BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازالى اۋدانىندا ايتەكە بي ەسكەرتكىشى اشىلدى

قىزىلوردا، baq.kz. سونىمەن قاتار اۋداندا مەملەكەتتىك رامىزدەر الاڭى، ال، ارال اۋدانىندا سوت عيماراتى اشىلدى.

قىزىلوردا وبلىسىنىڭ اكىمى ق.كوشەربايەۆ الەۋمەتتىك نىسانداردىڭ اشىلۋىنا قاتىسىپ، اۋدان تۇرعىندارىن قۇتتىقتادى.

قازالى قالاسىندا بيىكتىگى 20 مەتر بولاتىن قازاقستان رەسپۋبليكاسىنىڭ مەملەكەتتىك تۋى ورناتىلعان مەملەكەتتىك رامىزدەر اللەياسى اشىلدى. ەستەرىڭىزگە سالا كەتەيىك، كونستيتۋسيا كۇنى قارساڭىندا مەملەكەتتىك رامىزدەر اللەياسى ارال اۋدانىندا دا اشىلعان ەدى. مۇنداي اللەيالار وبلىستىڭ باسقا دا اۋداندارىندا سالىناتىن بولادى.

اللەيانىڭ اشىلۋ راسىمىندە ايماق باسشىسى «ەلتاڭبا مەن كوك تۋعا، گيمنگە تاعزىم - تاريحقا تاعزىم، ولارعا قۇرمەت – ەلگە قۇرمەت. ويتكەنى، مەملەكەتتىك بەلگىلەرىمىز – ەلدىڭ قۇتى، ىرىس-قاسيەتى» دەپ اتاپ ٴوتتى.

قازالى اۋدانىنىڭ ورتالىعى، ايتەكە بي كەنتىندە كىشى ٴجۇزدىڭ ٴبيى – ايتەكە بي ەسكەرتكىشى اشىلدى. مونۋمەنت اۆتورى - قازاقستان سۋرەتشىلەر وداعىنىڭ مۇشەسى، ٴمۇسىنشى قازبەك ساتىبالدين. ەسكەرتكىشتىڭ بيىكتىگى - 12 مەتر. ەسكەرتكىشتىڭ اشىلۋىنا ارنايى وزبەكستان رەسپۋبليكاسىنىڭ ناۋاي وبلىسىنداعى ايتەكە بي كەسەنەسىنەن توپىراق اكەلىندى.

«رەسپۋبليكا كولەمىندە ايتەكە ٴبيدى ەستە قالدىرۋ باعىتىندا ٴبىراز جۇمىستار اتقارىلدى. ونىڭ اتىندا اۋدان، كوشەلەر، اۋىل بار. وسى اۋداننىڭ ورتالىعى دا – ايتەكە ٴبيدىڭ ەسىمىمەن اتالادى. وتكەن جىلى بابامىزدىڭ ەڭسەلى ەسكەرتكىشىن ورناتۋ تۋرالى شەشىم قابىلداعان ەدىك. بۇگىن مىنە، ايتەكە ٴبيدىڭ ەسكەرتكىشى دە ٴوز تۇعىرىنا قوندى. ەلباسى ٴوزىنىڭ «رۋحاني جاڭعىرۋ» باعدارلامالىق ماقالاسىندا «پاتريوتيزم ەڭ الدىمەن تۋعان جەرگە، ٴوز اۋىلىنا، قالاسىنا، وڭىرىنە جانە كىشى وتانىنا دەگەن سۇيىسپەنشىلىكتەن باستاۋ الادى» دەگەن بولاتىن. ال، قازاقستاندىق ٴپاتريوتيزمدى قالىپتاستىرىپ، ىلگەرى دامىتۋ ۇلتىمىزدىڭ ۇلى ادامدارىنىڭ ۇلگى-ونەگەسىن ۇرپاققا دارىپتەۋ ارقىلى جۇزەگە اسپاق. ولاي بولسا، ايتەكە بيدەي ۇلىلاردى ۇلىقتاۋ - بۇگىنگى ۇرپاقتىڭ ازاماتتىق پارىزى»، - دەدى ايماق باسشىسى.

سونداي-اق، اۋىل تۇرعىندارىن تاريح عىلىمدارىنىڭ دوكتورى، ەتنولوگ احمەت توقتاباي جانە اۋداندىق ارداگەرلەر كەڭەسىنىڭ ٴتوراعاسى ورازعالي بەكبانوۆ قۇتتىقتادى.

ٴىسساپار بارىسىندا وبلىس اكىمى قازالى اۋدانىنداعى قۇرىلىس جۇمىستارىنىڭ بارىسىمەن تانىستى. اۋدان ورتالىعىن ۇلعايتۋ جانە اباتتاندىرۋ ماقساتىندا ايتەكە بي كەنتىن كورشى ەلدىمەكەن – قازالى قالاسىنا بىرىكتىرۋ بويىنشا جۇمىستار جۇرگىزىلۋدە. ەكى ەلدىمەكەن اراسىن 11 گەكتار اۋماق ٴبولىپ جاتىر. وندا 24 كاسىپكەرلىك نىسان سالۋ جوسپارلانىپ وتىر. سونداي-اق، قازالى قالاسىنىڭ اۆتوموبيل جولىن قايتا جاڭارتۋ بويىنشا جوبالىق-سمەتالىق قۇجاتتاماسى دايىندالدى. بۇدان باسقا، 600 ورىندىق مادەنيەت ٴۇيى مەن مەكەمەلەر قۇرىلىسى جۇرگىزىلۋدە، 250 ورىندىق 12 ەكى قاباتتى ٴتۇرعىنۇي قۇرىلىسى جوباسى دايىندالدى جانە جابىق بازار سالۋعا جەر ۋچاسكەسى ٴبولىندى.

سونداي-اق بۇگىن ارال قالاسىندا اۋداندىق سوت عيماراتىنىڭ اشىلۋ ٴراسىمى ٴوتتى. اۋداندىق سوت بۇرىن 1940 جىلى سالىنعان ەسكى عيماراتتا ورنالاسقان بولاتىن. بۇگىندە سوت قىزمەتكەرلەرىنە ىڭعايلى كابينەتتەرمەن، كۇتۋ زالدارى جانە مۇراعاتقا ارنالعان ارنايى ورىنمەن قامتىلعان ەكى قاباتتى عيمارات سالىنىپ وتىر.

«ەلىمىزدە سوت جۇيەسىندەگى جاڭعىرتۋلاردىڭ تابىستى جۇرگىزىلۋى ونىڭ ماتەريالدىق-تەحنيكالىق بازاسىنا بايلانىستى بولماق. وسى رەتتە، وڭىرىمىزدە سوت قىزمەتكەرلەرىنە جانە سالا ماماندارى ٴۇشىن ەش كەدەرگىسىز جۇمىس ىستەۋگە كوپتەگەن مۇمكىندىكتەر جاسالىپ وتىر. بۇل دەگەنىڭىز - مەملەكەت تاراپىنان كورسەتىلگەن زور قولداۋ. ازاماتتاردىڭ قۇقىقتارى مەن زاڭدى مۇددەلەرىن دەر كەزىندە جانە تولىققاندى قورعاۋ - باستى مىندەت. ەندى جاڭا عيمارات سوت جۇيەسىنىڭ جۇمىسىن جەتىلدىرىپ، ازاماتتاردىڭ قۇقىعى مەن زاڭدى مۇددەلەرىن قورعايتىن ورىن بولادى جانە قىزمەتكەرلەردىڭ ادال ەڭبەك ەتۋىنە تىڭ سەرپىن بەرەدى دەگەن ويدامىن»، - دەدى ايماق باسشىسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي