BAQ.kz - Қазақстан жаңалықтары USD 377.73 BAQ.kz - Қазақстан жаңалықтары EUR 428.53 BAQ.kz - Қазақстан жаңалықтары RUB 5.73
استانا:

قازاقستانداعى ەڭ جاس اكىمنىڭ جوسپارى قانداي؟

فوتو: Данияр Айтышевтың жеке мұрағатынан

پاۆلودار، baq.kz ٴتىلشىسى. قازاقستاننىڭ ەڭ جاس اۋىل اكىمى ەرتىس وڭىرىندە تۇرادى. 28 جاستاعى دانيار ايتىشەۆتىڭ تەرەڭكول اۋىلدىق وكرۋگىنە باسشىلىق ەتكەنىنە كوپ بولا قويعان جوق. حالقىنا جاقىن بولۋدى ماقسات ەتكەن ازامات تاۋەلسىزدىك كۇنى قارساڭىندا اۋىل جۇرتشىلىعىنىڭ ٴومىرىن جاقسارتۋدىڭ ستراتەگيالىق جوسپارىنىڭ ناتيجەلەرىمەن تانىستىرعان. جوبا جونىندە اگەنتتىك تىلشىسىنە ايتىپ بەردى.

ەل وڭىرلەرىندە بيۋدجەتتىڭ ٴتورتىنشى دەڭگەيى بەكىتىلگەنى بەلگىلى. ونىڭ اياسىندا وبلىستىڭ 31 اۋىلىنا جەتەكشىلىك ەتىپ جۇرگەن اكىمدەردىڭ بارلىعى ەلدى مەكەندەردىڭ تۇرمىس-تىرشىلىگىن جاقسارتۋ باعىتىندا ارنايى جوبالار ازىرلەگەن. باسىمدىق حالىقتى اۋىزسۋ، جىلۋ جانە الەۋمەتتىك قىزمەت كورسەتەتىن مەكەمەلەرمەن قامتۋعا بەرىلسە دە، دانيار ايتىشەۆ ينجەنەرلىك قاجەتتىلىكتەرمەن بىرگە، حالىقتىڭ پاتريوتتىق سەزىمىن، اۋىزبىرشىلىگىن ارتتىرۋعا ٴمان بەرگەن دۇرىس دەگەن پىكىردە.

«تەرەڭكول اۋدانىنىڭ ورتالىعىندا 7،5 مىڭ ادام تۇرادى. بۇگىندە ازاماتتار سانى تابيعي دەموگرافيالىق وسىمنەن گورى ىشكى كوشى-قون ەسەبىنەن ارتىپ كەلەدى. حالىق اۋدان ورتالىعىنا نەلىكتەن اعىلادى؟ سەبەبى، مۇندا ٴناپاقا تاۋىپ، وتباسىن اسىراۋ ٴۇشىن جۇمىس بار. ەلدى مەكەندە ورتالىقتاندىرىلعان سۋ جانە جىلۋ جۇيەلەرى، مارشرۋتتىق اۆتوبۋستار، قوقىس شىعارۋ سياقتى يگىلىكتەردىڭ ٴبارى بار. ٴومىرىمىز قالامەن بىردەي دەسە دە بولادى. ودان كەندە ەمەسپىز. بىزگە حالىقتىڭ بىرلىگى مەن بەلسەندى ازاماتتىق پوزيسياسى كەرەك. ماسەلە تۋىنداعاندا اكىمدىككە شاعىمدانباي، بىرلەسىپ شەشەتىن دەڭگەيگە جەتۋدى ماقسات ەتەمىن»، - دەيدى اكىم.

ايتا كەتەيىك، دانيار ايتىشەۆ اكىم قىزمەتىنە دەيىن «جاس وتان»، «جاسىل ەل»، «قازاقستان ستۋدەنتتەرىنىڭ اليانسى» ۇيىمدارىنىڭ قۇرامىندە ەڭبەك ەتكەن. بىلتىرعى جىلى تەرەڭكول اۋىلىنىڭ اكىمى بولىپ تاعايىندالدى.

«تاۋەلسىزدىك جىلدارى اۋىل ٴومىرى تانىماستاي وزگەرگەنىنە كۋامىز. ٴوزىم ەكىباستۇز قالاسىندا تۋىپ-وسسەم دە، اۋىل تىرشىلىگى جانىما جاقىن. سەبەبى، وسى ەلدى مەكەندە اتام مەن اپام، انام دۇنيەگە كەلدى. مەنىڭ ويىمشا، ٴار اۋىل ازاماتىنىڭ ٴوز جەكە پىكىرى بولۋى كەرەك، ونى كورسەتە ٴبىلۋ دە ماڭىزدى. سوندا ولار وزدەرىن قوعامنىڭ تولىققاندى ٴبىر مۇشەسى رەتىندە سەزىنىپ، كىشى وتانىنىڭ بولاشاعىن جارقىن ەتۋ جولىندا تىنىمسىز ەڭبەك ەتەدى. مەن ازىرلەگەن جوبانىڭ ماقساتى دا – وسى. اكىمدىككە جۇكتەلگەن مىندەتتەردى ورىنداۋعا قاراپايىم ازاماتتاردى تارتۋ، سونىمەن قاتار، اۋىلدى قوقىستان تازارتۋ. ەڭ باستىسى، تۋعان جەرگە دەگەن سۇيىسپەنشىلىك مادەنيەتىن دامىتۋ. اۋىلعا اكىم بولىپ كەلگەنىمدە كەز كەلگەن ادام جەكە ماسەلەلەرى بويىنشا جەرگىلىكتى بيلىككە شاعىمدانا بەرەتىن. ولاي بولمايدى»، - دەيدى دانيار ايتىشەۆ.

جوبا اياسىندا حالىقتىڭ ٴوز ماسەلەرەرىن شەشۋگە بەلسەندىلىكتى ارتتىرۋ ماقساتى تۇردى.

«ەكى كورشى ارازداسىپ قالدى دەلىك. بۇل ماسەلەنى اكىمدىككە جۇكتەۋ دۇرىس ەمەس ەكەنى بەلگىلى. وسى تەكتەس جايتتار اۋىلدا كوپتەپ كەزدەسەدى. ٴبىز وسىنداي جاعدايلار اكىمنىڭ قۇلاعىنا جەتپەس ٴۇشىن جەرگىلىكتى ارداگەرلەر كەڭەسىنىڭ قۇرمەتتى اتا-اجەلەرىن تارتتىق. ولاردى حالىق تانيدى، قۇرمەتتەيدى، كەڭەستەرىن تىڭدايدى. سوندىقتان، سوزدەرىنە دە قۇلاق اسادى. ناتيجەسىندە اكىمدىككە تۇسەتىن شاعىمدار 60%-عا ازايدى. ياعني، جەرلەستەرىم ازاماتتىق پوزيسياسىن بەلسەندىرەك تانىتا باستادى»، - دەيدى ول.

جاس اكىمنىڭ ەنگىدى ماقساتى – اۋدان ورتالىعىن قوقىستان تازارتۋ ماقساتىندا قايتا وڭدەۋ زاۋىتىن اشۋ. بۇل باعىتتا تۇرعىندار اراسىندا قوقىستى ٴبولىپ تاستاۋ مادەنيەتىن قالىپتاستىرۋ كوزدەلگەن.

«ٴبىز وبلىستا العاشقىلاردىڭ ٴبىرى بولىپ قوقىس ورنىن سەنىمدى باسقارۋعا بەردىك. ەندى قاتتى تۇرمىستىق قالدىقتار پوليگونىنىڭ جۇمىسىمەن جەكەمەنشىك كاسىپورىن اينالىسادى. سونىمەن قاتار، قوقىستى سۇرىپتاۋ تەحنولوگياسى ەنگىزىلدى. تۇرمىستىق قالدىقتار، پلاستيكالىق بۇيىمدار، شىنى دەگەندەردىڭ ٴبارىن بولەك-بولەك تاستايتىن بولدىق. كەلەر جىلى بۇل پوليگونعا كوممۋنيكاسيا جۇيەلەرىن تارتامىز. بۇل جەدە 15 جىل بويى قايتا وڭدەۋگە جەتەتىن قوقىس جينالىپ قالعان. ەكولوگيالىق ماسەلەنى كەيىنگى ٴۇش جىلدا كەزەڭ-كەزەڭىمەن شەشەمىز. شاعىن زاۋىت اشۋ جوسپارلانعان»، - دەيدى دانيار ايتىشەۆ.

جوبا شەڭبەرىندە «بەلسەندى ازامات» اتتى بايقاۋ جاريالانعان. ەڭ بەلسەندى تۇرعىندارعا ٴتۇرلى ماراپاتتار تارتۋ ەتىلمەك. ال تەرەڭكولدەن شاڭىراق قۇرعان ٴار جاس وتباسىعا 50 بالاپان سىيلاۋ داستۇرگە اينالماق. بۇل دا – جاس اكىم ويلاپ تاپقان جاڭاشىلدىق.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي