BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەكسپو اۋماعىنداعى باس شىرشا تۇرعان الاڭ بالالار ٴۇشىن ەرتەگى الەمىنە اينالدى

ٴۇش اي بۇرىن شىمىلدىعى جابىلعان استاناداعى ەكسپو-2017 كورمەسىنىڭ اۋماعى ٴقازىر قۇددى ٴبىر ەرتەگى الەمىنە اينالعانداي. سەبەبى، ەكسپو-2017 كورمەسىنىڭ باس سيمۆولى - «نۇر الەم» سفەراسىنىڭ جانىنان ەلوردانىڭ بيىلعى باس شىرشاسى جاعىلدى، دەپ حابارلايدى baq.kz اقپارات اگەنتتىگى.

جاڭا جىلدىڭ باستاۋى - شىرشانىڭ جاعىلۋ راسىمىنە استانا تۇرعىندارى مەن قوناقتارى، باس-اياعى 3000-عا جۋىق ادام كەلگەن. ايتا كەتەرلىگى، استاناداعى 25 مەترلىك شىرشانىڭ التى مىڭ شامى بار، سوندىقتان دا بۇل شىرشا ەلورداداعى عانا ەمەس، قازاقستانداعى ۇلكەن شىرشاعا اينالىپ وتىر.

سونىمەن قاتار، ەكسپو-2017 كورمەسىنىڭ اۋماعىنا استانانىڭ ەڭ ۇلكەن مۇز قالاشىعى سالىنعان. مۇز قالاشىقتىڭ تاقىرىبى قازاقستاندا وتكەن حالىقارالىق كورمەنىڭ تاقىرىبىنا ساي. مۇندا الەم تاريحىندا ەڭ العاش رەت 1851 جىلى لوندوندا وتكەن ەكسپو كورمەسىنىڭ سيمۆولى – شىنى سارايىنىڭ كوشىرمەسى، 1889 جىلعى ەكسپو كورمەسىنەن قالعان ەيفەل مۇناراسىنىڭ كوشىرمەسى اينا قاتەسىز مۇزدان قۇيىلعان.

ال، اتاقتى «ديسنەيلەند» سارايى مەن ەڭ تاماشا مۋلتفيلم كەيىپكەرلەرىنىڭ مۇزدان قۇيىلعان كوشىرمەلەرى – بالالار ٴۇشىن كۇتپەگەن سىي بولدى. مۇز قالاشىعىندا سونداي-اق 70 مەترلىك لابيرينت، مۇزدان جاسالعان كولىك، spider-man جانە دە اياز اتا مەن اقشاقاردىڭ ٴمۇسىنى سالىنعان. كونكي تەبەمىن دەگەندەرگە اۋماعى كەڭ مۇز ايدىنى، ال، سىرعانايمىن دەگەن ەرەسەكتەرگە بيىكتىگى بەس مەتر، ۇزىندىعى قىرىق مەتر ەكى سىرعاناق قۇيىلعان. بالالارعا ارنالىپ بيىكتىگى 2،5 مەتر، ۇزىندىعى ون ٴتورت مەتر تاعى ەكى سىرعاناق بوي كوتەرگەن. بۇل جەرگە سونداي-اق تۇندە قىزىل ٴتۇس تاراتىپ، جانىپ تۇراتىن شىرشا استىنداعى سىيلىق قورابىنىڭ ٴمۇسىنى دە ٴسان بەرىپ تۇر.

باس شىرشانى تاماشالاپ، مۇز قالاشىقتى ابدەن قىزىقتاعان ەلوردا تۇرعىندارى مەن قوناقتارى: «بيىلعى جاڭا جىل ەرتەگىدەي باستالدى، ال ەكسپو-2017 كورمەسىنىڭ اۋماعىنداعى مۇز قالاشىق – وتباسىمەن بارىپ، دەمالىپ قايتاتىن ورىنعا اينالدى» دەگەن تىلەكتەرىن جەتكىزىپ جاتىر.

ەستەرىڭىزگە سالا كەتەيىك، وسى ۋاقىتقا دەيىن استانانىڭ باس شىرشاسى «اقوردا» رەزيدەنسياسىنىڭ الدىندا، ال، مۇز قالاشىق «حان شاتىر» ويىن-ساۋىق ورتالىعىنىڭ الدىندا اشىلاتىن ەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي