BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قىزىلوردادا 100 جاساعان اجەگە جاڭا كۋالىك تابىس ەتىلدى

فوتو: Автор

قىزىلوردا وبلىسى سىرداريا اۋدانىنىڭ تۇرعىنى ٴساليما كۇدەبايەۆا 100 جاسقا تولدى. حالىققا قىزمەت كورسەتۋ ورتالىعىنىڭ ماماندارى قوس عاسىردىڭ كۋاسىنە جاڭا جەكە كۋالىك تابىس ەتتى، دەپ حابارلايدى baq.kz اگەنتتىگىنىڭ وڭىردەگى ٴتىلشىسى.

اۋداندىق حالىققا قىزمەت كورسەتۋ ورتالىعىنىڭ باسشىسى جۇمابايەۆتىڭ ايتۋىنشا، قاريانىڭ ٴوزى ورتالىققا كەلىپ، سۋرەتكە ٴتۇسىپ، قۇجات الۋعا ٴوتىنىش بىلدىرگەن.

«ٴبىز مەكەمە اتىنان سىي-سياپات ۇسىندىق. ٴومىر جاسىنىڭ ۇزاق بولۋىنا تىلەكتەسپىز. قارت انا دا بىزگە باتاسىن بەردى»، – دەيدى ول.

حقكو-عا كەلگەندە ٴساليما كۇدەبايەۆاعا كوپشىلىك قۇرمەت كورسەتىپ، قالىن سۇراپ جاتتى. كەيۋانا بولسا، ولارعا اق باتاسىن بەرىپ، ىستەرىنە بەرەكە تىلەدى. جاڭا قۇجات العان انا ارنايى انىقتامالىق قاعازعا قولىن قويىپ، ەستەلىك سۋرەتكە ٴتۇستى. سونىمەن قاتار، عاسىر جاساعان انانى اۋدان اكىمى، ونىڭ ورىنباسارى جانە ارداگەرلەر كەڭەسىنىڭ ٴتوراعاسى دا قۇتتىقتاپ، ىستىق ىقىلاستارىن جەتكىزدى.

«قۇدايدىڭ بەرگەن ٴومىرى عوي. اكىمدىكتەن دە، باسقا جاقتان دا بالالار كەلىپ، قۇتتىقتاپ جاتىر. وركەندەرى ٴوسسىن! جاستايىمىزدان بەينەت كوردىك، ەندى مىنە، زەينەتىن دە كورۋدى پەشەنەمىزگە جازىپتى. شۇكىر، ەلىمىز امان، ٴوز پاتشامىز بار. ەندىگىدە ۇرپاقتار وسىپ-ونسە، جاقسىلىقتار بولا بەرەدى»، – دەيدى ٴساليما اجە.

ايتا كەتەيىك، ٴساليما كۇدەبايەۆا 1917 جىلى قاراشادا دۇنيەگە كەلگەن. اشارشىلىق كەزىندە اتا-اناسىنان ايىرىلىپ، جەتىمدىكتىڭ كەرمەك ٴدامىن تاتقان. جاستايىنان ەڭبەككە ارالاسىپ، قارا جۇمىستا ىسىلعان. 1933 جىلى ٴومىرزاق كۇدەبايەۆقا تۇرمىسقا شىعىپ، 6 بالا تاربيەلەپ وسىرەدى. 1941 جىلى سوعىس باستالىپ، جارى ٴومىرزاق مايدانعا اتتانادى. ٴساليما اتا-ەنەسىمەن بىرگە 1938 جىلى تۋعان قىزىمەن ەلدە قالادى. سول كەزدە تىلدا ەڭبەك ەتىپ، اۋداننىڭ دامۋىنا لايىقتى ۇلەسىن قوسقان. اۋداندىق ناۋبايحانادا ناۋبايحاناشى بولىپ جۇمىس ىستەپ، زەينەتكە شىققان. قازىرگى كەزدە ٴساليما اجەي كىشى ۇلى نۇرلان كۇدەبايەۆتىڭ قولىندا تۇرادى. اجەيدىڭ 18 نەمەرەسى مەن 31 شوبەرەسى بار. ٴجۇز جاساعان انا ۇلى وتان سوعىسىنىڭ 50 جىلدىعى، 60 جىلدىعى مەدالدارىمەن ماراپاتتالعان.

فوتو: اۆتور


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي