قىزىلوردادا اپكەسى ىنىسىنە بۇيرەگىن بەرىپ، اجالدان اراشالاپ قالدى - ايماق|19 جەلتوقسان 2018، 15:58
BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قىزىلوردادا اپكەسى ىنىسىنە بۇيرەگىن بەرىپ، اجالدان اراشالاپ قالدى

فوتو: Автор

قىزىلوردا، baq.kz ٴتىلشىسى. قىزىلوردالىق كۇمىس سىرىمبەتوۆا ناۋقاس ىنىسىنە بۇيرەگىن بەرىپ، اجالدان اراشالاپ قالدى.

قىزىلوردا وبلىسى قازالى اۋدانىنىڭ ورتالىعىندا تۇراتىن كۇمىس سىرىمبەتوۆا تۋعان ٴىنىسى وتەگەننىڭ ٴومىرىن ساقتاپ قالۋعا سەبەپكەر بولعان. بۇل 2015 جىلى بولعان جايت ەدى. وتباسىداعى ۇلدىڭ كىشىسى وتەگەن 2013 جىلى اۋىر ناۋقاستانادى. باستاپقىدا ٴمان بەرمەگەن، كەيىن جاعدايى اۋىرلاي بەرەدى. دارىگەرلەر ساراپتاما جاساپ، بۇيرەك جەتكىلىكسىزدىگى دەگەن دياگنوز قويعان.

«بۇيرەك كىپ-كىشكەنتاي اعزا بولعانىمەن، ادام دەنساۋلىعىنداعى اتقاراتىن قىزمەتى زور. بويداعى بۇكىل قاندى سۇزگىدەن وتكىزىپ، اعزاعا كەرەكسىز سۇيىقتىقتى سىرتقا شىعارىپ تاستاۋمەن اينالىسادى. ەگەر بۇيرەك ىستەن شىقسا، ۋلى زاتتار دەنەگە جايىلىپ، ٴىسىرىپ جىبەرەدى. وسىلايشا ونىڭ قالىپتى جاعدايىنىڭ بۇزىلۋى ادام قۋاتىن كەمىتەدى عوي. ٴىنىمنىڭ وسىلاي ناۋقاستانىپ جۇرگەنىن بىلەتىنمىن. كەزدەسىپ قالساق، جۇدەۋ ٴتۇرىن كورىپ، قاتتى قينالاتىنمىن. بۇيرەك اۋرۋىنىڭ اسقىنعان تۇرىنە تەك گەمادياليز عانا ۋاقىتشا كومەكتەسەدى. ونى قابىلداۋدىڭ ٴوزى ناۋقاس جانعا وڭايعا سوقپايدى. اپتاسىنا 3 رەت سوعان باراتىن. بىردە كەزەكتى قوندىرعى قىزمەتىن پايدالانعان سوڭ، ٴىنىم ۇيىنە بارۋعا مۇرشاسى كەلمەي، بىزدىكىنە ارەڭ جەتتى. تاڭعا دەيىن تىنىستاۋى ابدەن قيىندىق تۋعىزعان باۋىرىمنىڭ قينالعانى ەسىمە تۇسسە ٴالى كۇنگە دەيىن جۇرەگىم ەزىلگەندەي كۇي كەشەمىن. سول جىلى اعام مەن جەڭگەم قايتىس بولىپ، وتباسىمىزدا ۇلكەن قارالى وقيعا ورىن العان. ٴىنىم دە سولاردىڭ قاتارىنا قوسىلماسىن دەپ مەندە دە دەگبىر قالمادى. بىرەسە جىلايمىن، بىرەسە اللادان كومەك سۇرايمىن»، - دەيدى كۇمىس سىرىمبەتوۆا.

سونداي سىناقتى ٴساتتىڭ بىرىندە ول «جان باۋىرىم، وسىدان بۇگىن تۇننەن امان قالىپ، بالا-شاعاڭا قوسىلساڭ، جاراسا ٴوز بۇيرەگىمنىڭ ٴبىرىن ساعان بەرەمىن» دەگەن ەكەن.

«بۇل ٴسوز اۋىرىپ جاتقان مەنىڭ سانا ساڭىلاۋىنا جارىق بەرىپ، ەرتەڭگە دەگەن ٴۇمىتىمدى وياتقانداي بولدى. كوپ ۇزاماي اپكەمە بارىپ، بۇدان ارى شىداي المايتىنىمدى ايتتىم. كۇمىس تە تاۋەكەلشىل عوي، دارىگەرگە بارايىق، ىسكە كىرىسەيىك دەدى. قازالى اۋداندىق ەمحاناداعى نەفرولوگ مامانعا بارىپ، ٴمان-جايدى بىلدىك. دارىگەر اينۇر بەردەنوۆا بۇل ٴىستى كەشەۋىلدەتۋگە بولمايتىنىن ٴتۇسىندىردى»، - دەيدى وتەگەن.

سىرىمبەتوۆتەرگە مەملەكەت باسشىسىنىڭ «ماڭگىلىك ەل» باعارلاماسى اياسىندا كۆوتا ٴبولىنىپ، قازاقستانداعى جەتەكشى مەديسينالىق كەشەن ا.ن.سىزعانوۆ اتىنداعى ۇلتتىق حيرۋرگيا ورتالىعىندا وتا جاساتۋ مۇمكىندىگىنە يە بولادى.

«سول كۇننەن باستاپ ساراپتاما جۇمىستارى باستالىپ كەتتى. ايتۋعا وڭاي كورىنگەنىمەن، تالداما ٴىسىنىڭ وزىندىك تالاپتارى جوعارى ەكەن. بىرگە تۋعانمەن بىر-بىرىنە پارامەترلەرى بويىنشا بۇيرەك، قان توپتارى سايكەس كەلمەيتىندەر بولاتىن كورىنەدى. بىزدىكى، اللا وڭداپ، اتالعانداردىڭ بارلىعىندا ۇقساستىق تابىلدى. ماعان اۋىر تيگەنى، وتاعاسىنا ايتۋ بولدى. شاڭىراقتىڭ يەسى، جارىم بولات ابيبۋللايەۆ الاڭداعانىمەن، ارتىنشا مۇنداي وتالاردىڭ ٴبىرازى جاقسى اياقتالعانىن ايتىپ، قاناتتاندىردى»، – دەيدى كۇمىس سىرىمبەتوۆا.

2015 جىلى 5 قازان كۇنى تاڭ الدىندا باستالعان ورگان اۋىستىرۋ وپەراسياسى بەس جارىم ساعاتقا سوزىلادى. ماماندار كۇمىستىڭ بۇيرەگىن وتەگەنگە ورنالاستىرۋ وتاسىن ٴساتتى اياقتايدى.

«جانساقتاۋ ٴبولىمىنىڭ بولمەسىندە كوزىمدى اشسام، ماڭايىم تولعان اق حالاتتىلار. مەنىڭ جايىمدى قاداعالاپ تۇر ەكەن. كەڭ ٴارى ٴتۇرلى قوندىرعىلار قويىلعان بولمەدەن وتەگەندى ىزدەي باستادىم. مەنىڭ قورقىنىشىم، ٴوزىمنىڭ ەرتەڭىم قانداي بولادى ەمەس، ٴىنىمنىڭ ٴۇمىتىن ورىنداي الدىم با دەگەن ۇرەيلى وي بولدى. اينالاما كوز سالىپ، بولمەنىڭ سول جاعىنداعى شەتكى بۇرىشتا ارى قاراپ، دەنەسىنە جامىلعى جابىلعان، توسەك ۇستىندەگى باۋىرىمدى ۇرپيگەن شاشتارىنان تاني كەتىپ، قاتتى قۋاندىم. «دەمەك، ٴىنىم امان ەكەن. اۋىلعا بىرگە قايتاتىن بولدىق!» دەپ شاتتانعان كوڭىلىمدى سوزبەن ايتىپ جەتكىزە المايمىن. جاعداي سولاي بولدى. مەن ونى مىندەت تە، ماقتان دا ەتپەيمىن. قايتا اللانىڭ جىبەرگەن جاردەمى ارقاسىندا باۋىرىمىز ەكەۋىمىز بىرگە ٴومىر كەشىپ جاتقانىمىزعا شۇكىر دەيمىن»، - دەگەن كەيىپكەرىمىز اۋرۋحانادان شىعىپ بارا جاتقاندا 18 جاسار بالاسىنا بۇيرەگىن بەرمەك بولعان انانىڭ كوز جاسىن ٴسۇرتىپ، رۋحتاندىرىپ، تاعى ٴبىر ساۋاپتى ىسكە سەبەپشى بولادى.

ايتا كەتەيىك، كۇمىس سىرىمبەتوۆا بۇگىندە تىگىنشىلىكپەن اينالىسىپ، كاسىبىن دوڭگەلەتىپ وتىر. ٴوزىنىڭ دە، ٴىنىسىنىڭ دە دەنساۋلىعى قالىپتى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي