BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

الماتى اۋەجايىنىڭ جولاعىن جاڭارتۋعا قانشا اقشا جۇمسالدى؟

ٴتورت جارىم شاقىرىمعا 5،5 ميلليارد تەڭگە جۇمسالعان. الماتى اۋەجايىندا جاڭارتىلعان ۇشىپ-قونۋ جولاعى قولدانىسقا بەرىلدى، دەپ حابارلايدى baq.kz اقپارات اگەنتتىگى كتك ارناسىنا سىلتەمە جاساپ.

تمد توڭىرەگىندە تەڭدەسى جوق بۇل جولاق الىپ اۋە كەمەلەرىن قابىلداپ، كەز كەلگەن اۋا رايىندا قونۋعا مۇمكىندىك بەرەدى. ونىڭ كۇيىمەن قالا اكىمى باۋىرجان بايبەكتىڭ ٴوزى كەلىپ تانىستى. قوعام قايراتكەرلەرى مەن ەسترادا انشىلەرى دە جولاقتى كورۋگە قوناق بولىپ كەلگەندەردىڭ تىزىمىندە. استانادان كەلگەن بوينگكە ەرەكشە قوشەمەت كورسەتىلدى. ويتكەنى، جاڭا جولاققا العاشقى بولىپ قونعان وسى ۇشاق. سىرت كوز بۇل قاربالاسقا قاراپ الاتاۋ باۋرايىنا الەمگە اتاقتى بىرەۋ كەلدى مە دەپ قالار. قۇددى قۇداسىن كۇتكەندەي، اۋەجاي باسشىلىعى بىردەن بورت كومانديرىن تراپتان تۇسپەي جاتىپ گۇل بەرىپ، «قالاي ەكەن؟» دەپ اسەرىن سۇرادى.

ماقتاۋىن كەلىستىرگەن جولاققا جۇمسالعان اقشا دا از ەمەس. باقانداي 5،5 ميلليارد تەڭگە. ايتسە دە، الماتى اكىمدىگى قولداۋ كورسەتۋدە قالىس قالىپ، جەكە ينۆەستورلار اسارلاتۋعا كەلگەن. وسىلايشا، قازىنا قارجىسىن ۇنەمدەدىك دەگەن باۋىرجاەن بايبەك، جولاقتى الماتىلىقتارعا تارتۋ دەپ تۇسىنگەن ٴجون دەيدى.

ۇشىپ-قونۋ جولاعى 3ۆ (بي) ساناتىنداعى يكاو تالابىمەن توسەلىپ، ارنايى شامدارمەن جاراقتاندىرىلعان. وسىعان دەيىن ٴىرى تاسىمالداۋشىلار الماتى تۇمانىن تەسىپ وتە الماي، كەرى قايتىپ، جىلىنا 2،5 ميلليارد تەڭگەگە دەيىن شىعىنعا باتاتىن. ول ولقىلىقتىڭ دا ەندى ورنى تولدى.

ۇزىندىعى 4،5 شاقىرىم، ال ەنى 60 مەتر. كەز كەلگەن اۋا رايىندا ۇشاق قونا الادى. سونىمەن قاتار، قازاقستانعا وسىعان دەيىن بىردە-بىر رەت تابانى تيمەگەن الەمدەگى ەڭ ۇلكەن airbus a 380 اۋە كەمەسىن دە قابىلداۋعا قاۋقارلى. جولاقتىڭ شولاقتىعى بۇگىنگە دەيىن جاھانداعى الىپ ۇشاقتاردىڭ قازاقستانعا تىكەلەي كەلۋىنە بوگەت بولعان ەكەن. حالىق قاھارمانى توقتار اۋباكىروۆ ەندى ەسىگىمىز تورتكۇل دۇنيەگە ايقارا اشىلاتىنىن ايتادى.

«اۋستراليادان كەلسە كەلە بەرسىن، امەريكادان كەلسە، اناۋ انتاركتيكادان دا تىكەلەي ۇشىپ كەلسە، ٴبىز ولاردى قۋانىشپەن قارسى الا الامىز»، دەيدى قر حالىق قاھارمانى توقتار اۋباكىروۆ.

ۇشىپ قونۋ جولاعىن جوندەۋ جۇمىسى بار جوعى جارتى جىلدىڭ ىشىندە اياقتالعان. كوپ ماقتاعان تاس جولدىڭ قانشا ۋاقىت بويىنا شىداس بەرەتىنىن ۋاقىت كورسەتەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي