قىزىلوردادا مۇگەدەكتەر ارباسىن جوندەيتىن ورتالىق جۇمىس ىستەيدى - ايماق|09 جەلتوقسان 2018، 14:35
BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قىزىلوردادا مۇگەدەكتەر ارباسىن جوندەيتىن ورتالىق جۇمىس ىستەيدى

فوتو: автор

قىزىلوردا، baq.kz ٴتىلشىسى. قىزىلوردا قالاسىندا مۇمكىندىگى شەكتەۋلى جانداردىڭ ارباسىن جوندەيتىن ۇستاحانا بار.

بۇل نىسان «مۇمكىندىگى شەكتەۋلى جاندارعا ارنالعان تەحنيكالىق قىزمەت كورسەتۋ ورتالىعى» دەپ اتالادى. قىسقاشا ايتقاندا، «ينۆاستو». مۇندا مۇگەدەكتەردىڭ ارباسى جوندەلەدى.

ورتالىقتى اشقان جاس كاسىپكەر نۇرسۇلتان تاجيەۆتىڭ جاسى 27-دە. ٴوزىنىڭ دە دەنساۋلىعىنىڭ ٴتۋابىتتى كىناراتى بار. ول وسى ورتالىق ارقىلى تاعدىرلاس جارىمجان جاندارعا كومەكتەسۋدى ويلاعان.

«ٴوزىم ٴۇشىنشى توپ مۇگەدەگىمىن. ارباداعى ادامداردىڭ جاعدايىن جاقسى تۇسىنەمىن. كەيبىرەۋلەرىنىڭ ارباسى سىنىپ، جازىم بولا جازداعان كەزدەرى بولدى. ەرەجە بويىنشا ولار مەملەكەت تاراپىنان بەرىلەتىن ارباعا ٴتورت جىلدا ٴبىر رەت قول جەتكىزەدى. الايدا، وسى ۋاقىت ارالىعىندا اربالار بۇزىلادى، ٴبىر قۇرىلعىسى بولسا دا ىستەن شىعادى. جاڭادان اربا ساتىپ الۋعا كوبىسىنىڭ قالتاسى كوتەرمەيدى. ال مۇنى جوندەيتىن مامان تاپشى، ٴتىپتى جوق دەۋگە دە بولادى. سوندىقتان وسى ماسەلەنى شەشۋدى ويلاپ، مۇمكىندىگى شەكتەۋلى جاندارعا ارنالعان تەحنيكالىق قىزمەت كورسەتۋ ورتالىعىن اشتىق. مۇنى اشپاس بۇرىن كاسىپكەرلەر پالاتاسىنان "بيزنەس-كەڭەسشى" كۋرسى بويىنشا وقۋ بىتىردىك. سودان كەيىن جوبامدى يننوۆاسيالىق بايقاۋعا ۇسىندىم. قايتارىمسىز گرانتقا يە بولىپ، كاسىبىمىزدى باستاپ كەتتىك. ٴبىر جاعىنان، وزدىگىنەن ٴجۇرىپ-تۇرۋى قيىن جاندارعا جاساعان كومەگىم بولسىن دەگەن ويمەن اقىسىز جوندەپ جاتىرمىز»، – دەيدى نۇرسۇلتان تاجيەۆ.

فوتو: اۆتور

جاس كاسىپكەردىڭ بۇل يدەياسى "zhas project" جوباسىندا قولداۋ تاۋىپ، جەڭىمپاز اتاندى. بۇگىندە ول جوبادان بولىنگەن قاراجاتقا ورتالىقتىڭ تەحنيكالىق جوندەۋ قۇرىلعىلارى قاتارىن تولىقتىرعان. شەبەرحانا جانىنان شاعىن سەح اشىپ، ٴبىر مەزگىلدە بىرنەشە اربا جوندەۋ مۇمكىندىگىنە جول اشتى. قازىرگى تاڭدا مۇندا ٴتورت ادام تۇراقتى جۇمىسپەن قامتىلعان. اراسىندا نۇرسۇلتانمەن تاعدىرلاس جىگىتتەر دە بار.

«بىرەر اي بۇرىن تىگىن ماشيناسىن ساتىپ الدىق. مۇگەدەك ارباسىنا بوتەلكەدەگى سۋ، تەلەفون سالىپ قوياتىن تىسقابىن جاسايمىز. سونداي-اق، قىس قىس مەزگىلىندە توڭباس ٴۇشىن اربادا وتىرعان ادامعا قولعاپ، ارنايى كيىمدەر تىگەمىز. سوندا قولى جىلى بولادى جانە ارنايى كيىم شاشىراعان لاي-بالشىقتان قورعايدى»، – دەيدى نۇرسۇلتان.

ساپالى قىزمەت ٴتۇرىن ۇسىنۋدى ماقسات ەتكەن نۇرسۇلتان بىلىكتىلىگىن ارتتىرۋ ٴۇشىن سەمينار-ترەنينگتەرگە قاتىسىپ تۇرادى. جاقىندا عانا «دوس» تاۋەلسىز ٴومىر» ورتالىعى lds charities حالىقارالىق قايىرىمدىلىق ۇيىمى جانە «waqyp» كورپوراتيۆتىك قايىرىمدىلىق قورىنىڭ بىرلەسە ۇيىمداستىرۋىمەن وتكەن «مۇگەدەكتىگى بار ازاماتتاردىڭ ٴومىر سالتىن جاقسارتۋ جانە مۇگەدەكتەر ارباسىن جيناۋ» تاقىرىبىنداعى ترەنينگتە ساۋاتتىلىق دەڭگەيىن ارتتىرىپ كەلدى. وندا ول اربالاردى تەك قۇراستىرىپ عانا قويماي، ٴتيىستى ولشەمدەرىن الىپ، بولشەكتەرىن دۇرىس ورنالاستىرۋدى امەريكالىق مامانداردىڭ وزىنەن ۇيرەنىپ قايتتى.

فوتو: اۆتور

«بىزدە اربانى مەملەكەت تاراپىنان نەمەسە قايىرىمدىلىق نەگىزدە بەرگەن كەزدە ونى الاتىن ادامنىڭ دەنە ولشەمىنە اسا ٴمان بەرمەستەن ۇلەستىرە سالادى. ول دۇرىس ەمەس. سەبەبى، ٴاربىر ادامنىڭ تۇلعا تۇرپاتى ٴارتۇرلى بولاتىنى بەلگىلى. سول ۋاقىتتا اربا ونىڭ ولشەمىنە سايكەس كەلمەي، ەركىن قوزعالۋىنا قيىندىق تۋىنداتادى. ال، ونىڭ قولايسىز بولۋى ادامنىڭ قاۋىپسىزدىگىنە دە كەدەرگى كەلتىرەدى. دەمەك، اربا ٴبىرىنشى ورىندا ولشەم بويىنشا دۇرىس كەلۋى كەرەك. ٴبىز ونى يەسىنىڭ ولشەمىنە قاراي جيناپ بەرەتىن بولامىز. سونداي-اق، مۇمكىندىگى شەكتەۋلى جانداردىڭ قوزعالىسى قيىنداۋ بولعاندىقتان كوبىنەسە، ارنايى تاپسىرىسپەن دە ۇيلەرىنە بارىپ جاساپ بەرىپ جاتىرمىز. جەڭىل تەتىكتەرى عانا ىستەن شىقسا، قۇرىلعىمىزدى وزىمىزبەن بىرگە اپارىپ، قايتا جاساقتاپ بەرەمىز. ال، ۇلكەن جوندەۋدى قاجەت ەتەتىن اربالاردى شەبەرحانامىزدا وڭدەۋگە تۋرا كەلەدى»، – دەيدى كاسىپكەر.

نۇرسۇلتاننىڭ ساپالى جۇمىسىنا سۇرانىس جوعارى. ٴتىپتى، ەلىمىزدىڭ وزگە ايماقتارىنان دا تاپسىرىستار تۇسۋدە. تەلەفون ارقىلى حابارلاسىپ، اربا جوندەپ بەرۋىن سۇراۋشىلار بار.

«كىزمەتىمە دەگەن مۇقتاجدىق ماعان جاۋاپكەرشىلىك جۇكتەيدى. الداعى ۋاقىتتا مۇگەدەكتەرگە قولايلىراق ٴارى قوزعالىسقا ٴتيىمدى بولۋ ٴۇشىن اربا الدىنا كادىمگى ۆەلوسيپەد سەكىلدى ٴرول ورنالاستىرۋدى جوسپارلاپ وتىرمىن»، – دەيدى جاس كاسىپكەر.

نۇرسۇلتاننىڭ “ينۆاستوسىنا” بارىپ ارباسىن جوندەتكەندەردىڭ ٴبىرى – قىزىلوردا قالاسىنىڭ تۇرعىنى روزا سماعۇلوۆا. ول ارباسىن پايدالانىپ جۇرگەنىنە ون جىل بولعانىن ايتادى. توزىعى جەتكەن “كولىگىن” “ينۆاستونىڭ” جىگىتتەرى تولىق جوندەۋدەن وتكىزگەن. دوڭگەلەگىن اۋىستىرعان، ورىندىعىن جاڭارتقان. روزانىڭ قۋانىشى ەسەلەنىپ، جۋىردا سۋ جاڭا كرەسلو-ارباعا دا قول جەتكىزگەن. وعان دا جاس كاسىپكەر نۇرسۇلتان تاجيەۆ، سونداي-اق قىزىلوردا قالاسىنداعى تالسۋات وڭالتۋ ورتالىعى سەبەپكەر بولعان.

“سونىمەن ٴقازىر مەندە ەكى اربا بار. ٴوزىم اربادا وتىرىپ بيلەيمىن، بي جارىستارىنا دا قاتىسىپ ٴجۇرمىن. مەن بۇگىنگى ومىرىمە ريزا بولىپ، وسى مۇمكىندىكتى پايدالانا وتىرىپ، ٴبىراز ادامعا العىس ايتقىم كەلەدى. مۇگەدەكتەر كۇنى، ياعني 6 جەلتوقسان كۇنى “جاڭا مەرسكە” (قول اربا) قول جەتكىزدىم. سوناۋ 1999 جىلى جول كولىك اپاتىنا ٴتۇسىپ، قول ارباعا تاڭىلعانىما دا 20 جىل بولىپ قالىپتى. سودان بەرى قول اربا مەنىڭ اياعىم ٴھام قولىما، ون ەكى مۇشەمنىڭ بىرىنە اينالدى. قول اربام سىنسا مەن ٴۇشىن ٴومىر توقتاپ قالعانداي بولاتىن. استانادان كەلگەن قول اربانىڭ بىرەۋىن يەمدەنۋگە مۇمكىندىك جاساعان تالسۋات وڭالتۋ ورتالىعىنىڭ باسشىسى مەيرامبەك ابدۋكاريموۆكە، جاس كاسىپكەر نۇرسۇلتان تاجيەۆكە العىس ايتامىن. نۇرسۇلتان zhas project جوباسى بويىنشا اربا جوندەۋ شەبەرحاناسىن اشىپ، ٴبىزدىڭ كەدەرگىسىز ٴومىر ٴسۇرۋىمىز ٴۇشىن قولدان كەلگەن كومەگىن اياماي كەلەدى. نۇرسۇلتان باستاعان ٴالىبي، ەلامان نۇرعالي، دانيارداي ازاماتتارعا راحمەت ايتامىن. ولارعا اللانىڭ نۇرى جاۋسىن، جاساپ جاتقان قىزمەتتەرىنە بەرەكە، وتباسىنا اماندىق تىلەيمىن”، - دەيدى روزا سماعۇلوۆا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي