قىزىلوردا قالاسى جارىقسىز قالدى

فوتو: Автор

قىزىلوردا وبلىسى، baq.kz ٴتىلشىسى. بۇگىن ساعات 18.00-21.00 ارالىعىندا قىزىلوردا قالاسىنىڭ ٴبىراز بولىگى جارىقسىز قالدى. تۇرعىنداردىڭ الەۋمەتتىك جەلىدەگى جازبالارىنا قاراعاندا قالانىڭ ورتالىعىندا، سونداي-اق شانحاي، شۇعىلا، استانا شاعىن اۋداندارىندا، بەلكول كەنتىندە جارىق سونگەن. باعدارشامدار جۇمىس ىستەمەدى. كۇن سۋىتقاندا ەش ەسكەرتۋسىز جارىقتىڭ اجىراتىلعانىنا حالىق الاڭداۋلى.

«جارىق بولماسا، ۇيدە جىلۋ بولمايدى. گازدىڭ ناسوسى توقپەن جۇمىس ىستەيدى. ەمىزۋلى بالام بار. قالعان بالالارىم تۇماۋراتىپ جاتىر. بۇلاي ەسكەرتۋسىز سوندىرۋگە بولا ما؟!» - دەيدى قالا تۇرعىنى ٴالياش بەكجان.

وسى ورىن العان جاعداي بويىنشا قىزىلوردا وبلىسىنىڭ ەنەرگەتيكا باسقارماسى فەيسبۋكتەگى پاراقشاسى ارقىلى مالىمدەمە جاسادى.

«جۇكتەمەنى اجىراتۋدىڭ ارنايى اۆتوماتيكاسى (ساون) ىسكە قوسىلۋىنان ٴاج-35، ل-32، ل — 34 جانە ل-32ا اجىراۋىنا بايلانىستى، 2018 جىلدىڭ 15 قازانىندا «قىزىلوردا» قس-220/35/10 كۆ جانە «قجەو» مكك-220 كۆ اجىراتىلعاندىعىن حابارلايمىز.

جاتاج ەلەكتر بەرىلىسىنىڭ قورەكتەندىرگىش جەلىلەرىن شامادان تىس جۇكتەلۋى كەزىندە ەنەرگيا جۇيەسىنىڭ ورنىقتىلىعىنىڭ بۇزىلۋىن بولدىرماۋ ٴۇشىن قىزمەت ەتەدى جانە تۇتىنۋشىلاردىڭ ٴبىر بولىگىن اجىراتىپ، كەيىننەن ولاردى قوسۋ جۇمىستارى جۇرگىزىلەدى.

بۇگىنگى تاڭدا، قازاقستاننىڭ وڭتۇستىك وڭىرىندە ەلەكتر ەنەرگياسىنىڭ تاپشىلىعى بايقالادى، ونىڭ ىشىندە قىزىلوردا وبلىسى بويىنشا سولتۇستىك-وڭتۇستىك 500 كۆ ٴاج بويىنشا ەلەكتر ەنەرگياسىن وتكىزۋگە كۆوتا (شەكتەۋ) ەنگىزىلگەندىكتەن 24 مۆت كولەمىندەگى ەنەرگيانى ەلەكترمەن قامتاماسىز ەتۋشى ۇيىمدار سولتۇستىكتەن ەلەكتر ەنەرگياسىن الا الماۋدا. سونىمەن قاتار، "جگەس" –دا تەك ٴبىر بلوك جۇمىس ىستەيدى جانە گاز بويىنشا "قازترانسگازايماق"اق-نا بەرەشەك بولۋىنا بايلانىستى شەكتەۋ ەنگىزىلگەندىكتەن ەكىنشى بلوكتى قوسۋ مۇمكىندىگى بولماۋدا.

«كەسوس»اق مالىمەتىنە سايكەس قازىرگى ۋاقىتتا، «جگەس» ەنەرگوبلوگىن قايتا قالپىنا كەلتىرۋ جۇمىستارى جۇرگىزىلۋدە. ۋاقىتشا كەلەڭسىزدىكتەرگە تۇسىنىستىكپەن قاراۋلارىڭىزدى سۇرايمىز»، - دەلىنگەن حابارلامادا.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!