الماتى وبلىسىندا كادەتتەردىڭ العاشقى سلەتى ٴوتتى

الماتى وبلىسى، baq.kz. الماتى وبلىسىندا قۇقىق قورعاۋ باعىتىن نەگىزگە العان ەلىمىزدەگى العاشقى كادەت سىنىبىندا ٴبىلىم الۋشىلاردىڭ سلەتى ۇيىمداستىرىلدى. وتەگەن باتىر كەنتىندە ۇيىمداستىرىلعان ٴىس-شاراعا تالدىقورعان قالاسى مەن ىلە اۋدانىنىڭ مەكتەپتەرىندەگى 150-دەن استام كادەت قاتىستى.

الماتى وبلىسىندا نەگىزى قالانعان «جاس پوليسيا» كادەت قوزعالىسى سۇرانىسقا سايكەس دامۋ ۇستىندە. قازىرگى تاڭدا ٴتورت جالپى ٴبىلىم بەرەتىن مەكتەپتە 5 كادەت سىنىبى جۇمىس جاسايدى. پيلوتتىق جوبا رەتىندە العاشقى كادەت سىنىبى بىلتىر ىلە اۋدانى وتەگەن باتىر كەنتىنىڭ №7 ورتا مەكتەبىندە اشىلدى. بۇدان كەيىن وسىنداي سىنىپتار اۋداننىڭ باسقا ٴۇش مەكتەبىندە اشىلدى. پوليسيالىق باعىتتى ۇستانعان العاشقى كادەت سىنىبىن اشۋ يدەياسىن، كەيىننەن «جاس پوليسيا» جوباسىن ودان ٴارى دامىتۋعا وبلىس باسشىسى اماندىق باتالوۆ قولداۋ كورسەتتى.

«كادەتتەردىڭ العاشقى سلەتىن وتكىزۋ تۋرالى شەشىم قابىلداۋ كەزىندە ىلە اۋدانى وتەگەن باتىر كەنتىندەگى №7 ورتا مەكتەبى تاڭداپ الىندى. ويتكەنى، وسى مەكتەپتە قۇقىق قورعاۋ باعىتىن نەگىزگە العان العاشقى كادەت سىنىبى اشىلعان بولاتىن. ياعني، ەلىمىزدەگى «جاس پوليسيا» قوزعالىسىنىڭ باستاۋ العان جەرى. ٴىس-شارادا بالالار بىر-بىرىمەن كەزدەستى، ٴارتۇرلى باعىتتا ٴوز ونەرلەرىن ورتاعا سالدى. كادەت قوزعالىسىن دامىتۋ بويىنشا ويلارى مەن ۇسىنىستارىن ورتاعا سالدى. جالپى ايتقاندا، ورتاق مۇددە اياسىندا جاقىنىراق تانىستى»،- دەيدى ۇيىمداستىرۋشىلار.

سونداي-اق، وبلىستىق سلەتكە شەكارا اسكەرى جەلىسى بويىنشا ٴبىلىم الاتىن ىلە اۋدانىنىڭ №38 مەكتەبىنىڭ كادەتتەرى دە قاتىستى. ٴىس-شارا بارىسىندا سلەتكە كەلگەن كادەتتەر قارۋ-جاراقتى بولشەكتەۋ جانە ونى قايتا قۇراستىرۋ، ساپتىق اندەردى ورىنداۋ، ساپتىق دايىندىق بويىنشا ٴوز بىلگەندەرىمەن ٴتانتى ەتسە، سوڭىندا كورەرمەندەرگە ٴان مەن كۇيدەن شاشۋ شاشتى.

ايتا كەتەيىك، بيىل قازاقستان رەسپۋبليكاسىنىڭ ىشكى ىستەر ٴمينيسترى قالمۇحامبەت قاسىموۆ ىلە اۋدانىنىڭ كادەتتەرىن قابىلداپ، كادەت قوزعالىسىنا وڭ پىكىر ٴبىلدىردى جانە ٴتالىم الۋشىلاردىڭ داعدىسى مەن دايىندىعىنا جوعارى باعا بەردى.

«جاس پوليسيا» جوباسى ٴتيىستى ناتيجەسىن بەردى. ٴبىلىم الۋشىلاردىڭ ۇلگەرىمى مەن قىزىعۋشىلىعى ارتىپ، ٴتارتىبى جاقساردى. دەنە ٴبىتىمىنىڭ دۇرىس قالىپتاسۋىمەن قاتار، ەلىمىزدىڭ شىنايى پاتريوتى بولۋىنا ىقپال ەتەتىن سىنىپقا قازىرگى تاڭدا اتا-انالار تاراپىنان سۇرانىس ارتىپ كەلەدى. وسىعان وراي، وبلىسىمىزدىڭ باسقا اۋداندارىندا دا كادەت سىنىپتارىن اشۋ جوسپارىمىزدا بار. ەڭ الدىمەن، ٴۇشارال جانە قاپشاعاي قالالارىندا اشىلۋى مۇمكىن»،- دەيدى الماتى وبلىسى پوليسيا دەپارتامەنتىنىڭ ٴباسپاسوز قىزمەتى.

تەگي
• الماتى وبلىسى

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!