋدىڭ جالعىز جولى – قالانىڭ سۋ جەلىلەرىن تۇگەل جاڭارتۋ ەكەنىن ايتادى. ول ٴۇشىن ميللياردتاعان تەڭگە قارجى كەرەك. ازىرگە كوكشەتاۋلىق «اق بۇلاق» باعدارلاماسى وسىلايشا بۇلاقتان سۋ تاسىپ ٴىشۋ ارقىلى جۇزەگە اسىپ جاتقان جايى بار.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي