ەلىمىزدەگى ٴجۇزىمنىڭ 72،5 پايىزى تۇركىستان وبلىسىندا وسىرىلەدى

تۇركىستان، baq.kz. تۇركىستان وبلىسى جەتىساي اۋدانىنا قاراستى اباي اۋىلدىق وكرۋگىندەگى ٴجۇزىم القابى 280 گەكتارعا جەتىپ وتىر.

تۇركىستان وبلىسى اكىمىنىڭ ٴباسپاسوز قىزمەتىنىڭ ايتۋىنشا ٴقازىر اباي وكرۋگىندە ٴجۇزىم جيناۋ ناۋقانى اياقتالۋعا جاقىن. وڭىردەگى ەڭ ٴىرى «ماحارام» شارۋا قوجالىعى ەگىس القابىنىڭ ٴار گەكتارىنان 25 سەنتنەرگە دەيىن ٴونىم الۋدا. ٴجۇزىمنىڭ «تايفى» سورتىنان جينالعان ٴونىمنىڭ باسىم بولىگى رەسەيگە جونەلتىلىپ جاتىر.

جالپى اتالعان قوجالىقتا 42 گەكتار جەرگە ٴجۇزىم ەگىلگەن. سونىڭ 26 گەكتارى ٴونىم بەرسە، قالعان 16 گەكتارى الداعى ەكى جىلدا جەمىسىن بەرە باستايدى.

«1 گەكتارعا شامامەن 2 ميلليون تەڭگەگە جۋىق شىعىن كەتەدى ەكەن. 50 جىلعا جۋىق ٴونىم بەرۋگە قاۋقارلى ٴجۇزىم باقتارى جالپى كەتكەن شىعىندى 5-6 جىلدا تولىعىمەن اقتاۋعا بولادى. قازىرگى تاڭدا ٴجۇزىمنىڭ ٴبىر كەلەسى 120 تەڭگەدەن ساۋدالانىپ وتىر. القابتا 30 ادام جۇمىس ىستەيدى»،- دەيدى قوجالىق ٴتوراعاسى ماحارام نيفتاليەۆ.

سوڭعى 3 جىلدا تۇركىستان وبلىسى بويىنشا جەمىس-جيدەك پەن ٴجۇزىمنىڭ ەگىس كولەمى 1،8 مىڭ گەكتارعا ارتىپ، ەگىس كولەمى 30 مىڭ گەكتارعا جەتكەن. ونىڭ ىشىندە جەمىس – 19،5 مىڭ گەكتار، ٴجۇزىم – 10،5 مىڭ گەكتاردى قۇرايدى. اعىمداعى جىلى 85 مىڭ توننا جەمىس-جيدەك جانە 70 مىڭ توننا ٴجۇزىم جيناۋ جوسپارلانىپ وتىر. ايتا كەتەرلىگى، رەسپۋبليكادا وندىرىلگەن ٴجۇزىمنىڭ 72،5 پايىزى تۇركىستان وبلىسىنىڭ ەنشىسىندە.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!